سۋ كوزى جوق سام قۇمىندا جەرگىلىكتى جاس تۇرعىن بەس قوقيقازدىڭ ولىمتىگىن تاۋىپ العان. قوقيقازداردىڭ ادامدار كەسىرىنەن ەمەس, كوشى-قون بارىسىندا جانە اۋا رايى اسەرىنەن ولگەندىگى ايتىلۋدا.
قۇستاردىڭ قۇمعا كومىلىپ قالعان ولىمتىكتەرىن مەكتەپ وقۋشىسى ۇيالى تەلەفونىنا ءتۇسىرىپ الىپتى. قازىرگى تاڭدا وسى وقيعا بويىنشا «سام» مەملەكەتتىك ورمان قورىنىڭ ينسپەكتورلارى جەدەل تۇردە شىعىپ, انىقتاۋ جۇمىستارىن جۇرگىزىپ جاتىر.
«سوڭعى ۋاقىتتا ماڭعىستاۋ وبلىسىنىڭ اۋماعىندا اۋا رايى شاڭدى داۋىل, جەلدى بولىپ تۇر. جىل قۇستارىنىڭ ميگراتسياسى بەينەۋ اۋدانى اۋماعىنان وتەدى. وسىنداي قولايسىز اۋا رايىندا ىشىندەگى السىزدەرى ورتا جولدا قونىپ, ءارى قاراي سولتۇستىك باعىتقا ۇشا الماي ءولىپ قالۋى مۇمكىن. بۇل اۋماقتا سۋ كوزدەرى جوق», دەگەن ماڭعىستاۋ وبلىستىق ورمان شارۋاشىلىعى جانە جانۋارلار دۇنيەسى اۋماقتىق ينسپەكتسياسى ۆەتەرينارلىق دارىگەرلەرى ولىمتىكتەردەن ءتيىستى سىنامالار الۋ جۇمىستارىن جۇرگىزەتىنىن حابارلاعان بولاتىن.
ماڭعىستاۋ وبلىستىق ورمان شارۋاشىلىعى جانە جانۋارلار دۇنيەسى اۋماقتىق ينسپەكتسياسى باسقارماسىنىڭ مالىمدەۋىنشە, «وحوتزووپروم» ءوب» رمقك-نىڭ اقتوبە فيليالىنىڭ ينسپەكتورلارى, بەينەۋ اۋداندىق پب-ءنىڭ قىزمەتكەرى بەينەۋ اۋدانى اۋماعىنداعى سام قۇمى جانە وعان ىرگەلەس جاتقان اۋماقتاردى قاراپ شىققان. الايدا دالادا ون كۇننەن استام ۋاقىت جاتقان قۇستاردىڭ ولەكسەلەرى ىدىراپ كەتكەندىكتەن ماماندار قوقيقازداردىڭ ولەكسەلەرىنە ساراپتاما جۇرگىزە الماعان, ياعني قۇستاردىڭ ءولۋ سەبەبىن انىقتاۋ مۇمكىن بولمادى. بۇل تۋرالى اۋىل شارۋاشىلىعى مينيسترلىگى ورمان شارۋاشىلىعى جانە جانۋارلار دۇنيەسى كوميتەتىنىڭ جانۋارلار دۇنيەسى جانە اڭشىلىق شارۋاشىلىعى باسقارماسىنىڭ باسشىسى قۋات چۋماكاەۆ ءمالىم ەتتى. ونىڭ پايىمداۋىنشا, قوقيقازدار اۋا رايىنىڭ قولايسىزدىعىنان ولگەن بولۋى مۇمكىن.
– ماماندار قوقيقازداردىڭ ولگەن جەرىنە بارىپ, بەس ولەكسە تاپتى. تەكسەرۋ كەزىندە قۇستاردا وقتىڭ ىزدەرى انىقتالعان جوق. ۆەتەريناريا سالاسى ماماندارىنىڭ ايتۋىنشا, قوقيقازداردىڭ قىرىلۋى اۋا رايىنىڭ قولايسىزدىعىنا بايلانىستى بولۋى مۇمكىن. ياعني قۇستار السىرەگەن, جاقىن جەردە سۋ قويمالارى بولماعاندىقتان ولگەن بولۋى مۇمكىن دەگەن بولجام بار. قازىر بۇل ىسپەن پوليتسيا اينالىسىپ جاتىر, – دەپ تۇسىنىكتەمە بەردى قۋات چۋماكاەۆ.
ءوز كەزەگىندە ماڭعىستاۋ وبلىسىنىڭ مامانداندىرىلعان تابيعات قورعاۋ پروكۋراتۋراسى جاۋاپتى مەملەكەتتىك ورگاندارعا قوقيقازدار ناقتى نەدەن ولگەنى تۋرالى ءمان-جايدى انىقتاۋدى تاپسىرعان. ال ەكولوگيا, گەولوگيا جانە تابيعي رەسۋرستار مينيسترلىگى قوقيقازدىڭ سيرەك كەزدەسەتىن جانۋارلار تىزىمىنە ەنگىزىلگەنىن, بۇل قۇستى زاڭسىز اۋلاۋ جەتى جىلعا باس بوستاندىعىنان ايىرىلۋى مۇمكىن ەكەنىن ەسكەرتتى.