تامىلجىعان تامىزدا وسكەمەننەن قاي باعىتقا شىعا قالساڭىز دا, جولدى جاعالاي قاۋلاعان كۇنباعىسقا قاراپ تاڭعالار ەدىڭىز. بىراق مۇنداي سۇلۋلىقتىڭ ماۋسىمى تىم قىسقا. كۇنباعىس ءبىر, ءبىر جارىم اپتا عانا گۇل اتىپ, قۇلپىرىپ تۇرادى. سوندىقتان دا شىعار, ءدال وسى ۋاقىتتا فوتوگرافتار, موبيلوگرافتار كۇنباعىس القابىن ارنايى شىعىپ تاسپاعا تارتادى.
ساپ-سارى دالا. قىزدىڭ كەستەسىندەي كوركەم. بۇل مايلى داقىلدىڭ تۇقىمى سەبىلگەن سوڭ تەز قىلتيادى, تەز كوتەرىلەدى. از عانا ۋاقىت گۇل جارىپ, جايقالادى. جايقالعان تۇسىندا ماڭايىنان بال ارانىڭ ىزىڭى جيىلەپ, كوبەلەكتەر قونعىشتايدى. وتكەن-كەتكەن جولاۋشىلار ايالداپ, سۋرەتكە تۇسەدى. گ ۇلى ءتۇسىپ, ءدانى پىسكەن تۇستا باستارى سالبىراپ, بۇكىرەيەدى. بۇل كەزدە قۇستار شوقىپ, كەسكىن-كەلبەتىن ودان سايىن كەتىرەدى. ەرتەڭ ديقان كەلىپ ورىپ العانشا سۇرەڭ تارتىپ, جۇدەي بەرەدى. جۇدەگەن سايىن ءدانى پىسەدى. بەينە ءبىر ادامنىڭ عۇمىرىنداي...
شىعىس قازاقستانداعى ەگىستىك القابىنىڭ كوبىن كۇنباعىس الىپ جاتقان سەكىلدى. بالكىم, سولاي دا شىعار. اۋىل شارۋاشىلىعى باسقارماسى ماماندارىنىڭ مالىمەتىنشە, بيىل 189 مىڭ 571 گەكتار جەرگە كۇنباعىس ەگىلىپتى. از ەمەس. سوعان قاراي جەرگىلىكتى جەردە ماي باعاسى ارزانداسا دەيسىڭ عوي. كۇنباعىس قامبانى تولتىرىپ, قالتانى قامپايتقانىمەن, توپىراقتىڭ بار ءنارىن سورىپ الادى. تەحنولوگيا بويىنشا ءبىر رەت ەگىلگەن اۋماققا ءۇش-ءتورت جىلعا دەيىن قايتىپ كۇنباعىس ەگۋگە بولمايدى.
ال كۇنباعىستىڭ تاريحىنا ۇڭىلسەك, ەۋروپالىقتار امەريكانى اشقان كەزدە مەكسيكانىڭ جازىعىنان باسى كۇندەي گۇلدەردى كورگەن ەكەن. اۋەلدە ونى «كۇن گ ۇلى» دەپ اتاپ, كەيىننەن پايداسىن بىلگەن. ەۋروپا-ازياعا العاش وسىدان 400 جىل بۇرىن كەلگەن كۇنباعىس بۇگىندە قازاقستاننىڭ شىعىس, سولتۇستىك وڭىرلەرىندە كوپتەپ وسىرىلەدى.
شىعىس قازاقستان وبلىسى