رەسەيلىكتەر ءپۋتيندى قولداۋعا دايىن
ەگەر تاياۋ ارادا رەسەيدە پرەزيدەنتتىك سايلاۋ وتەر بولسا, وندا ۆلاديمير پۋتين سەنىمدى جەڭىسكە جەتكەن بولار ەدى. بۇل تۋرالى «لەۆادا-تسەنتر» وتكىزگەن ساۋالداما ناتيجەلەرى ءمالىم ەتەدى. پارلامەنتتىك سايلاۋدا دا بيلەۋشى پارتيا ۇلكەن باسىمدىقپەن جەڭىسكە جەتەدى ەكەن.
الەۋمەتتانۋشىلاردىڭ دەرەكتەرىنە سۇيەنسەك, پۋتينگە رەسەيلىكتەردىڭ 77 پايىزى ءوز داۋىستارىن بەرەتىندەرى ايقىندالعان. رەسەي كوممۋنيستەرىنىڭ سەركەسى گەننادي زيۋگانوۆتى سۇراۋ سالىنعانداردىڭ 9 پايىزى قولداۋعا دايىن ەكەن. ال رەسەي ليبەرال-دەموكراتتارىنىڭ كوسەمى ۆلاديمير جيرينوۆسكي 5 پايىز داۋىستى قاناعات تۇتۋعا ءماجبۇر بولاتىن كورىنەدى. سۇرالعانداردىڭ 18 پايىزى كىمگە داۋىس بەرەتىندەرىن ناقتى بىلمەسە, 10 پايىزى سايلاۋدان باس تارتاتىندارىن مالىمدەگەن.
كۆەبەككە تاۋەلسىزدىكتىڭ اۋىلى الىس
كانادانىڭ كۆەبەگىندە 7 ساۋىردە پروۆينتسيانىڭ زاڭ شىعارۋشى جينالىسىنا سايلاۋ بولىپ ءوتتى. الدىن الا مالىمەتتەرگە قاراعاندا, سايلاۋدا ليبەرالدار جەڭىسكە جەتەتىن سەكىلدى. ءسويتىپ, سايلاۋشىلار سەپاراتيستىك باعدارلامالارىن جۇزەگە اسىرماق بولعان بيلىكتەگى كۆەبەك پارتياسىن قولداماي تاستادى.
بۇل پارتيانىڭ بيلىكتى جوعالتۋى فرانتسۋز ءتىلدى پروۆينتسيانىڭ كانادا قۇرامىنان شىعۋ بويىنشا رەفەرەندۋم وتكىزۋ ماسەلەسىن كۇن تارتىبىنەن الىپ تاستايدى. داۋىس ساناۋداعى سوڭعى دەرەكتەرگە سۇيەنسەك, ليبەرالدار 125 سايلاۋ وكرۋگىنىڭ 70-ىندە كوش باستاپ كەلەدى ەكەن. ال كۆەبەك پارتياسى بار-جوعى 31 وكرۋگتە الدا تۇرعان كورىنەدى. قالعان وكرۋگتەردە شاعىنداۋ پارتيالاردىڭ وكىلدەرى جەڭىسكە جەتەتىنى دە بەلگىلى بولىپ وتىر.
يتاليالىق ديپلومات بالا ساۋدالاعان با؟
ءفيليپپيننىڭ پوليتسياسى يتاليانىڭ تۇرىكمەنستانداعى توتەنشە جانە وكىلەتتى ەلشىسى دانيەلە بوزيوعا قاتىستى كامەلەتكە تولماعانداردى قورعاۋ تۋرالى زاڭدى بۇزدى دەگەن ايىپتى ىلگەرىلەتتى. بۇل تۋرالى كەشە «رەيتەر» اگەنتتىگى حابارلادى. تەرگەۋدىڭ دەرەكتەرى بويىنشا فيليپپيندە دەمالىسىن وتكىزىپ جاتقان 46 جاستاعى بوزيونىڭ بالا ساۋداسىنا قاتىسى بار كورىنەدى.
