بيىك كىسى...

نۇرنيازدىڭ تۋعان جەرى اقتوبە وبلىسى بايعانين اۋدانى. ول بالا كەزىنەن اكەسى مۇحاننىڭ زەرگەرلىگىن, ۇستالىعىن, انشىلىگىن, كۇيشىلىگىن كورىپ ءوستى. اكەسىنىڭ كۇنۇزاق زەرگەرلىكپەن جالىقپاي اينالىسقانىنا تالاي كۋا بولدى. نۇرنياز بالا كەزىنەن انگە جاقىن بولدى. ەكىنشى مە, الدە ءۇشىنشى سىنىپتا وقىپ جۇرگەندە راديودان مۇرات احماديەۆتىڭ «اسپاندا كۇن سونبەسىن» انىنە تاڭ قالدى. ول از دەگەندەي روبەرتينو لورەتتي دەگەن بالانىڭ ءانى ونىڭ ارمانى بولدى. روبەرتينو... لورەتتيدىڭ سىزىلىپ سالعان ءانى – «و, سوليا ميا» ... قازاقشاسى «كۇنىم مەنىڭ» ەكەن... بىردە نۇرەكەڭ وسى روبەرتينو جايلى حاباردى ەستىدى. نەتكەن داۋىس...نەتكەن اۋەزدى اۋەن...ءدال وسى نۇراشتىڭ اۋىلىندا وسكەن بالا ىسپەتتى...كەيدە وسى روبەرتينو ءوزىنىڭ جان دوسى سياقتى بولىپ تۇرادى. نۇرنياز ەندى قيالعا بەرىلدى. «بولماساڭ دا ۇقساپ باق, ءبىر جاقسىنى كورسەڭىز» دەگەندى تۇيسىگىمەن, تانىمەن سەزىندى. وسىنداي كۇندەردىڭ بىرىندە اۋدان ورتالىعى بايعانينگە ايگىلى كومپوزيتور باكىر تاجىباەۆ كەلە قالعان. بۇل باكىر اعانىڭ دۇرىلدەپ تۇرعان شاعى. باكىر تاجىباەۆ بالا نۇرنيازدىڭ ايتقان «اق ماڭدايلىم» ءانىن تىڭدادى. شىنى كەرەك, بالا نۇرنيازدىڭ ءۇنى تاۋ ىشىندەگى تاڭعى وزەننىڭ شۋىلىنداي شىرىلداپ تۇرعان كەزى. بۇل كەزەڭ كەز كەلگەن جاس بالانىڭ داۋسىنىڭ وزگەرە قويماعان ءمولدىر شاعى. ونىڭ ۇستىنە نۇرنياز ءان سالعاندا جانىمەن ايتادى. ارقاسى قوزىپ, جەلكە تۇسى كۇدىرلەنىپ كەتەدى. مۇندايدى قازاق «ارقاسى بار» دەيدى. نۇرنيازدىڭ دا ءان سالعاندا وسى ارقاسى ۇستايتىن.

«اق ماڭدايلىم» قازاق ەلىنىڭ بۇلب ۇلى روزا باعلانوۆانىڭ ورىنداۋىنداعى ءشامشىنىڭ ءانى جانە ول قيىن شىعارما. كوشەدەگى كىم كورىنگەن ايتا المايدى. وعان داۋىستىڭ كۇشى عانا ەمەس دياپازونى دا قاجەت. اسىرەسە قايىرماسى بىرنەشە وكتاۆادان تۇرادى:

اينالدىم, اق ماڭدايلىم,

اقىلدىم, بال تاڭدايلىم

جالىندا جاس داۋرەندە,

ۇيالما, «جان ساۋلەم!» دە,

جاقسىلىقتىڭ جوق, ساۋلەم,

ەرتە-كەشى,

جادىراشى, نازدانشى, ەركەلەشى.

