توتەنشە جاعداي ءمينيسترى يۋري يلين پرەمەر-مينيستر ءاليحان سمايىلوۆقا ءىرى ورتتەر بولعان جاعدايدا مەملەكەتتىك ورگانداردىڭ جۇمىسى قالاي ۇيلەستىرىلەتىنىن ءمالىم ەتتى, دەپ حابارلايدى Egemen.kz.
«يۋري ۆيكتوروۆيچ, ءىرى تابيعي ءورت بولعان جاعدايدا اكىمدىكتەر مەن مۇددەلى مەملەكەتتىك ورگانداردىڭ قىزمەت كۇشىن تارتۋ جانە ۇيلەستىرۋ جۇمىستارى قالاي پىسىقتالعان؟», دەپ سۇرادى پرەمەر-مينيستر ۇكىمەت وتىرىسىندا.
ءمينيستردىڭ ايتۋىنشا, بۇل باعىتتا ادەتتەگى جەكە قۇرامنان بولەك قوسىمشا كۇش ازىرلەنگەن.
«باياندامامدا ايتقانىمداي, ناۋرىز ايىندا ۇكىمەتتىك جوسپارىمىزعا تۇزەتۋ ەنگىزىلگەن بولاتىن. ول جوسپار بۇكىل اتقارۋشى جانە ورتالىق مەملەكەتتىك ورگانداردىڭ ماقۇلداۋىنان ءوتتى. قوسىمشا جۇمىلدىرىلاتىن ادام سانى 39 مىڭنان اسادى. بۇل توپ بولۋى ىقتيمال ءىرى ورتتەرگە تارتىلادى. وكىنىشكە قاراي, جەرگىلىكتى اتقارۋشى ورگانداردىڭ بارلىعى بىردەي اۆياتسيالىق قىزمەتتەردىڭ بىرىڭعاي وپەراتورىمەن كەلىسىمشارت جاساسپاعان. ال ورمان شارۋاشىلىعى كوميتەتى «قازاۆياقۇتقارۋ» مەكەمەسىمەن تەك 5 تەلىم بويىنشا عانا ءورت نۇكتەلەرى مەن ورماندى پاترۋلدەۋ كەلىسىمشارتتارىن جاساعان. بۇل باعىتتاعى جۇمىستار جالعاسىپ جاتىر. مامىر ايىنىڭ قورىتىندىسى بويىنشا تاعى ۇسىنىمدار بەرەمىز», دەدى يۋري يلين.
ايانا توعانبەك