تۇركىستان وبلىسىندا كەيبىر مەكتەپ ديرەكتورلارى 5 جىلدان بەرى اتتەستاتسيادان وتپەگەن. بۇل تۋرالى قر وقۋ-اعارتۋ ءمينيسترى اسحات ايماعامبەتوۆ ءوزىنىڭ الەۋمەتتىك جەلىدەگى پاراقشاسىندا جازدى, دەپ حابارلايدى Egemen.kz.
«تاڭەرتەڭنەن بەرى تۇركىستان وبلىسىنداعى التى اۋىلعا بارىپ, جەتى مەكتەپتىڭ جۇمىسىمەن تانىستىم. سونىڭ ىشىندەگى ەكى مەكتەپ باسشىسىنىڭ جۇمىسىنا تومەن باعا بەرۋگە بولادى. ءوز قۇزىرەتىندەگى مىندەتتەرىن ورىنداۋىنا جانە قاجەتتى جۇمىستى ۇيىمداستىرۋىنا قاتىستى سۇراقتار بار. سونداي-اق مەكتەپتەردىڭ بىرىندەگى كىتاپحاناشىعا «وقۋعا قۇشتار مەكتەپ» جوباسى بويىنشا اتقارىپ جاتقان جۇمىسى ءۇشىن العىسىمدى ايتتىم», دەپ اتاپ ءوتتى اسحات ايماعامبەتوۆ.
ونىڭ سوزىنە سەنسەك, تاعى ەكى مەكتەپتە وسى جوبا بويىنشا جۇمىس ءتيىستى دەڭگەيدە ورىندالىپ وتىرعان جوق.
«مەكتەپ باسشىلارىنىڭ اتتەستاتسيادان ءوتۋ مەرزىمى ءوتىپ كەتسە دە, كەيبىر وبلىس اۋداندارىندا 5 جىلدان استام ۋاقىت بويى اتتەستاتسيا وتكىزىلمەگەن. وسى وبلىستىڭ باسقا دا ءبىلىم بەرۋ ۇيىمدارىنىڭ جۇمىسىمەن تانىسامىن», دەيدى وقۋ-اعارتۋ ءمينيسترى.
ايانا توعانبەك