قورعانىس مينيسترلىگى اقتاۋداعى اسكەري بولىمدە مەرزىمدى بورىشىن وتەپ جۇرگەن ساربازدىڭ پسيحيكالىق جاعدايىنا قاتىستى تۇسىنىكتەمە بەردى, دەپ حابارلايدى Egemen.kz.
بەلگىلى بولعانداي, اقتاۋداعى 25744 اسكەري بولىمىندە بورىشىن وتەپ جۇرگەن قاتارداعى ا. ەسىمدى جاۋىنگەردىڭ پسيحيكاسىنىڭ بۇزىلۋى جايلى الەۋمەتتىك جەلىدە اقپارات تارادى.
2022 جىلعى 18 مامىردا ساعات 12:00-دە ءبولىم باسشىلىعى ساربازدىڭ اينالادا بولىپ جاتقان وقيعالارعا تۇسىنىكسىز رەاكتسيا كورسەتكەنىن, وزىمەن-ءوزى سويلەسىپ جۇرگەنىن بايقاعان. بولعان وقيعا تۋرالى ساربازدىڭ اتا-اناسىنا حابارلانعان.
«سارباز مەديتسينالىق تەكسەرۋدەن وتكىزۋ ءۇشىن وبلىستىق اۋرۋحاناعا اپارىلدى. تەكسەرۋ ناتيجەسىندە (مرت, ميدىڭ كت) دەنە جاراقاتتارى مەن قاۋىپتى پاتولوگيالار انىقتالعان جوق. 19 مامىردا ماماندار قايتا تەكسەرۋ جۇرگىزۋدى جوسپارلاپ وتىر», دەپ اتاپ ءوتتى ۆەدومستۆو وكىلدەرى.
سونداي-اق قر قم ءباسپاسوز قىزمەتى ساربازدىڭ اسكەرگە كۇشپەن اكەلىنگەنى تۋرالى مالىمەتكە قاتىستى تۇسىنىك بەردى.
«2022 جىلعى 4 مامىردا اسكەرگە شاقىرىلعان ا. ەسىمدى جىگىتكە بەلگىلەنگەن تارتىپپەن شاقىرۋ قاعازى بەرىلدى. 11 مامىردا ول شاقىرۋ پۋنكتىنە كەلدى. سول جەردە وعان جانە ونىڭ تۋىسقاندارىنا ازاماتتىڭ باسقا گارنيزونعا بارماي-اق, اقتاۋ قالاسىندا قىزمەت وتكەرەتىنى مالىمدەلگەن بولاتىن. بۇدان كەيىن اسكەرگە شاقىرىلۋشى رەتىندە ا. قارۋلى كۇشتەردىڭ قاتارىندا قىزمەت ەتۋگە ءوتىنىش ءبىلدىردى», دەلىنگەن قورعانىس مينيسترلىگىنىڭ حابارلاماسىندا.