تارلان تاريح سىر قىپ, جىر قىپ شەرتەدى: شىڭعىس حاننىڭ اياۋدى بىلمەس, قاتىگەز, قايسار ۇلى شاعاتاي ەكى ءجۇز اسكەرىمەن كىپ-كىشكەنتاي وتىراردى التى اي بويى الا المادى.
الا الماعان سەبەبى وتىرار حالقىنىڭ بىرلىگى بەكەم, رۋحى اسقاق, ەل باسقارعان كوسەمى – قايىر حان دارا تۋعان دانا ەدى, قايسارلىعىمەن دە, ەرلىگىمەن دە دارا ەدى.
التى ايدان كەيىن دە الا المايتىن ەدى, ەگەر ءبىر ساتقىن شاعاتايعا وتىراردىڭ قاقپاسىن اشىپ بەرمەسە. قاھارلى شىڭعىس حاننىڭ الدىندا تۇتقىن بولىپ وتىرىپ تا تىزە بۇكپەي اسقاقتاپ تۇردى. ءور رۋحتى قايىر حان دارا تۋعان باتىردىڭ ەرلىگى اقيقاتپەن استاسقان اڭىز بولىپ جەتتى بۇگىنگە. وتىراردىڭ ءور رۋحتى ەر پەرزەنتى قايىر حاننىڭ ەسىمى مەن ەرلىگى حالىقپەن بىرگە جاساسىپ كەلەدى.
وكىنىشتىسى سول, ەلىن سۇيگەن, ەسىمى ەرلىكتىڭ سيمۆولىنا اينالعان رۋحتى ەردى قۇرمەتتەۋىمىز كەمشىن سوعىپ تۇر.
ولگەن سوڭ دا ورالامىز رۋح بوپ,
شىعا كەلىپ ايقاسامىز كوردەن ءبىز, –
دەپ شاندور پەتەفي جىرلاعانداي, ولگەن سوڭ دا اڭىزعا اينالعان ەرلىگىمەن ەل مەن ەردىڭ رۋحىن اسقاقتاتىپ تۇرعان قايىر حانعا وتىراردا, الماتى مەن نۇر-سۇلتاندا ەڭسەلى ەسكەرتكىش قوياتىن كەز كەلدى.
قايىر حان ەسكەرتكىشى جاستىڭ دا, جاسامىستىڭ دا پاتريوتتىق سەزىمىن وياتىپ, حالىقتىڭ رۋحىن اسقاقتاتۋعا قىزمەت ەتەر ەدى.
ءسابيت دوسانوۆ,
جازۋشى, مەملەكەتتىك سىيلىقتىڭ لاۋرەاتى
الماتى