استانا. 7 مامىر. «ەگەمەن قازاقستان» گازەتىنىڭ پاۆلودار وبلىسىنداعى مەنشىكتى ءتىلشىسى فاريدا بىقايدىڭ تىكەلەي ارالاسۋى ارقاسىندا ءوڭىردىڭ ەرتىس اۋدانى ورتالىعىنا بۇدان شامالى ۋاقىت بۇرىن ورناتىلعان تانكتىڭ ورنىنا كۇش اتاسى – قاجىمۇقاننىڭ نەمەسە ەلىمىز تاۋەلسىزدىگىنىڭ نىشانى – بايتەرەكتىڭ ەسكەرتكىشى قويىلاتىن بولدى. بۇل تۋرالى egemen.kz ءتىلشىسى حابارلادى.
ماسەلەنىڭ ءمانىسى مىنادا. گازەتىمىزدىڭ ۇستىمىزدەگى جىلعى 24 قاڭتارداعى №16 نومىرىندە فاريدا بىقايدىڭ «تۇرعىندار اڭ-تاڭ ... » دەگەن زامەتكاسى جاريالاندى. وندا اۆتور ەرتىس اۋداندىق اكىمدىگىنىڭ الدىندا تۇرعان لەنين ەسكەرتكىشى الىنىپ, ونىڭ ورىنىنا تانك قويىلعانىن اشىنا جازعان بولاتىن. ءتىلشى«سۇپ-سۇر سۇستى تەمىردى ەمەس, رامىزدەرىمىزدىڭ قۇرمەتتەيتىن» ۋاقىتتىڭ جەتكەنىن اشىپ ايتىپ ەدى.
ارادا بىرقاتار ۋاقىت وتكەننەن كەيىن وبلىس اكىمىنىڭ ءباسپاسوز قىزمەتى تىلشىگە حابارلاسىپ, ونىڭ جوعارىدا اتالعان ماقالاسىندا كوتەرىلگەن جايتتارعا بايلانىستى اتقارىلعان جۇمىستاردىڭ جايىن حابارلاپتى.
«وتكەن جىلى اۋدان ورتالىعى - ەرتىس اۋىلىنىڭ ورتالىق الاڭى مەن اللەياسىن جاڭعىرتۋ بويىنشا جوبالىق-قۇجاتتامالار ازىرلەندى, - دەلىنگەن وندا. - اۋداننىڭ ورتالىق الاڭى مەن اللەياسىن جاڭعىرتۋ بويىنشا ارنايى جينالىس ءوتتى. بۇل جينالىسقا جەرگىلىكتى اتقارۋشى بيلىك وكىلدەرى, اۋداندىق ءماسليحات دەپۋتاتتارى, اۋداننىڭ قۇرمەتتى ازاماتتارى, زەينەتكەرلەر قاتىستى. جينالىستا «لەنين ەسكەرتكىشىن باسقا جەرگە كوشىرۋ تۋرالى» شەشىم قابىلداندى. قازىر تاڭدا لەنين ەسكەرتكىشىنىڭ ورنىنا بمپ (تانك) ەسكەرتكىشى ورناتىلعان. بۇل تانك ەسكەرتكىشى اۋداندىق اكىمدىكتىڭ الدىندا ۋاقىتشا قويىلدى. قازىرگى تاڭدا بمپ-نىڭ ورنىنا قاجىمۇقان نەمەسە بايتەرەك ەسكەرتكىشىن ورناتۋ بويىنشا قارجىلاندىرۋ ماسەلەسى شەشىلىپ جاتىر».
«قۇرمەتتى فاريدا شايماردانقىزى! ءسىز كوتەرگەن تاقىرىپ جانە وعان قاتىستى ايتىلعان سىن وتە وبەكتيۆتى ءارى ورىندى دەپ بىلەمىز. الداعى ۋاقىتتا سىزبەن تىعىز قارىم-قاتىناستا جۇمىس جاسايمىز دەپ سەنەمىز», - دەپ جازادى پاۆلودار وبلىسى اكىمىنىڭ ءباسپاسوز قىزمەتى.
مۇرات ايتقوجا.
دەرەككوز: egemen.kz.
فوتو: photoua.narod.ru.