بۇل تۋرالى ەكولوگيا, گەولوگيا جانە تابيعي رەسۋرستار ۆيتسە-ءمينيسترى ءزۇلفيا سۇلەيمەنوۆا ءمالىم ەتتى, دەپ حابارلايدى Egemen.kz.
«قازاقستاننىڭ 45 ونەركاسىپتىك ايماعىنداعى اۋانىڭ لاستانۋ دەڭگەيىنە مونيتورينگ جۇرگىزىلدى. ناتيجەسىندە 10 ايماقتا اۋا ساپاسى ناشار ەكەنى انىقتالدى. نۇر-سۇلتان, الماتى, قاراعاندى, تەمىرتاۋ, اتىراۋ, اقتوبە, بالقاش, وسكەمەن, جەزقازعان جانە شىمكەنت قالالارىندا اۋانىڭ لاستانۋ دەڭگەيى وتە جوعارى. وعان ءۇش نەگىزگى فاكتور اسەر ەتەدى. ماسەلەن, نۇر-سۇلتان مەن الماتىدا جىلىتۋ ەلەكتروستانتسيالارى اۋاعا زياندى قالدىقتاردى كوپ مولشەردە بولەدى. تەمىرتاۋ مەن وسكەمەندە ەكولوگياعا ءىرى كولەمدە ونەركاسىپتەر زيان كەلتىرەدى. ال باتىس وڭىرلەردە ەسكىرگەن كارىز جۇيەلەرى اۋانى لاستاپ وتىر», دەدى ۆيتسە-مينيستر.
ءزۇلفيا سۇلەيمەنوۆانىڭ دەرەگىنشە, وڭىرلەردەگى ەكولوگيا احۋالىن جاقسارتۋ ءۇشىن 16 جول كارتاسى ازىرلەنگەن.
«جول كارتاسىنا سايكەس, 485 ءىس-شارا ۇيىمداستىرۋ جوسپارلانعان. 2020 جىلدان 2022 جىلدىڭ ءبىرىنشى توقسانىنا دەيىن بەلگىلەنگەن جۇمىستار 50%-عا اياقتالدى. وسى شارالاردىڭ ناتيجەسىندە 2025 جىلعا قاراي 10 ايماقتاعى ەكولوگيانىڭ لاستانۋ دەڭگەيى تومەندەيدى دەپ بولجاپ وتىرمىز», دەپ اتاپ ءوتتى ءزۇلفيا سۇلەيمەنوۆا.
ەلىمىزدە اۋانىڭ لاستانۋىنا سەبەپشى بولىپ وتىرعان ءىرى 16 كاسىپورىن بار. ۆيتسە-ءمينيستردىڭ ايتۋىنشا, اتالعان كومپانيالار ءوز قاراجاتى ەسەبىنەن زياندى قالدىقتار مولشەرىن 20-30%-عا دەيىن ازايتۋعا مىندەتتەلدى.