اقىن مۇزافار الىمباەۆتىڭ ءسوزى دە ەرەكشە عوي. نۇرنياز وسى ءاندى ەرەكشە جاقسى كورەتىن. اسىرەسە «اقىلدىم, بال تاڭدايلىم» دەگەن جولدارعا ەرەكشە ەكپىن بەرەدى. بۇل بالا جىگىتتىڭ جان-تەرەزەسىن قاعىپ تۇرعان ونەر سيقىرى بولاتىن. كونتسەرتتەن سوڭ باكىر تاجىباەۆ نۇرنيازدى قاسىنا شاقىرىپ الىپ سويلەسكەن, اعالىق مەيىرىممەن قۇشاعىنا باسقان. بالا مۇحانوۆتىڭ ەسى ەكەۋ, ءتۇسى تورتەۋ بولدى. الماتىدان كەلگەن اقىن اعا, كومپوزيتور كوكەنىڭ ءوزى مۇنىڭ داۋسىنا ءتانتى بولعان. بەۋ-بەۋ... نۇرنياز العاش رەت الماتىدا انشىلەردى وقىتاتىن, دايىندايتىن وقۋ ورنى بار ەكەنىن, ونىڭ «كونسەرۆاتوريا» دەپ اتالاتىنىن وسى اعادان ەستىدى.

الماتى تۇرماق اقتوبەنى ومىرىندە ءبىر-اق رەت كورگەن نۇرنياز مەكتەپ بىتىرگەن سوڭ استاناعا بەت الدى. نۇرە­كەڭ وقۋ بىتىرگەن جىلى بۇكىل كەڭەس مەم­لەكەتىندەگى 10-شى جانە 11-ءشى سى­نىپ تۇلەكتەرى مەكتەپتى بىرگە ءبىتىردى. ياعني وقۋعا تۇسەتىن ابيتۋريەنتتەر ەكى ەسەگە كوبەيگەن كەز ەدى. باعى جانىپ نۇرەكەڭ كونسەرۆاتوريانىڭ ۆوكالدىق بولىمىنە قابىلدانادى. ءيا. ءيا. بىراق 1-كۋرسقا ەمەس دايىندىق بولىمىنە. بۇل دە­گەنىڭىز ارنايى ءبىلىمى جوق جاستار 2 جىل وسى دايىندىقتا وقىپ, مۋزىكالىق ساۋات اشىپ دايىندالۋ كەرەك دەگەن ءسوز. ومىرىندە فورتەپيانونى العاش رەت كورگەن جاس جىگىتكە الماتىدا ءبارى قىزىق بولدى. ءوزى دە مودادان قال­ماي بۇتىنا «كلەشش» شالبار, ۇستىنە باللون پلاشش كيگەنىندە «گورودسكوي» بولىپ شىعا كەلدى.

ول «پودكۋرستان» وقۋعا تۇسسە دە ارمياعا الىپ كەتەتىنىن ءبىلدى. بۇل ەندى نۇرەكەڭنىڭ توبەسىنەن جاي تۇسكەندەي بولدى. ءوستىپ جۇرگەندە ورىسشا شىعاتىن «ۆەچەرنيايا الما-اتا» گازەتىنەن ءبىر حابارلامانى كوزى شالىپ قالعان: كەڭەس ۇكىمەتىنىڭ 50 جىلدىق مەرەيتويىنا وراي بۇدان بىلاي كەڭەس وداعىندا اۋىل شارۋاشىلىق ينستيتۋتىنىڭ ستۋدەنتتەرىن وقۋ بىتىرگەنشە ارمياعا المايدى ەكەن. كۇندىز تۇرماق, سىرتتاي وقيتىنداردى دا. ءماا... «ىزدەگەنگە سۇراعان» دەگەن وسى شىعار...

