قازىر جەر-دۇنيە كوڭىل كوكجيەگى جەتكەن ادامعا ءبىر-اق ۋىس. وعان جاڭا تەحنولوگيالاردىڭ جەتىستىكتەرىمەن دە وڭاي كوز جەتكىزە الاسىز. سوندىقتان قوعامعا قاتىپ-سەمگەن ساياسي دوگمالاردى تاڭۋدىڭ ناتيجەسىز ەكەنىن بايقاۋ قيىن ەمەس. ايتالىق, ءبىر كليماتتا تىرشىلىك ەتىپ, ءبىر وزەننەن سۋ ءىشىپ, ءبىر توپىراقتان ءونىم الىپ وتىرعان, الايدا ورتاسىن مەملەكەتتەردىڭ شەكارا سىزىعى ءبولىپ تۇرعان اۋىلدار مەن قالالاردىڭ دامۋ دەڭگەيى ءبىر-بىرىنەن الشاق. ياعني ءبىرى اۋقاتتى, ءبىرى اش-جالاڭاش. ءبىرىنىڭ قوعامىندا بارلىعىنىڭ قۇقى تەڭ قورعالادى, ەندى بىرىندە زورلىق-زومبىلىق ۇستەمدىك قۇرادى. بۇل كەرەعارلىق – باسقارۋ قۇرىلىمىندا, بۇل الشاقتىق – قوعامدىق سانادا بولسا كەرەك.
اباي حاكىم ايتادى: «ساتىپ العان, جالىنىپ, باس ۇرىپ العان بولىستىق پەن بيلىكتىڭ ەشبىر قاسيەتى جوق». حالىق وسى كورىنىستەن زارەزاپ بولدى, جەرىندى. ياعني قوعامدىق سانانىڭ ءوزى تۇتاسىمەن وزگەرۋگە ءتيىس بولدى. ويتكەنى زامان وزگەردى. بۇل – بۇقارانىڭ باسىن تاۋعا دا, تاسقا دا سوعىپ جەكە تۇلعالارعا, مانيپۋلياتسياعا, لوببيستەرگە ەمەس, ءوزى مەن وتباسىنىڭ لايىقتى ءبىلىم الۋىنا, تولايىم تابىس تابۋىنا, بارلىق قۇقىعىنىڭ ساقتالۋىنا, سول ارقىلى تۋعان ەلى مەن جەرىنىڭ دامۋىنا قىزمەت ەتەتىن ۋاقىتى.
وسى ورايدا وسىعان دەيىنگى وتىز جىلدىڭ ساباعىنان قورىتىندى شىعارىپ, بيىك ماقساتتارعا ۇمتىلعان قازاقستاننىڭ تولىق ترانسفورماتسيالانۋعا دەگەن ۇمتىلىسىن وڭ باعالاۋعا بولادى. مەملەكەت باسشىسى قاسىم-جومارت توقاەۆ بيىلعى قازاقستان حالقىنا جولداۋىندا ەلىمىزدى رەفورمالاۋعا ارنالعان ءبىراز باستاما كوتەرگەنى بەلگىلى. بۇل باستامالار قاڭتار وقيعاسىنىڭ قاسىرەتىنەن سوڭ حالىق ءۇنىن ەسكەرۋدەن تۋىنداعان جاڭارۋ مەن جاڭعىرۋعا, ەستيتىن مەملەكەت تۇجىرىمداسىن ناقتى ىسكە اسىرۋعا نەگىز بولارلىق قادام بولاتىنىمەن قوعام نازارىن اۋداردى. الايدا وسىعان دەيىنگى قوردالانعان قاداۋ-قاداۋ ماسەلەلەردى تۇبەگەيلى شەشۋگە قانشالىقتى قاۋقارلىمىز دەگەن ءدۇدامال ساۋال كوپتىڭ كوكەيىنەن كەتپەگەنى راس.