يتاليالىق ديپلومات بۇرناعى كۇنى لاگۋنا پروۆينتسياسىندا قاماۋعا الىنسا كەرەك. بۇل تۋرالى ەندى «اسسوشەيتەد پرەسس» اگەنتتىگى اقپارات تاراتتى. بوزيو 9 بەن 12 جاس ارالىعىنداعى 3 قاڭعىباس بالانىڭ ورتاسىنان تابىلىپتى. الايدا, ەلشىنىڭ قاي جەردە ۇستالعانى تۋرالى ناقتى مالىمەت جوق. كەيبىر مالىمەتتەر بويىنشا ول جالدامالى پاتەردە نەمەسە قوناقۇيدەگى نومىردە, ءتىپتى بولماسا بالالار وينايتىن الاڭدا بولعان سەكىلدى. ءىس-ارەكەتى كۇدىكتى كورىنگەن بوزيونىڭ ۇستالۋىنا قۇقىق قورعاۋشىلار ىقپال ەتىپتى.
سنوۋدەن ريدەناۋر سىيلىعىن الدى
امەريكا ارنايى قىزمەتىنىڭ بۇرىنعى قىزمەتكەرى ەدۆارد سنوۋدەنگە «شىندىعى ءۇشىن» نوميناتسياسىنداعى ريدەناۋر سىيلىعى بەرىلدى. بۇل جونىندە ماراپاتتىڭ رەسمي سايتىندا ايتىلادى. امەريكا ارنايى قىزمەتىنىڭ سوراقى ءىس-ارەكەتىن جالعانعا جاريا ەتكەن سنوۋدەن بۇگىندە اقش بيلىگىنەن جاسىرىنىپ ءجۇر.
ال وعان اقش تاراپى شپيوندىق جاسادى دەگەن ايىپ تاققان بولاتىن. قازىرگى كەزدە ول رەسەيدە تۇرىپ جاتىر. سنوۋدەنگە 2013 جىلدىڭ تامىزىندا رەسەي اۋماعىندا 1 جىلعا ۋاقىتشا تۇرۋعا رۇقسات بەرىلگەن بولاتىن. ال ماراپاتتىڭ قۇرىلتايشىسى امەريكانىڭ «ۇلتتار ينستيتۋتى» مەن «فەرتەل قورى» بولىپ تابىلادى. ماراپات جۋرناليست رون ريدەناۋردىڭ قۇرمەتىنە سولاي دەپ اتالادى. ول اقش اسكەريلەرىنىڭ ۆەتنامدا بەيبىت تۇرعىنداردى ءولتىرۋىن زەرتتەۋ ناتيجەسى ارقىلى تانىمال بولعان ەدى.
قاراباق «مايدانىندا» شىعىن بار
بۇرناعى كۇنى ازەربايجاندىق جانە قاراباقتىق اسكەريلەر تۇيىسەتىن شەپتە مينا جارىلعان. وقيعا سالدارىنان 3 ازەربايجاندىق اسكەري قىزمەتكەر قازا تاپقان. جارىلىسقا جاقىن جەردە جۇرگەن باسقا اسكەريلەر ءتۇرلى دەنە جاراقاتتارىن العان. زارداپ شەككەندەر تۋرالى مالىمەت ءارتۇرلى. كەيبىر دەرەك كوزدەرى 6 سولدات جارالانعان دەسە, ەكىنشىلەرى 8 سولدات دەگەندى كولدەنەڭ تارتادى.
زارداپ شەككەندەر فيزۋلي اۋدانىنداعى اسكەري گوسپيتالعا جەتكىزىلىپتى. اسا اۋار جاراقاتتانعان ءبىر اسكەري قىزمەتكەر باكۋگە تىكۇشاقپەن اپارىلعان. وقيعا ورنىنا ازەربايجاننىڭ قورعانىس مينيسترى زاكير گاسانوۆ تا كەلىپ كەتكەن كورىنەدى.ال تاۋلى قاراباقتىڭ 20 جىلدان استام ۋاقىتتان بەرى جانجال ايماعى بولىپ وتىرعانى ءمالىم. 1990-جىلداردىڭ باسىندا ءوڭىردىڭ ارمياندار كوپ تۇراتىن بولىگى ازەربايجاننان تاۋەلسىزدىگىن جاريالاعان بولاتىن. ال ءتۇيىسۋ شەبىندە وقتىن-وقتىن وسىنداي وقيعالار ورىن الىپ تۇراتىنى تۇسىنىكتى بولسا كەرەك.