كوپ ۇزاماي نۇرنياز مۇحانوۆ اۋىل شارۋاشىلىق ينستيتۋتىنىڭ, ياعني سحي-دىڭ «پوچۆەننايا اگروحيميا» دەگەن فاكۋلتەتىنىڭ سىرتتاي وقيتىن ستۋدەنتى بولىپ شىعا كەلدى. ساباق باستالىپ كەتتى. ستۋدەنتتىك قىزىق كەزەڭ. ۋاقىت وتە بەردى. اۋىلدان كەتكەنىنە دە 5-6 اي ءوتىپ كەتتى. دوستارىن دا, اسىرەسە اناسىن, اعالارىن قاتتى ساعىندى. ساعىنباي شە؟ نۇرنياز اكەسىنەن 13-ىندە قالعان. جەتىم كوڭىل سوندىقتان دا اناسىن, اعا-باۋىرلارىن قاتتى ساعىنادى. قىسقاسى, جەلتوقساندا اۋىلعا تارتتى. اۋىلعا بارعاندا ەستىگەن جاڭالىعى وسى اۋدان ورتالىعىندا جاڭا اۆتوبازا اشىلادى ەكەن. قول قۋسىرىپ وتىراتىن نۇرنياز با؟ الماتىداعى وقۋىن جالعاستىرۋدى قويدى دا, ءۇش اي وقىپ شوفەردىڭ پراۆوسىن العان كۇنى اۋىلعا كەلگەن جاڭا بەس ماشينانىڭ بىرىنە وتىردى. مىنە...نۇرنياز مۇحانوۆتىڭ ەڭبەك جولى وسىلاي باستالعان...استىندا جاڭا ماشينا...

كوپ ۇزاماي اقتوبەدە «مولودىە تا­لانتى» اتتى وبلىستىق كونكۋرسقا قاتى­سىپ, ديپلومعا يە بولدى. لاۋرەاتتاردى الماتىعا شاقىردى. نۇرەكەڭدى تاعدىر تاعى دا ونەر الەمىنە سۇيرەپ الىپ كەلدى. بىراق بۇل جولى جاس جىگىت وپەرا ستۋدياسىنا بارۋعا بەل بۋدى. بارماي شە؟ كەشەگى ءوزىن جاقسى تانيتىن پروفەسسور بەكەن جىلىسباەۆ شاقىرسا نەگە بارماسقا؟ نۇرەكەڭ وسىلاي مۋزىكا الەمىنە, ونەر كولىنە ەنە بەردى. وپەرا ستۋدياسى ەكى جىلدىق بولعانىمەن ۋاقىت جەتپەيدى. كۇندە كەشكە وپەرا تەاترىنداعى سپەكتاكلدەرگە ماسسوۆكاعا, ياعني كوپشىلىك ساحناسىنا حورعا قاتىسادى. كاۋكەن كەنجەتاەۆ, بيبىگۇل تولەگەنوۆا, روزا جامانوۆا, الىبەك دىنىشەۆ, حورلان قاليلامبەكوۆا, ءمۇسىلىم, ريشات ابدۋ­ليندەر, مايرا ايمانوۆا, قۇرمانبەك جان­دار­بەكوۆ سىندى اتى اڭىزعا اينالعان تۇلعا­لارمەن ءبىر ساحنادا بولۋدىڭ ءساتى ءتۇستى. بۇل كەز اباي اتىنداعى وپەرا جانە بالەت تەاترىنىڭ التىن كەزى-ءتىن. ساحنادا ا.جۇبانوۆتىڭ «اباي», ە.برۋ­سيلوۆسكيدىڭ «قىز-جىبەك», «جال­بىر», «ەر تارعىن» م.تولەباەۆتىڭ ء«بىر­جان-سارا», ق.كوجامياروۆتىڭ «نازۋ­گۋم», ي.چايكوۆسكيدىڭ «ەۆگەني ونەگين», «دەمون», «چيو-چيو سان», «داي­­سي» ە.راحماديەۆتىڭ «قامار سۇ­لۋ», ع.جۇبانوۆانىڭ «جۇمباق قىز», م.تولەباەۆ پەن ە.برۋسيلوۆسكيدىڭ «امانگەلدى» سىندى اتاقتى شىعارما­لارىنىڭ ايگىلى ساحنادا ءجۇرىپ جاتقان كەزى. اۋىلدان كەلگەن نۇرنياز ءۇشىن بۇل ۇلكەن مەكتەپ بولدى. شىن ءومىردىڭ, حاس تالانتتاردىڭ قانداي بولۋ كەرەك ەكەنىن ول وسى كەزدە ءتۇسىندى.

