قازاقستاندا ازاماتتارعا ءدىني سەنىم قۇقىقتارىنا بايلانىستى زايىرلى نەمەسە ءدىني ءبىلىم الۋلارىنا جان-جاقتى مۇمكىندىكتەر جاسالعان. مەملەكەتتىك ءبىلىم بەرۋ باعدارلاماسىندا جاستارعا ءبىلىم بەرۋ ساپاسىن ارتتىرۋعا ارنالعان قولايلى باعىتتارى ايقىندالعان. ءدىني ءبىلىم الۋعا نيەت بىلدىرگەن جاستارىمىزدى ءدىني اداسۋشىلىق پەن راديكاليزمنەن ساقتاندىرۋ ماقساتىندا بىرنەشە ساناتتاعى ورتا, جوعارى جانە جوعارى بىلىمنەن كەيىنگى ءبىلىم باعدارلامالارى قاراستىرىلعان.
قازىرگى تاڭدا الەمنىڭ تۇكپىرىندەگى جانە تاياۋ شىعىس پەن اۋعانستان ايماعىنداعى ءدىني احۋالدىڭ كۇردەلەنۋىنە بايلانىستى ازاماتتارىمىزدى شەتەلدەگى تەولوگيالىق وقۋ ورىندارىنا بارىپ ءبىلىم الۋلارى بەلگىلى ءبىر دارەجەدە قاۋىپتى بولۋى مۇمكىن.
ەلىمىزدەگى تەولوگيالىق ءبىلىم الۋدىڭ سۋبەكتىسى رەتىندە نۇر-مۇباراك ۋنيۆەرسيتەتىندە «يسلامتانۋ», «تەولوگيا» ماماندىقتارى بويىنشا باكالاۆر, ماگيستراتۋرا, دوكتورانتۋرا ساناتتارىمەن وقۋ باعدارلاماسى بار. نۇر-مۇباراك ۋنيۆەرسيتەتى 2001 جىلى قازاقستان مەن مىسىر مەملەكەتتەرى اراسىنداعى رەسمي كەلىسىم ارقىلى اشىلعان ورتالىق ازياداعى ەڭ ۇلكەن جوعارى وقۋ ورنى بولىپ سانالادى. ۋنيۆەرسيتەتتىڭ اكادەميالىق جۇمىسىندا مىسىرداعى ايگىلى ءال-ازھار ۋنيۆەرسيتەتىنىڭ پروفەسسورلىق-وقىتۋشىلىق قۇرامىنداعى ماماندار دارىستەر جۇرگىزەدى, وسىنداي باسىمدىقتار ارقىلى يسلام ءدىنىنىڭ ءبىلىم, عىلىم الەۋەتىن وتاندىق جانە شەتەلدىك مامانداردان الۋعا بولاتىن مۇمكىندىكتەرى ءتيىمدى ۇيىمداستىرىلعان.
سونىمەن قاتار ءبىلىمدى زايىرلى ۇستانىمدارمەن ۇشتاسقان ءبىلىم بەرۋ باعدارلاماسى ءال-فارابي اتىنداعى قازاق ۇلتتىق ۋنيۆەرسيتەتىنىڭ فيلوسوفيا جانە ساياساتتانۋ فاكۋلتەتىندە ءدىنتانۋ جانە مادەنيەتتانۋ كافەدراسىندا «يسلامتانۋ» ماماندىعى باكالاۆر, ماگيستراتۋرا, دوكتورانتۋرا ساناتتارى بويىنشا مامانداردى دايارلايدى. ءال-فارابي بابامىزدىڭ تانىمى ۇلكەن مۇراسى ارقىلى قالىپتاسقان ءدىني ءبىلىم قاينارىن وتاندىق جوعارى وقۋ ورىندارىنان قاراستىرۋ – قازىرگى مەكتەپ تۇلەكتەرىنە باعدار.
الماسبەك شاعىرباي,
فيلوسوفيا, ساياساتتانۋ جانە ءدىنتانۋ ينستيتۋتى ءدىنتانۋ ورتالىعىنىڭ ديرەكتورى