كەيدە تايسونعا دا كومەك كەرەك
بوكستان اسا اۋىر سالماقتاعى بۇرىنعى ءابسوليۋتتى الەم چەمپيونى مايك تايسونعا ءوزى قولتاڭبا بەرگەن شارانى تاستاپ شىعۋ ءۇشىن 12 كۇزەتشىنىڭ كومەگى قاجەت بولعان. بوكسشىنىڭ فاناتتارىمەن كەزدەسۋى اقش-تىڭ نيۋ-يورك قالاسىنداعى ساۋدا ورتالىعىندا ۇيىمداستىرىلسا كەرەك. شاراعا ەۆاندەر حوليفيلد, رەي لەونارد, روبەرتو ديۋران جانە توماس حەرنس سەكىلدى بۇرىنعى چەمپيوندار دا قاتىسىپتى.
كەزدەسۋگە شامامەن 700 ادام جينالىپتى. تايسونمەن سۋرەتكە تۇسكىسى كەلەتىندەر 149 دوللار تولەۋگە ءتيىس بولىپتى. بۇدان بولەك, جانكۇيەرلەرگە قۇنى 2000 دوللار تۇراتىن VIP-پاكەت تە ساتىلعان.ونى ساتىپ العاندارعا جوعارىدا اتالعان 5 بوكسشىمەن ءبىر مەزگىلدە ۋاقىت وتكىزۋگە مۇمكىندىك بەرىلىپتى. ەندى تايسونعا كەلسەك, ول كاسىبي رينگتە 58 كەزدەسۋ وتكىزسە, سونىڭ 50-ىندە جەڭىسكە جەتكەن (44-ءىن نوكاۋتپەن), 6 رەت جەڭىلسە, 2 كەزدەسۋىن تەڭ اياقتاعان.
قىسقا قايىرىپ ايتقاندا:
بۇۇ-نىڭ ەسىرتكى جانە قىلمىستىلىق بويىنشا باسقارماسىنىڭ ەكى قىزمەتكەرى ءسوماليدىڭ گالكايو قالاسىنداعى اۋەجايدا اتىپ ءولتىرىلگەن. ولار فرانتسيانىڭ جانە ۇلىبريتانيانىڭ ازاماتتارى ەكەن. بۇۇ وكىلدەرى ۇشاقتان ءتۇسىپ كەلە جاتقان كەزدە وققا ۇشقان. بۇۇ-نىڭ سوماليدەگى ارنايى وكىلى نيكولاس كەي باس ۇيىمنىڭ وكىلدەرىن ءولتىرگەندەرگە اياۋشىلىق جوق ەكەنىن مالىمدەدى.
رەسەيدىڭ ۆولگوگراد پەن پياتيگورسك قالالارىندا جاسالعان لاڭكەستىك ارەكەتتەر اشىلدى. بۇل تۋرالى فەدەرالدى قاۋىپسىزدىك قىزمەتىنىڭ ديرەكتورى الەكساندر بورتنيكوۆ ءمالىم ەتتى. پياتيگورسكىدەگى لاڭكەستىك وتكەن جىلدىڭ 27 جەلتوقسانىندا جاسالىپ, ءۇش ادام وپات بولسا, ۆولگوگرادتاعى 29, 30 جەلتوقسانداعى قوسارلانعان لاڭكەستىكتەردەن 34 ادام قازا تاپقان بولاتىن.
اقش-تىڭ كاليفورنيا شتاتىنداعى ستۋدەنتتىك كەش ءتارتىپسىزدىكتەرمەن جانە پوليتسيامەن قاقتىعىسپەن اياقتالعان. 100 شاقتى ادام تۇتقىندالسا, 44-ءى زارداپ شەككەن. كەشكە بارلىعى 15 مىڭنان استام ادام قاتىسىپتى. كوڭىل كوتەرۋ بارىسىندا جاستاردىڭ ءبىرى بوتەلكە تولى سومكەمەن پوليتسيا قىزمەتكەرىن ۇرعان. وسىدان كەيىن باسقا دا شاراعا قاتىسۋشى جاستار ءتارتىپ ساقشىلارىنا قارسى تاس لاقتىرعان. پوليتسيانىڭ بىرنەشە كولىگى زاقىمدانعان.
ينتەرنەت ماتەريالدارى نەگىزىندە ازىرلەندى.