وقۋعا تۇسكەن بالالاردى وپەرا ستۋ­ديا­سىندا ايىنا ءبىر رەت فونياتر قا­رايدى. بىرەۋدىڭ تاماعى اۋىرىپ قالسا دارى­گەردەن بۇرىن وسى فونياترعا بارادى. نۇرنياز بۇل كەزدە وپەرا تەاترىنا عانا قاتىسىپ قويمايدى. كەز كەلگەن كەشتىڭ, جيىن-تويدىڭ قادىرلى قوناعى. تۇپ-تۇنىق تەنور داۋسىمەن يتاليانىڭ وپەرا اريالارىنان باستاپ, ورىسشا, قازاقشا اندەردى شىرقايدى. كۇندىز-ءتۇنى داۋىسىنا تىنىم جوق. وسىنداي كۇندەردىڭ بىرىندە تاماعى اۋىرعان. «سۋىق تيگەن بولار» دەپ العاشىندا ول ءمان بەرمەگەن. الايدا تاماعى اۋىرا بەرگەنى قويمادى. فونياتر اپايى مۇقيات قارادى. باسىن شايقاپ ۇزاق وتىردى. بىردەڭە ايتۋعا باتپاي وتىرعان سىڭايى بار. ۇققانى نۇرنيازدىڭ تاماعىندا, جەلبەزەگىندە ىسىك پايدا بولىپتى. وپەراتسياعا كون­بەيتىن ىسىك ەكەن. نە ىستەۋ كەرەك؟ قا­زىر ەمدەلمەسە جامان اۋرۋعا دا ۇلاسىپ كەتۋى مۇمكىن. سوندىقتان ءان ايتۋدى دوعارۋ قاجەت. نۇرنياز شاراسىزدىقتان نە ىستەرىن بىلمەدى. بۇل بۇكىل ارمانىنا, ەرتەڭىنە, جوسپارىنا, بولاشاعىنا نۇكتە قويۋ, ياعني ونەردى تاستاۋ دەگەن ءسوز. نۇرنياز ءبارىن اقىلمەن ۇقسا دا كوڭىلمەن, جۇرەگىمەن سەنە المادى. تالاي ءتۇندى ۇيقىسىز وتكىزدى, جاستىعىن جاسقا شىلاپ تالاي تاڭدى اتىردى...

