شىعىستا «التاي – تۇركى الەمىنىڭ التىن بەسىگى» اتتى حالىقارالىق عىلىمي-پراكتيكالىق كونفەرەنتسيا ءوتتى. وعان عىلىم جانە جوعارى ءبىلىم ۆيتسە-ءمينيسترى قۋانىش ەرعاليەۆ, شەتەلدىك جەتەكشى تاريحشى عالىمدار جانە ديپلوماتيالىق ميسسيا وكىلدەرى قاتىستى.
عىلىمي-تاجىريبەلىك كونفەرەنتسيانىڭ باستى ماقساتى – حالىقارالىق عىلىمي قاۋىمداستىق پەن قالىڭ جۇرتشىلىقتى ايماقتىڭ ارحەولوگيالىق الەۋەتىمەن تانىستىرۋ. كونفەرەنتسيادا ەلىمىزدىڭ بەدەلدى گۋمانيتارلىق عىلىمي ينستيتۋتتارى مەن جوعارى وقۋ ورىندارىنىڭ تاريحشى-عالىمدارى بايانداما جاسادى.
ءىس-شارا اياسىندا عىلىم جانە جوعارى ءبىلىم ۆيتسە-ءمينيسترى قۋانىش ەرعاليەۆ جەرگىلىكتى عالىمداردىڭ قازبا جۇمىستارى ناتيجەسىندە تابىلعان قۇندى جادىگەرلەرمەن تانىستى.
– بۇكىل ەۋرازيا كەڭىستىگىندەگى تۋىس حالىقتاردىڭ, اسىرەسە قازاقتىڭ تاريحىندا اسقار تاۋلى قارت التايدىڭ ورنى ەرەكشە. ساق وركەنيەتى مەن العاشقى دالالىق يمپەريا قۇرعان عۇنداردان باستالاتىن تۇركى دۇنيەسى پايدا بولعان التاي تۇركى الەمىنىڭ التىن بەسىگىنە اينالدى. عالىمدارمەن بىرگە ۇلان اۋدانىنداعى قولا داۋىرىنە جاتاتىن اقباۋىر ەسكەرتكىشىندە بولىپ, ساقتاردىڭ ەجەلگى قونىسىن كورىپ قايتتىق. عالىم-ارحەولوگتەردىڭ زەرتتەۋ ناتيجەلەرى عىلىم پاراقتارىن جاڭارتاتىنى انىق. وسى ورايدا مينيسترلىك تاراپىنان ارحەولوگيالىق زەرتتەۋلەردى قارجىلاندىرۋ ماسەلەسىنە 2022-2024 جىلدارعا ارنالعان تاريح عىلىمى بويىنشا جالپى قارجىلاندىرۋ كوزدەلگەنىن اتاپ وتكىم كەلەدى, – دەدى قۋانىش ەرعاليەۆ.
ەستەرىڭىزگە سالا كەتسەم, اقباۋىر ۇڭگىرى – قولا ءداۋىرىنىڭ ەسكەرتكىشى. ات ءىزىن سالار بولساڭىز, ۇڭگىر قابىرعاسىنداعى كۇرەڭ وحرامەن سالىنعان اڭ ستيلىندەگى سۋرەتتەردى كورەر ەدىڭىز. تاريحشى مامانداردىڭ پىكىرىنشە, ول سۋرەتتەر ب.ز.ب. 3-مىڭجىلدىقتىڭ باسىنا جاتادى ەكەن. توبەسى ويىق ۇڭگىر دە كىرگەن ادامعا ەرەكشە اسەر ەتەدى. ۇڭگىر تورىندەگى سۋرەتتەردىڭ مازمۇنى وتە كۇردەلى. قوس دوڭگەلەكتى اربا, وگىز, تاۋتەكەنىڭ سۋرەتتەرى بەينەلەنگەن. بۇل داعى سول داۋىردەگى ءدىني نانىم-سەنىمدەرىنە بايلانىستى بولسا كەرەك. اقباۋىرداعى قازبا جۇمىستارىنىڭ وزگە قورىمداردان ەرەكشەلىگى, مۇندا ساقتاردىڭ قونىسى تابىلعان. ماسەلەن, بەرەلدە تەك جەرلەنگەن ورىندارى عانا بولسا, مۇندا سوناۋ عاسىردىڭ تۇرمىس-تىرشىلىگىن ايعاقتايتىن دۇنيەلەر تابىلعان.
تاعىلىمدى, تانىمدىق كونفەرەنتسيادان سوڭ ۇلان اۋدانى, بەستەرەك اۋىلىندا جاڭادان بوي كوتەرگەن ولكەتانۋ مۋزەيى رەسمي تۇردە اشىلدى.
شىعىس قازاقستان وبلىسى