تۇركىستان وبلىسىنىڭ سارىاعاش اۋدانىندا بيداي ورۋ ناۋقانى باستالدى. اۋدان ديقاندارى جايدارى جازدىڭ ءار ءساتىن قالت جىبەرمەي, استىق ورۋ قارقىنىن ۇدەتە تۇسكەن. ەگىستىك القاپتارىنداعى كومبايندار استىقتى ىسىراپ قىلماي, جينالعان ءداندى قامباعا قۇيۋدا.
ەگىن وراعىن العاشقىلاردىڭ ءبىرى بولىپ داربازا اۋىلدىق وكرۋگىندەگى ديقاندار باستادى. وراق ناۋقانىنا 50 كومباين مەن 100-گە جۋىق جۇك كولىگى قاتىسۋدا. اۋدان ديقاندارى جىلداعىداي بيىل دا استىقتان مول ءونىم جيناۋدان ءۇمىتتى. ارينە بۇعان شارۋاشىلىقتارعا جاسالعان جەڭىلدىكتەر وڭ ىقپال ەتۋدە. سونىمەن قاتار ولارعا ليزينگ نەگىزىندە تەحنيكا بەرىلگەن. جانار-جاعارماي, قاجەتتى بولشەكتەرمەن, مينەرالدى تىڭايتقىشتارمەن قامتاماسىز ەتۋ ماسەلەسى دە جىل سايىن جاقسارىپ كەلەدى. بيىل اۋدان بويىنشا 44,9 مىڭ گەكتار جەرگە ماساقتى داقىلدار ەگىلسە, ونىڭ ىشىندە بيداي – 33,4 مىڭ گەكتار, ارپا – 7 مىڭ, جۇگەرى – 4,5 مىڭ گەكتار. جالپى, بيىل وبلىستا اۋىل شارۋاشىلىعى داقىلدارى جوسپارلانعان 851 مىڭ گەكتارعا تولىق ەگىلگەن. ەگىس القاپتارىن ءارتاراپتاندىرۋ شەڭبەرىندە مال ازىقتىق داقىلداردىڭ كولەمى 5,5 مىڭ گەكتارعا ارتىپ, 227,5 مىڭ گەكتارعا ورنالاستىرىلدى. سونداي-اق ءداندى داقىلدار – 298,2 مىڭ گەكتارعا, داندىك جۇگەرى – 44,5 مىڭ, بيداي –201,2 مىڭ گەكتارعا ەگىلدى. وڭىردە مال ازىقتىق داقىلدىڭ 2 جىلدىق قورىن جاساقتاۋعا ەرەكشە ءمان بەرىلۋدە.
«بىلتىرعىداي كۇردەلى جاعداي قايتالانباۋعا ءتيىس. مال ازىعىن ازىرلەۋگە, جيناۋعا باسا نازار اۋدارىڭىزدار. بيىل 2 جىلعا جەتەتىن قور جاساقتاۋ قاجەت. اۋا رايىنىڭ جاڭبىرلى ءارى ءشوپتىڭ مول بولۋى قولايلى بولىپ تۇر. جەمشوپتىڭ باعاسى دا بىلتىرعىدان ارزاندادى. وسى ماسەلەنى تولىق قاداعالاپ, مونيتورينگ جۇرگىزىپ وتىرىڭىزدار», دەدى وبلىس اكىمى ومىرزاق شوكەەۆ اپتالىق اپپاراتتىق ماجىلىستە.
اۋىل شارۋاشىلىعى باسقارماسىنىڭ باسشىسى نۇربەك
بادىراقوۆتىڭ ايتۋىنا قاراعاندا, بيىلعى ەگىس ناۋقانىنا 12,2 مىڭنان استام اۋىل شارۋاشىلىعى تەحنيكاسى تارتىلعان. «اگرارلىق نەسيە كورپوراتسياسى» اق تاراپىنان دالا جۇمىستارىنا 1 672 اگروقۇرىلىمعا 5,3 ملرد تەڭگە نەسيە بەرىلگەن. كوكتەمگى ەگىس جانە دالا جۇمىستارىن جۇرگىزۋ ءۇشىن وبلىستا تومەندەتىلگەن باعامەن 47,9 مىڭ توننا ديزەل وتىنى ءبولىنىپ, بوساتىلدى. وبلىستا 475 ءتۇرلى مينەرالدى تىڭايتقىش قۇنىنىڭ
50%-ىن سۋبسيديالاۋعا 6 ملرد تەڭگە قارجى بولىنگەن, 319 مىڭ گەكتار ەگىستىك القاپ تىڭايتىلادى. بيىل وبلىستا مال باسىنىڭ ارتۋىنا بايلانىستى قىسقا 4,1 ملن توننا مال ازىعىنىڭ قاجەتتىلىگى ايتىلۋدا. بۇل ورايدا بۇگىندە 0,5 ملن توننا مال ازىعى دايىندالدى. ەگىلگەن ەگىس كولەمىنەن 645 مىڭ توننا مال ازىعىن جيناۋ كوزدەلۋدە.
ايتا كەتەلىك, وڭىردە ەگىستىك القاپ باسىنان سىعىمدالعان تابيعي شوپتەر بۋماسى 350-400, جوڭىشقا 500-700 تەڭگە ارالىعىندا ساتىلىپ جاتىر. «ازىق-ت ۇلىك كەلىسىمشارت كورپوراتسياسى» اق ارقىلى وبلىسقا بولىنگەن 34,4 مىڭ توننا بيدايدان الىناتىن 9,3 مىڭ توننا كەبەك اگروقۇرىلىمدارعا ارزانداتىلعان باعامەن, ياعني كيلوسى 65 تەڭگەدەن ساتىلۋدا. بۇگىندە 334 اگروقۇرىلىمعا 540 توننا كەبەك بوساتىلعان.
تۇركىستان وبلىسى