مەملەكەت باسشىسى قاسىم-جومارت توقاەۆتىڭ تاپسىرماسىمەن پرەزيدەنت اكىمشىلىگىنىڭ باسشىسى مۇرات نۇرتىلەۋ ۇلىتاۋ ءوڭىرىنىڭ بارلىق دەڭگەيدەگى ءماسليحاتتارىنىڭ جيىنىنا قاتىسۋ ءۇشىن جۇمىس ساپارىمەن جەزقازعان قالاسىنا باردى, دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.
دەپۋتاتتار جيىنىندا مۇرات نۇرتىلەۋ پرەزيدەنتتىڭ ۇلىتاۋ وبلىسىنىڭ اكىمى لاۋازىمىنا بەرىك ابدىعالي ۇلى مەن سەرىك شايداروۆتىڭ كانديداتۋرالارىن ۇسىنۋ تۋرالى حاتىن وقىپ بەردى.
اشىق داۋىس بەرۋ ناتيجەسىندە 64 دەپۋتاتتىڭ 51-ءى بەرىك ابدىعالي ۇلىن قولدادى, 13 دەپۋتات سەرىك شايداروۆقا داۋىس بەردى. بۇدان كەيىن مەملەكەت باسشىسى بەرىك ابدىعالي ۇلىن ۇلىتاۋ وبلىسىنىڭ اكىمى لاۋازىمىنا تاعايىنداۋ تۋرالى جارلىققا قول قويدى.
جاڭادان قۇرىلعان وبلىستىڭ اكتيۆىمەن كەزدەسۋدە پرەزيدەنت اكىمشىلىگىنىڭ باسشىسى تاعايىندالعان اكىمنىڭ وسى وبلىستا دۇنيەگە كەلگەنىن, ۇلىتاۋ اۋدانى مەن جەزقازعان قالاسىنىڭ اكىمى لاۋازىمدارىندا قىزمەت ەتكەنىن جانە پارلامەنت ءماجىلىسىنىڭ دەپۋتاتى بولعانىن اتاپ ءوتتى.
جيىندا مۇرات نۇرتىلەۋ مەملەكەت باسشىسىنىڭ ۇلىتاۋ وبلىسىن قۇرۋ تۋرالى شەشىمى حالقىمىزدىڭ بىرلىگى مەن تۇتاستىعىنىڭ سيمۆولىنا اينالعان قاسيەتتى ۇلىتاۋ ايماعىن جاڭعىرتۋعا جول اشاتىن تاريحي وقيعا ەكەنىن ايتتى. ونىڭ پىكىرىنشە, جاڭا ءوڭىردىڭ قۇرىلۋى ايماق تۇرعىندارىنىڭ قوردالانعان ماسەلەلەرىن شەشۋگە, ءوڭىردىڭ الەۋمەتتىك-ەكونوميكالىق دامۋىنا ەلەۋلى سەپتىگىن تيگىزەدى.
سونداي-اق مۇرات نۇرتىلەۋ جاڭا اكىمگە بارلىق مەملەكەتتىك ورگاندار مەن مەكەمەلەردىڭ قالىپتى جۇمىس ىستەۋىن قامتاماسىز ەتۋ جانە حالىقتىڭ ءال-اۋقاتىن ارتتىرىپ, ءوڭىردى دامىتۋ سياقتى مىندەتتەر جۇكتەلىپ وتىرعانىن جەتكىزدى.
پرەزيدەنت اكىمشىلىگىنىڭ باسشىسى ءوڭىردىڭ ءىرى ونەركاسىپ ايماعىنا اينالۋعا مۇمكىندىگى زور ەكەنىنە نازار اۋداردى. سونىمەن قاتار وبلىس اۋماعىنان وتەتىن كۇرە جولدارعا ايىرىقشا ءمان بەرىپ, ءوڭىردى ەلىمىزدىڭ وڭتۇستىك, شىعىس جانە سولتۇستىك وڭىرلەرىن بايلانىستىراتىن ءىرى كولىك-لوگيستيكالىق جەلىگە اينالۋى ءتيىس ەكەنىن اتاپ ءوتتى.