بۇل رەتتە ەلىمىزدىڭ كونستيتۋتسيالىق كەڭەسىنىڭ كۇمان مەن كۇدىك تۇمانىن سەرپىلتكەن العاشقى قورىتىندىسى دا جاريالانىپ, سوعان ساي پرەزيدەنت ۇسىنعان ساياسي جاڭعىرۋدىڭ سونى قادامدارى كونستيتۋتسيامىزعا سايكەس كەلەتىنى جونىندەگى كونستيتۋتسيالىق كەڭەستىڭ شەشىمى ۇسىنىلدى. بۇل ەلدەگى جۇرگىزىلىپ جاتقان رەفورمالاردىڭ بەرىك ساياسي-قۇقىقتىق ىرگەتاسىن قالاۋعا مۇمكىندىك بەرەتىنىن اڭعارتقانداي. پرەزيدەنتتىك باسقارۋ نىسانى قۇرىلىمى مەن بيلىك ينستيتۋتتارىنىڭ وڭتايلى تەڭگەرىمىن قامتاماسىز ەتەتىن زاڭ جوباسى كونستيتۋتسيالىق كەڭەستىڭ پايىمىنشا, زاڭ شىعارۋشى بيلىك تارماعىن قايتا فورماتتاۋ ارقىلى كۇشتى پارلامەنتتىك مادەنيەت قۇرۋعا باعىتتالىپ وتىر. وسى ارقىلى سەنات پەن ءماجىلىستى قۇرۋدىڭ جاڭا تارتىبىنە, جەرگىلىكتى مەملەكەتتىك باسقارۋ مەن ءوزىن ءوزى باسقارۋ كەپىلدىكتەرىنە, كونستيتۋتسيالىق سوتتى قۇرۋعا وڭ باعا بەرىلدى. ال سۋپەرپرەزيدەنتتىك دەگەن اتاۋ الىپ, ايدار تاعىلعان بۇعان دەيىنگى باسقارۋ جۇيەسىنەن ارىلۋىمىز ءبىزدىڭ بۇرىنعى پرولەتار كوسەمدەرىنە, ياعني جەكە باسقا تابىنۋشىلىق دەرتىنەن اراشالاۋدى ەسكە تۇسىرەتىندەي.
پرەزيدەنتتىڭ وسى رەفورمالاردى تەك پارلامەنت ارقىلى ەمەس, جالپىۇلتتىق رەفەرەندۋم ارقىلى ەنگىزۋدى ۇسىنىپ وتىرعانى دا ۇلكەن سەنىم ۇيالاتىپ وتىر. وسىدان 27 جىل بۇرىن بۇكىلحالىقتىق رەفەرەندۋم اياسىندا قازاقستاننىڭ قازىرگى كونستيتۋتسياسى قابىلدانعانى بەلگىلى. ءدال وسى كونستيتۋتسيا ەلىمىزدىڭ ساياسي, قۇقىقتىق, ەكونوميكالىق دامۋ جۇيەسىنىڭ نەگىزدەرىن انىقتادى. وسى ۋاقىت ارالىعىندا كونستيتۋتسيامىزعا پرەزيدەنت پەن پارلامەنتتىڭ وكىلەتتىكتەرى بويىنشا بەس مارتە وزگەرىستەر مەن تولىقتىرۋلار ەنگىزىلگەن ەكەن. البەتتە, زاڭ مەن زامان وزگەرمەي تۇرمايدى. «ەلۋ جىلدا ەل جاڭا» دەيدى. جاڭا قازاقستان قۇرۋ بارىسىندا جاڭساق باسپاي, جارقىن كەلەشەك قۇرۋ ءۇشىن دە قوعامنىڭ بەلسەندى بولعانى ابزال. ەڭ باستىسى – ەل مۇددەسى ەسكەرىلۋى كەرەك. وسى تاراپتا بەلگىلى زاڭگەرلەردىڭ وي-پايىمدارىمەن ءبولىسىپ وتىرمىز.