كەيىنگى 10 جىلدا ەلىمىزدە ىسكە اسىرىلعان اۆتوجول جوبالارىن تەكسەرۋ ءۇشىن قارجى, ۇلتتىق ەكونوميكا, ادىلەت مينيسترلىكتەرىنىڭ, باسەكەلەستىكتى قورعاۋ جانە دامىتۋ اگەنتتىگىنىڭ, پروكۋراتۋرا ورگاندارى مەن «اتامەكەن» ۇلتتىق كاسىپكەرلەر پالاتاسىنىڭ وكىلدەرى كىرەتىن كوميسسيا قۇرىلادى, دەپ حابارلايدى Egemen.kz.
بۇل تۋرالى ۇكىمەت وتىرىسىندا قر يندۋستريا جانە ينفراقۇرىلىمدىق دامۋ ءمينيسترى قايىربەك وسكەنباەۆ ايتتى.
«اۆتوجول سالاسىن رەفورمالاۋ شەڭبەرىندە كەلەسىدەي شارالار قابىلداناتىن بولادى: ءبىرىنشى. «قازاۆتوجول» ۇلتتىق كومپانياسى اكتسيونەرلىك قوعامى «قازاقاۆتوجول» جاۋاپكەرشىلىگى شەكتەۋلى سەرىكتەستىگىمەن بىرىكتىرىلەدى. قاۋلى جوباسى ۇكىمەتكە بيىلعى تامىز ايىندا ەنگىزىلەتىن بولادى. ەكىنشى. سوڭعى 10 جىلدا ىسكە اسىرىلعان اۆتوجول جوبالارىن تەكسەرۋ جونىندەگى كوميسسيا قۇرىلادى. كوميسسيا قۇرامىنا قارجى, ۇلتتىق ەكونوميكا, ادىلەت مينيسترلىكتەرىنىڭ, باسەكەلەستىكتى قورعاۋ جانە دامىتۋ اگەنتتىگىنىڭ, پروكۋراتۋرا ورگاندارى مەن «اتامەكەن» ۇلتتىق كاسىپكەرلەر پالاتاسى وكىلدەرى كىرەدى. قاۋلى جوباسى ۇكىمەتكە وسى جىلدىڭ تامىز ايىندا ەنگىزىلەدى», دەدى ۆەدومستۆو باسشىسى.
مينيستر كۇزدە زاڭعا قۇرىلىس پروتسەسىنە قاتىسۋشىلاردىڭ ءبارىنىڭ جەكە جاۋاپكەرشىلىگىن كۇشەيتەتىن نورمالار ەنگىزىلەتىنىن قوسا ايتتى.
«جەرگىلىكتى كاسىپكەرلىك پەن نارىقتى دامىتۋ ماقساتىندا وتاندىق مەردىگەرلەر ءۇشىن شارتتى جەڭىلدىكتەر مەن پرەفەرەنتسيالاردى قولدانۋ بويىنشا قولدانىستاعى ساتىپ الۋ قاعيدالارىنا وزگەرىستەر ەنگىزىلەدى», دەدى ول.