جەزقازعان, تەمىرتاۋ, بالقاش ريددەر, حرومتاۋ سياقتى تاۋ-كەن ونەركاسىبىنە ارقا سۇيەپ وتىرعان قالالاردىڭ ماڭايىنان جاڭا كەن كوزدەرىن ىزدەۋ باستالدى. بۇل تۋرالى ەكولوگيا, گەولوگيا جانە تابيعي رەسۋرستار مينيسترلىگى گەولوگيا كوميتەتى توراعاسى تالعات ساتيەۆ ورتالىق كوممۋنيكاتسيالار قىزمەتىندە ءوتىپ جاتقان بريفينگتە ءمالىم ەتتى, دەپ حابارلايدى Egemen.kz.
«قالا قۇراۋشى كاسىپورىنداردىڭ ورنىقتى جۇمىس ىستەۋىن قامتاماسىز ەتۋ ءۇشىن مونوقالالارعا جاقىن ورنالاسقان, ەكونوميكاسىنىڭ نەگىزىن تاۋ-كەن مەتاللۋرگيا كەشەنى قۇرايتىن ريددەر, حرومتاۋ, جەزقازعان, تەمىرتاۋ جانە بالقاش سيقتى 7 پەرسپەكتيۆالى ۋچاسكەدە ىزدەستىرۋ جۇمىستارى جۇرگىزىلۋدە», دەدى گەولوگيا كوميتەتىنىڭ باسشىسى.
سونداي-اق ول الەمدە سيرەك كەزدەسەتىن مەتالدارعا, ونىڭ ىشىندە ليتيگە سۇرانىستىڭ ارتقانىن ايتتى.
«شيكىزاتتىڭ وسى اتالعان تۇرلەرىن انىقتاۋعا ەرەكشە نازار اۋدارىلىپ وتىر. اتاپ ايتقاندا بيىل شىعىس قازاقستان وبلىسىنداعى «قاراياق» جانە «مونشا» ۋچاسكەلەرىندە سيرەك كەزدەسەتىن مەتالداردى انىقتاۋ جۇمىستارى جالعاسۋدا. 12 جاڭا ۋچاسكەدە سيرەك كەزدەسەتىن مەتالداردى انىقتاۋ پەرسپەكتيۆالارىن ايقىنداۋ بويىنشا جۇمىستاردى باستاۋ جوسپارلانىپ وتىر», دەدى تالعات ساتيەۆ.