نۇرنياز قانشا قينالسا دا اۋىلعا قايتىپ كەلدى. جولداس-جورا, اعايىن-تۋمانىڭ ىشىندە جان جاراسى بىرتە-بىرتە ازايعان. الايدا ونەر اتتى وزەنگە ءبىر تۇسكەن ادام جاعالاۋدان ۇزاپ كەتە المايدى. شوپىر جىگىت ەندى شىمكەنتتەگى مادەني-اعارتۋ ينستيتۋتىنا بارىپ ءتۇستى. كونسەرۆاتوريادا ءجۇرىپ پودكۋرستا, وپەرا ستۋدياسىندا وقىعان, اكادەميالىق وپەرا-بالەت تەاترىنىڭ ساحناسىنا تالاي شىققان ساقا ابيتۋريەنتتى «كۋلت پروسۆەت» قۋانا قارسى الدى. مۇحانوۆ وسىندا وقىپ ءجۇرىپ بوتاگوز ەسىمدى قىزعا ۇيلەندى. ءوزى ايتقان «بوتاگوزدى» جازعان دا, العان دا مۇحانوۆ ەدى. بالا-شاعالى بولدى. ۋاقىت زۋ ەتىپ وتە بەردى. ول وقۋ بىتىرگەن جىلى گۋرەۆ وبلىسى ەكىگە ءبولىنىپ, ءبىرى – گۋرەۆ, ەكىنشىسى – ماڭعىستاۋ وبلىسى بولىپ اشىلدى. جاڭا وبلىسقا جاس كادر­لار كەرەك ەدى. نۇرنياز بىردەن وبلىستىق ونمس – وبلىستىق شىعارماشىلىق ورتالىعىنىڭ ديرەكتورى بولىپ تا­عايىن­دالدى. جاس جىگىت بۇل جەردە تابانى كۇرەكتەي 17 جىل ەڭبەك ەتتى. كەيىن ماڭعىستاۋ وبلىسى 1987 جىلى جابىلىپ قايتا گۋرەۆكە كوشكەندە مۇحانوۆ وبلىس ورتالىعىنا بارماي قالدى. وبلىس ورتالىعى كوشكەنىمەن قۋىرشاق تەاترى قالدى. ول وسى ورىس قۋىرشاق تەاترىنا ديرەكتوردىڭ ورىنباسارى بولدى. ىلە الماتىعا بارىپ قۋىرشاق تەاترىنا كىرە الماي جۇرگەن بەس بالانى شەۆچەنكو قالاسىنا شاقىرىپ, وسى ورىس قۋىرشاق تەاترىنىڭ جانىنان قازاق ترۋپپاسىن اشتى. بۇل ونىڭ ۇلتجاندى ەكەنىنىڭ دالەلى ەدى. كوپ ۇزاماي جاس جىگىتتى ەرالى اۋدانىنىڭ مادەنيەت ءبولىمىن باسقارۋعا شاقىردى. نۇرنياز مۇحانوۆ بۇل جەردە دە ۇشان-تەڭىز جۇمىس ىستەدى. الدىمەن ءوزى مۇرىندىق بولىپ ماڭعىستاۋ ءوڭىرىنىڭ كۇيلەرىن, سونان سوڭ اندەرىن نوتاعا ءتۇسىردى دە رەسپۋبليكاداعى بارلىق مۋزىكا ۋچيليششەلەرگە تاراتتى. ارينە, بۇل مادەنيەت مينيسترلىگىنىڭ جۇمىسى. ال ءبىزدىڭ مۇحانوۆ وسىعان ءبىر تيىن الماي ءوزى اتقاردى. كوپ ۇزاماي ۇلت-اسپاپتىق «ماڭعىستاۋ مارجاندارى» ءانسامبلىن قۇردى. وركەستردىڭ دومبىرا, شەرتەر, اساتاياق, شاڭقوبىز, سىرناي, جەتىگەن سياقتى اسپاپتارىن الماتىدان ءوزى الىپ كەلدى. وندا دا ءبارى شىن شەبەردىڭ قولىنان شىققان سۋ جاڭا اسپاپتار بولاتىن. شەتەلدىك ماتەريالدان تىككەن كوستيۋم كيگەن اۋىلدىڭ 40 ارتىسىنەن قۇرالعان وركەستر ساحناعا شىعا كەلگەندە جۇرت تاڭ قالىستى. نۇرنياز مۇحانوۆتىڭ اشقان ءانسامبلى كەڭەس وداعىنىڭ اتىنان الجيردە ونەر كورسەتكەن. سول سەبەپتى شىعار نۇرنياز مۇحانوۆ موسكۆاعا ارنايى شاقىرىلىپ مادەنيەت ءمينيسترى س.دەميچەۆتىڭ قولىنان «مادەنيەت ۇزدىگى» ءتوس بەلگىسىن الدى. قازاقستاندا ەكى ادامعا بەرىلگەن «مادەنيەتكە ەڭبەك سىڭىرگەن قايراتكەر» اتاعىنا دا يە بولدى. بۇل نۇرنياز مۇحانوۆتىڭ ادال ەڭبەگىنىڭ جەمىسى بولاتىن. وسى كەزەڭدەردە نۇرەكەڭ ەل ءىشىن ارالاپ ءجۇرىپ قول ونەرىن, اسىرەسە زەرگەرلىك بۇيىمداردى جيناي باستادى. بەرىسى باتىس قازاقستاننان باستاپ, سوناۋ وزبەكستانداعى قاراقالپاق, ءتىپتى تاجىك اعايىندارىنان جوعالىپ بارا جاتقان كونە بۇيىمداردى ىزدەپ جيناپ ءجۇردى.

