الماتىدا قازاقستان شاحمات فەدەراتسياسىنىڭ ۇيىتقى بولۋىمەن بەلگىلى كاسىپكەرلەر, باق وكىلدەرى مەن قوعام قايراتكەرلەرى كەزدەسىپ, ەلدەگى شاحمات فەدەراتسياسىنىڭ دامۋ ستراتەگياسىن تالقىلادى. شاحمات ويىنى – ىسكەرلىك داعدىلاردى جەتىلدىرە تۇسەتىنى ايان. سونىمەن فەدەراتسيا وكىلدەرى ۇيىم جۇمىسىنا بارىنشا اشىقتىق قاعيداتىن ەنگىزۋگە قاتىستى مالىمەتتەرىمەن ءبولىستى. سونىمەن قاتار الدا كەلە جاتقان وليمپياداعا قاتىسۋدىڭ جاي-جاپسارى قوزعالدى.
قازىر بۇل فەدەراتسيانىڭ باستى مۇراتى شاحماتتى دارىپتەۋدەن بولەك, الەمدىك جەتىستىكتەرگە جەتۋدە تەڭ مۇمكىندىكتەر جاساۋ ارقىلى زياتكەرلىك ۇلت قالىپتاستىرۋ بولىپ وتىر. فەدەراتسيانىڭ جاڭا قۇرامىنا بىرقاتار تانىمال ىسكەر ازامات پەن مەتسەنات كىردى. ءبىر جاعىنان بۇگىندە فەدەراتسيا شاحماتتى مەكتەپ باعدارلاماسىنا مىندەتتى ءپان رەتىندە ەنگىزۋگە ارەكەتتەنىپ وتىرعانىن بىلەمىز.
فەدەراتسيا مالىمەتتەرىنە سۇيەنسەك, ەلىمىزدە ويلىلار ويىنىنا دەگەن سۇرانىس جوعارى. اۋىز تولتىرىپ ايتارلىق حالىقارالىق جەتىستىكتەرىمىز دە بار. شاحماتتان قازاقستان ايەلدەر قۇراماسى – الەمدەگى ەڭ جاس جانە ەڭ بولاشاعى زور قۇراما. ەلىمىزدىڭ 200 مىڭنان استام ازاماتى ۇزبەي شاحمات وينايدى, ودان بولەك, 50 مىڭنان اسا بالا شاحماتپەن اينالىسادى. قازاقستان قورجىنىندا 2015 جىلدان بەرى بالالار مەن جاسوسپىرىمدەر اراسىنداعى الەم چەمپيوناتتارىنان 40-تان استام مەدال بار. جاستاردىڭ الەم چەمپيوناتتارى مەن ازيا چەمپيوناتتارىندا 400-دەن استام ۇل-قىزىمىز جۇلدەلى ورىندارعا يە بولدى. سول سياقتى قازىرگى تاڭدا شاحمات سەكتسيالارى مەن ۇيىرمەلەرىنە باراتىن 30 مىڭنان استام بالا جەكەلەي قارجىلاندىرىلعان.
كەزدەسۋ بارىسىندا قازاقستان شاحمات فەدەراتسياسىنىڭ ۆيتسە-پرەزيدەنتى دارمەن سادۋاقاسوۆ ايەلدەر ۇلتتىق قۇراماسىنىڭ جەتىستىكتەرىنە توقتالا وتىرىپ: «ەگەر ءبىز ايەلدەر قۇراماسى تۋرالى بولەك ايتاتىن بولساق, قازاقستاننىڭ كومانداسى رەيتينگ بويىنشا بەسىنشى, جاس ەرەكشەلىگى بويىنشا ەڭ جاس كوماندا, دەمەك, كوماندانىڭ الەۋەتى زور. قۇرام وتە ۇلكەن رەزەرۆكە يە. ەگەر قازاقستاندىق تالانتتار تۋرالى ءسوز قوزعايتىن بولساق, وندا اسەل سەرىكبايدى ەرەكشە اتاپ وتۋگە بولادى, ول 2021 جىلدىڭ جەلتوقسانىندا وتكەن شاحماتتان ايەلدەر اراسىنداعى الەم چەمپيوناتىندا بەسىنشى ورىن العان, بيىل الەم چەمپيونى اتانعان قازىبەك نوگەربەك بۇعان دەيىن دە باسقا ءتۇرلى جارىستا باق سىناعان», دەدى دارمەن سادۋاقاسوۆ.
سپيكەر وسكەلەڭ ۇرپاق اراسىندا زياتكەرلىك ويىندى ناسيحاتتاۋ ماسەلەلەرىنە كەڭىنەن توقتالا وتىرىپ: «شىنتۋايتىنا كەلگەندە, شاحمات سالاسىن قارجىلاندىرۋ جەتكىلىكسىز. ەلىمىزدە ساپالى شاحمات ينفراقۇرىلىمىنىڭ بولماۋى سالدارىنان بالالارعا ساباق كوپ جاعدايدا جالعا بەرىلەتىن ءۇي-جايلاردا وتكىزىلەدى. قارجىلاندىرۋدىڭ جەتكىلىكسىزدىگى مەن ينفراقۇرىلىمنىڭ بولماۋى شاحماتشى بالالاردىڭ كاسىبي دايىندالۋىنا كەدەرگى كەلتىرىپ ءجۇر», دەدى دارمەن سادۋاقاسوۆ.
سپيكەر وزبەكستاندا شاحمات ويىنى بويىنشا ءبىلىم بەرۋدى دامىتۋدىڭ جوعارى دەڭگەيى قالىپتاسقانىن اتاپ ءوتتى. كورشى ەلدە شاحمات مەكتەپ باعدارلاماسىنا مىندەتتى ءپان رەتىندە ەنگىزىلگەن.
باسقوسۋدا الماتى قالاسى كاسىپكەرلەر پالاتاسىنىڭ ديرەكتورى ايتۋار قوشمامبەتوۆ فەدەراتسيانىڭ باستامالارىن قولداي كەلە: «بالالاردى شاحماتقا جاپپاي باۋلۋ – ادامي كاپيتالعا سالىنعان جاقسى ينۆەستيتسيا. بۇل باعىتتا الماتىدا جاقسى مۇمكىندىكتەر بار. فەدەراتسيا باستامالارىنان باسقا, وڭتۇستىك استانادا ءتۇرلى ۇيىرمە مەن مەكتەپ جۇمىس ىستەيدى. ArtSport باعدارلاماسى ارقىلى بالالار شاحماتتى تەگىن ۇيرەنىپ ءجۇر. شاحمات ۇيىرمەلەرى مەكتەپتەردە ترەندكە اينالۋعا ءتيىس», دەدى.
الماتى