ىستانبۇلدا تسيفرلىق دامۋ, يننوۆاتسيالار جانە اەروعارىش ونەركاسىبى ءمينيسترى باعدات مۋسين تۇركى مەملەكەتتەرى ۇيىمىنىڭ (تمۇ) باس حاتشىسى باعداد امىرەەۆپەن كەزدەستى, دەپ حابارلايدى Egemen.kz.
«باس حاتشى تمۇ اياسىندا قۇرىلعان اقپارات جانە كوممۋنيكاتسيا تەحنولوگيا (اكت) پلاتفورماسىنا مۇشە مەملەكەتتەردىڭ ساياساتىن ۇيلەستىرۋدى جانە الەۋەتىن ءتيىمدى باسقارۋدى كۇشەيتۋ ارقىلى ايماقتىق ىنتىماقتاستىقتى قامتاماسىز ەتەتىنىن اتاپ ءوتتى», دەپ جازدى باعداد امىرەەۆ Facebook-تەگى پاراعىندا.
ول تۇركى مەملەكەتتەرى اراسىندا ەلەكتروندى قىزمەت كورسەتۋ, تسيفرلىق ينفراقۇرىلىم, وزىق تەحنولوگيا جانە يننوۆاتسيا سالاسىندا ىنتىماقتاستىقتى بەلسەندى جۇرگىزۋ كەرەگىن ايتتى.
باعدات مۋسين تۇركى مەملەكەتتەرىنىڭ اكت-نى دامىتۋداعى مۇمكىندىكتەرى مەن الەۋەتىنە توقتالىپ, ايماقتىڭ ودان ءارى تسيفرلىق ترانسفورماتسياسى تۋرالى پىكىر ءبىلدىردى.
«سونداي-اق مينيستر IT-ينفراقۇرىلىمدى بىرلەسىپ جاڭعىرتۋعا, ەلەكتروندى قولتاڭبا سالاسىنداعى باستامالاردى ىنتالاندىرۋعا, ولاردىڭ تەحنولوگيالىق شەشىمدەرى مەن ءارتۇرلى نارىقتاردا كەڭەيۋى ءۇشىن جاس ستارتاپتاردى ىنتالاندىرۋعا قاتىستى ۇيىم اياسىنداعى ىنتىماقتاستىقتى كەڭەيتۋ كەرەگىن اتاپ ءوتتى», دەدى تۇركى مەملەكەتتەرى ۇيىمىنىڭ باس حاتشىسى.
سونىمەن قاتار قوس تاراپ بيىل 26 مامىردا ازەربايجان استاناسى باكۋدە وتەتىن TEKNOFEST-2022 تمۇ اكت-عا جاۋاپتى مينيسترلەردىڭ الداعى كەزدەسۋىنىڭ كۇن ءتارتىبىن تالقىلادى.