نۇرەكەڭ ماڭعىستاۋ وبلىسى بولىپ قايتا اشىلعاندا وسى ءوڭىردىڭ مادەنيەت سالاسىن ۇزاق جىل باسقاردى. بۇل قازاقستاننىڭ تاۋەلسىز ەل اتانعان كەزى ەدى. وبلىستار ورتالىقتارىندا بىرىنەن سوڭ ءبىرى قازاق ءتىلى قوعامدارى, گازەت-جۋرنالدار جانە تەاترلار اشىلىپ جاتقان بولاتىن. ەلباسى ن.نازارباەۆتىڭ ماڭعىستاۋعا كەزەكتى ساپارىندا قازاق تەاتر­ىن اشۋ ماسەلەسى كوتەرىلدى. «نەگە تەاتر اشپايسىڭدار؟» دەگەن سۇراققا وبلىس باسشىسى: ء«بىزدىڭ كورەرمەن دايىن ەمەس» دەگەن. پرەزيدەنت قولىن ءبىر-اق سىلتەپ: «تەاتر اشىلسىن» دەدى. پرەزيدەنت ايتتى, ءبىتتى, وبلىس اكىمىنەن باستاپ بارلىعى تەاتردى اشۋعا جۇمىلدىرىلدى. بۇل شارۋا دا «اتقا جەڭىل تەلپەكباي» مۇحانوۆقا جۇكتەلدى. قىسىلتاياڭ كەزدە «بارماق باستى, كوز قىستى» بولىپ ساتىلىپ كەتكەن كينوتەاتردىڭ عيماراتىن قايتارۋ كەرەك ەدى. كەزىندە «بەس تيىنعا» ساتىلعان عيماراتتى اكىمدىك قايتا ساتىپ الۋعا ءماجبۇر بولدى. نۇرنياز جوندەۋ جۇمىسىنان باستاپ كادر ماسەلەسىمەن دە اينالىستى. اقتاۋدا اكتەر, رەجيس­سەر دەگەن اتىمەن جوق. نۇرەكەڭ الىپ-ۇشىپ الماتىداعى ت.جۇرگەنوۆ اتىن­داعى ونەر اكادەمياسىنا تارتتى. پرو­فەسسور مامان بايسەركەنوۆپەن اقىل­داستى. ول اكتەرلىك قۇرامعا 3-كۋرستىڭ ستۋدەنتتەرىن, ال رەجيسسەرگە جاڭا عانا ءبىتىرىپ كوكشەتاۋعا كەتكەن گۇلسينا مەر­عاليەۆا مەن گۇل زياتوۆانى ۇسىن­دى. الدىنا قويعان ماقساتىنا جەتپەي قويمايتىن مۇحانوۆ كوكشەتاۋ قالا­سىنا انا ەكى قىزدى ىزدەپ كەلدى. نۇرە­كەڭ گۇلسينانى اقتاۋعا شاقىردى. «پاتە­رىڭدى بەرەم, جاعدايىڭدى جاسايمىن, ەڭ نەگىزگىسى بۇل – سەنىڭ ءوز تەاترىڭ بولادى» دەگەندە قىزدار كوندى. كەلگەن سوڭ نۇرەكەڭ تەاترداعى بارلىق ارتىستەرگە دە, جۇمىسشىلارعا دا بار جاعدايىن جاساپ بەردى. پاتەرلەرىن الىپ بەردى. ءتىپتى باس رەجيسسەر گۇلسينانىڭ اكە-شەشەسىن سوناۋ سامارادان كوشىرىپ اكەلىپ, ەكى قابات­تى ەكى ءۇي الىپ بەرۋگە قولۇشىن بەردى.

