ارتىق سالماق اشقاراقتىقتان عانا ەمەس, دەنساۋلىقتاعى ءتۇرلى كىناراتقا بايلانىستى پايدا بولاتىنى بەلگىلى. سەمىزدىكتى دەر كەزىندە توقتاتپاسا, اۋىر دەرتتەرگە دۋشار ەتەتىنى ايان. سوندىقتان الماتىداعى №7 اۋرۋحانادا سەمىزدىككە شالدىققان 4 پاتسيەنتتىڭ اسقازانىنا مەديتسينالىق ساقتاندىرۋ شەڭبەرىندە وپەراتسيا جاسالدى. مىندەتتى الەۋمەتتىك مەديتسينالىق ساقتاندىرۋ ەنگىزىلگەلى بەرى قازاقستاندىقتار سەمىزدىكتەن ارىلتاتىن قىمبات وپەراتسيالاردى جاساتۋعا مۇمكىندىك الا باستاعانى قۋانتادى.
بۇل جولى قالقامان شاعىن اۋدانىنداعى №7 اۋرۋحانا دارىگەرلەرى 26-27 ءساۋىر كۇندەرى سەمىزدىكتەن قينالىپ جۇرگەن 4 پاتسيەنتكە لاپاروسكوپيالىق بارياتريا جاسادى. ولاردىڭ ءبىرى – 40 جاستاعى ايەل. جىلدار بويى سەمىزدىكپەن الىسۋ ناتيجە بەرمەگەن سوڭ وپەراتسيا جاساتۋعا بەل بۋعان. ارتىق مايدىڭ سالدارىنان سالماعى 103 كيلوعا جەتكەن ايەل ءساتتى جاسالعان وپەراتسيادان كەيىن بىردەن №2 حيرۋرگيا بولىمشەسىنە اۋىستىرىلدى. قازىر پاتسيەنتتىڭ جاعدايى ءبىر قالىپتى, ءوز بەتىنشە ءجۇرىپ-تۇرا الادى.
«لاپاروسكوپيالىق بارياتريا – ارتىق سالماقتى رەتتەپ, سەمىزدىك سالدارىنان بولاتىن ارتەريالدى گيپەرتەنزيا, جۇرەكتىڭ يشەميالىق اۋرۋى سىندى ىلەسپە دەرتتەردى ەمدەۋگە مۇمكىندىك بەرەتىن زاماناۋي ءادىس. وپەراتسيانىڭ بۇل ءتۇرى ءبىزدىڭ كلينيكادا 2019 جىلدان بەرى جاسالىپ كەلەدى. بىرلەسكەن وپەراتسيانى اۋرۋحانانىڭ حيرۋرگيا ءبولىمى مەڭگەرۋشىسى مۇسا ساحيپوۆپەن بىرگە بەلگىلى حيرۋرگ ورال وسپانوۆ جاساپ ءجۇر», دەيدى №7 اۋرۋحانانىڭ وكىلدەرى.
دارىگەر مۇسا ءساحيپوۆتىڭ ايتۋىنشا, وپەراتسيا ادامنىڭ جاسىنا, قوسىمشا اۋرۋلارى مەن زات الماسۋ پروتسەسىندەگى ەرەكشەلىكتەرگە قاراي جاسالادى. مانيپۋلياتسيادان كەيىن پاتسيەنت شامامەن 15-تەن 80 كيلوعا دەيىن سالماق تاستايدى.
ماماندار دەرەگىنە سۇيەنسەك, قازىرگى تاڭدا وپەراتسيادان كەيىن جالعانعان ىشەكتەردىڭ جۇرمەۋى, اناستوموزدا جارا پايدا بولۋى سىندى اسقىنۋلار سانى ازايعان. سونىمەن قاتار وپەراتسيا ۇزاقتىعى, اۋرۋحانادا جاتۋ مەرزىمى دە قىسقارعان. زاماناۋي قوندىرعىلار پاتسيەنتتىڭ تەز ارادا اياققا تۇرۋىنا مۇمكىندىك بەرەدى.
كورسەتىلىمدەرگە بايلانىستى جانە جوسپارلى تۇردە جاسالاتىن وپەراتسيانىڭ قۇنى – شامامەن 600 مىڭ تەڭگە. جوعارى تەحنولوگيالى وپەراتسيا اقىسى ءمامس پاكەتى ارقىلى تولەنەدى, بىراق پاتسيەنت وپەراتسياعا قاجەتتى ءبىر رەتتىك ماتەريالداردى ءوزى ساتىپ الادى.
ماماندار ارتىق سالماق اتەروسكلەروز, گيپەرتونيا, ينفاركت, ينسۋلت, قانت ديابەتى, اسقازان-ىشەك اقاۋى, ارتريت, رەپرودۋكتيۆتىك جۇيە قىزمەتىنىڭ بۇزىلۋى سىندى اۋرۋلارعا اكەپ سوقتىراتىنىن قاپەرگە سالادى. حيرۋرگيالىق وپەراتسيا جاساۋ تۋرالى شەشىم ءدارى-دارمەكپەن ەمدەۋ ناتيجە بەرمەگەن كۇردەلى جاعدايلاردا عانا قابىلدانادى.
قازىرگى تاڭدا ءومىر ءسۇرۋ سالتى مەن ىشكەن-جەگەنگە بايلانىستى سەمىزدىك الەمدىك دەڭگەيدەگى ماسەلەنىڭ ءبىرى. ۇلتتىق قوعامدىق دەنساۋلىق ساقتاۋ ورتالىعىنىڭ دەرەگىنشە, حالقىمىزدىڭ 20%-دان استامى سەمىزدىككە شالدىققان.
الماتى