نۇر-سۇلتاندا EXPO حالىقارالىق كورمە ورتالىعىنىڭ الاڭىندا «KIDS EXPO. بالالار الەمى» كورمە-جارمەڭكەسى باستالدى, دەپ حابارلايدى Egemen.kz.
ءىس-شارانى نۇر-سۇلتان قالاسى اكىمدىگىنىڭ قولداۋىمەن QazExpoCongress ۇلتتىق كومپانياسى ۇيىمداستىردى.
«ەلوردالىق بالالار تاۋارلارىنا ارنالعان «Kids EXPO. بالالار الەمى» جارمەڭكەسى – قالا تۇرعىندارى مەن قوناقتارى ءۇشىن جاڭا وقۋ جىلىنا قاجەتتىنىڭ ءبارىن ساتىپ الا الاتىن الاڭ. مۇندا بەس كۇن بويى كىتاپ, كەڭسە, توقىما, ءبىلىم بەرۋ, ويىن-ساۋىق يندۋسترياسىنىڭ 100-گە جۋىق قاتىسۋشىسى ءوز تاۋارلارىن ۇسىنادى», دەيدى ۇيىمداستىرۋشىلار.
جارمەڭكە بارىسىندا كەلۋشىلەر ءۇشىن ارنايى اقپاراتتىق, مادەني جانە سپورتتىق باعدارلاما ۇيىمداستىرىلىپ, وعان قازاقستاندىق جانە حالىقارالىق ساراپشىلار قاتىسادى. سونداي-اق EXPO الاڭىندا ءبىلىم بەرۋ مەكەمەلەرىنىڭ پەداگوگ-پسيحولوگتارى ءۇشىن پانەلدىك سەسسيالار, كىتاپتاردىڭ تۇساۋكەسەرلەرى, وقىتۋ ادىستەرى, مەكتەپتەر, سونداي-اق ترەنينگتەر مەن ماستەر-كلاستار, كونكۋرستار, بالالار مەن مەكتەپ كيىمدەرىنىڭ كورسەتىلىمدەرى وتكىزىلەدى.
ۇيىمداستىرۋشىلار جارمەڭكەنى جىل سايىن وتكىزۋدى جوسپارلاپ وتىرعانىن ايتىپ ءوتتى.