نۇرنياز مۇحانوۆ ءارى وبلىستىڭ مادەنيەت ءبولىمىن باسقارا وتىرىپ, ديرەكتورلىق قىزمەتتى قوسا اتقارىپ ءجۇرىپ تەاتردى اياعىنان تۇرعىزدى. ساحنانىڭ شتانكەتىنەن باستاپ, كيىم تىگۋ, بۋتافور جاساۋ, جارىق, مۋزىكا دەگەندەردىڭ ءبارىن ءوزى قاداعالاپ وتىردى. اسىرەسە اكتەرلەردەن باستاپ تەحنيكالىق بولىمدەگى مامانداردى الماتىداعى ت.جۇرگەنوۆ اكادەمياسىنا 6 ايلىق كۋرسقا جىبەرىپ وقىتقىزدى. بۇل مۇحانوۆتىڭ تاڭنىڭ اتىسى, ءتۇننىڭ ورتاسىنا دەيىنگى ەڭبەگى – ناعىز فاناتيزم ەدى. ونەرگە دەگەن ماحاببات, ساحناعا دەگەن ساعىنىش, ەڭ باستىسى – نۇرنيازدىڭ العا قويعان ماقساتىنا قالاي دا جەتۋ قاعيداسى, ادامي ورەسىنىڭ بيىكتىگى ەدى.

نۇرنياز مۇحانوۆ بۇگىنگى تاڭداعى قازاق ونەرىندە ءوز ورنى بار ۇلكەن تۇلعا. ونىڭ ەڭبەگى تەك ماڭعىستاۋ وڭىرىنە عانا ەمەس, بۇكىل قازاقستانعا ورتاق. اسى­رە­سە ءجيى وتكىزىلىپ جۇرگەن كاسپي تەڭىزى ماڭىنداعى مەملەكەتتەردىڭ حالىق­ارالىق تەاتر فەستيۆالى دە ونىڭ ەڭبەگى. نۇرەكەڭ سونىمەن بىرگە جاس تەاترعا قازاق ونەرىنىڭ دارا تۇلعاسى نۇرمۇحان ءجانتوريننىڭ اتىن الىپ بەرۋگە دە زور ەڭبەك سىڭىرگەن. وسىندايدا ءسابيرا مايقانوۆا, ىدىرىس نوعايباەۆ, مۇحتار باقتىگەرەەۆ, ءسابيرا ساتتاروۆا, فاريزا ءشارىپوۆا سىندى و دۇنيەلىك بولعان دارىندىلارعا ءدال نۇرنياز مۇحانوۆتاي دارىندى ءىنى بەرمەگەنىنە قىنجىلاسىڭ.

مەن نۇرەكەڭدى وتكەن جولى كوردىم. ەكەۋمىز شاي ىشتىك. ول قالجىڭداپ قويادى. الايدا قاباعىندا رەنىش, كوزىندە مۇڭ بارداي سەزىلدى...زىمىراعان ۋاقىت-اي...نۇرەكەڭنىڭ قوپ-قويۋ قارا شاشى اعارىپ كەتىپتى.

تالعات تەمەنوۆ,

قازاقستاننىڭ حالىق ءارتىسى, كينو جانە تەاتر رەجيسسەرى