كەشە عانا قوقيقازدار ولەكسەسى تابىلعان ماڭعىستاۋدا ەندى يتبالىقتار ولىمتىگى تابىلدى. ماڭعىستاۋ وبلىسى بويىنشا ەكولوگيا دەپارتامەنتى بيىل 26 ساۋىردە الەۋمەتتىك جەلىلەردەگى اقپاراتقا مونيتورينگ جۇرگىزۋ بارىسىندا, كاسپي تەڭىزىنىڭ جاعالاۋىندا «قاراجانباس» كەن ورنىنىڭ سۋ بوگەتى ماڭىندا يتبالىقتاردىڭ 50-گە جۋىق ولىمتىگى تابىلعانى تۋرالى اقپاراتتى انىقتايدى.
وقيعا ورنىنا جايىق-كاسپي وبلىسارالىق باسسەيندىك بالىق شارۋاشىلىعى ينسپەكتسياسىنىڭ ماڭعىستاۋ وبلىسى بويىنشا بالىق ينسپەكتسياسى باسقارماسىنىڭ مەملەكەتتىك ينسپەكتورلارى جەدەل جىبەرىلىپ, جاۋاپتى مەملەكەتتىك ورگاندار اراسىندا 2021-2022 جىلدارعا ارنالعان ءوزارا ءىس-قيمىل جوسپارىنا سايكەس سۋ جانۋارلارىنىڭ جاپپاي قىرىلۋ جانە قاۋىپ-قاتەرىن انىقتاۋ ءۇشىن جۇمىس توبى قۇرىلادى. سونداي-اق وسى ماقساتتا وبلىستىق قۇقىق قورعاۋ, تابيعات قورعاۋ ورگاندارىنا, پروكۋراتۋرا, ۆەتەريناريا, جەرگىلىكتى اتقارۋشى ورگانعا, ەكولوگيا جانە توتەنشە جاعدايلار دەپارتامەنتىنە جەدەل حابارلانادى.
– 2022 جىلى 26 ءساۋىر ساعات 23:00-گە دەيىن كەلىپ تۇسكەن اقپاراتقا سايكەس تەڭىز جاعالاۋىنىڭ ءاربىر جەرىندە جاتقان 22 ءولى يتبالىق تابىلدى. يتبالىقتاردىڭ ءولۋ سەبەپتەرىن انىقتاۋ ءۇشىن ولاردى زەرتحانالىق تەكسەرۋگە الۋ مۇمكىندىگى ينسپەكتسيا قىزمەتكەرلەرىمەن قاراستىرىلۋدا. ويتكەنى ولاردىڭ دەنەلەرى ىدىراۋ كۇيىندە. قازىرگى ۋاقىتتا ماڭعىستاۋ وبلىستىق بالىق ينسپەكتسياسى باسقارماسىنىڭ ينسپەكتورلارى بالىق شارۋاشىلىعى سۋبەكتىلەرىنىڭ قورىقشىلىق قىزمەتىمەن بىرلەسىپ, كاسپي تەڭىزىنىڭ جاعالاۋ ايماعى مەن باسقا دا ۋچاسكەلەرگە باقىلاۋ جاساۋدا. زەرتحانالىق زەرتتەۋلەر جۇرگىزۋ ءۇشىن بالىق قورعاۋ ينسپەكتورلارى بىرنەشە يتبالىقتى, تەڭىز سۋى مەن توپىراقتان سىناما الدى, دەيدى بۇل تۋرالى ماڭعىستاۋ وبلىسى بويىنشا ەكولوگيا دەپارتامەنتى ءباسپاسوز قىزمەتى ءوز حابارلاماسىندا.
سىنامالار ماڭعىستاۋ وبلىسى بويىنشا ەكولوگيا دەپارتامەنتى مەن ۆەتەرينارلىق قىزمەتىنە تاپسىرىلادى. ال اتالعان ورگاندار قىزمەتكەرلەرى ماڭعىستاۋ وبلىستىق بالىق شارۋاشىلىعى باسقارماسى وكىلدەرىمەن بىرگە وقيعا ورنىنا شىعۋدى جوسپارلاۋدا. ماڭعىستاۋدا ورىن العان اتالعان فاكتى تۋرالى بعم عىلىم كوميتەتىنىڭ «ميكروبيولوگيا جانە ۆيرۋسولوگيا ينستيتۋتى» زەرتحاناسىنىڭ قىزمەتكەرلەرىنە, سونداي-اق «گيدوبيولوگيا جانە ەكولوگيا ينستيتۋتى» باتىس قازاقستان مەكەمەسىنىڭ قىزمەتكەرلەرىنە حاباردار ەتىلگەن. «جاعالاۋدى باقىلاۋ جۇمىستارى جالعاسۋدا. جاڭارتىلعان اقپارات قوسىمشا جاريالاناتىن بولادى», دەيدى ەكولوگيا دەپارتامەنتى. ياعني «قاراجانباس» كەن ورنىنىڭ سۋ بوگەتى ايماعىندا يتبالىقتاردىڭ نەدەن جاپپاي قىرىلعانىن جۇمىس توبى انىقتايدى.
قوقيقازدار قۇمدا شولدەن ءولدى دەيىك, ال تەڭىزدەگى يتبالىقتار نەدەن ءولدى؟