ۇلىبريتانيا پرەمەر-ءمينيسترى بوريس دجونسون شەلەكتەپ توككەن ابىرويىن قايتادان قاسىقتاپ جيناي باستادى. اسىرەسە, رەسەيدىڭ ۋكرايناعا باسىپ كىرۋىنەن كەيىن تۋىنداعان حالىقارالىق داعدارىسقا قارسى ءىس-قيمىلى ونىڭ تۇماندى البيونداعى بەدەلىن ساقتاپ قالدى.
بىلتىرعى جەلتوقسان مەن بيىلعى قاڭتار بوريس دجونسون ءۇشىن وڭايعا تۇسكەن جوق. وعان لوكداۋن كەزىندە كارانتين تالاپتارىن بۇزدى دەپ ايىپ تاعىلدى. ءتىپتى, ونى حالىق قانا ەمەس, پارتيالاستارى دا سىنعا الىپ, كرەسلوسىن بوساتۋدى سۇراعاندار دا بولدى.
ماسەلە بىلاي باستالعان ەدى. بىلتىر, ياعني 2021 جىلعى 30 قاراشادا Daily Mirror باسىلىمى «داۋنينگ ءستريتتىڭ» كەيبىر قىزمەتكەرلەرىنىڭ كارانتين تالاپتارىن بۇزعانى تۋرالى اقپارات تاراتتى. ولار 2020 جىلعى قاراشا جانە جەلتوقسان ايلارىندا بىرنەشە سالتاناتتى كەشكە قاتىسقان ەكەن. سونداي جيىنداردىڭ بىرىنە پرەمەر-مينيستر بوريس دجونسوننىڭ دا كەلگەنى ايتىلدى.
ال سول ساتتە تۇماندى البيون تۇمشالانىپ, ۇلىبريتانيا قاتاڭ لوكداۋن جاعدايىندا بولاتىن. ەلدەگى دەنساۋلىق ساقتاۋ سالاسى ماماندارى قاتىسۋشىلار سانى 6 ادامنان اساتىن كەز كەلگەن باسقوسۋعا تىيىم سالدى. Daily Mirror-دە الگى ماقالا جاريالانعاننان كەيىن ب.دجونسون ءاردايىم كارانتين تالاپتارىن ساقتاپ جۇرەتىنىن العا تارتقان-دى. پرەمەر-ءمينيستردىڭ ءباسپاسوز قىزمەتى مۇنداي ءىس-شارانىڭ بولعانىن جوققا شىعاردى.
بىراق جاڭالىقتىڭ قۇلاعى قىلتيسا, ءتۇبىن كورگەنشە توقتامايتىن اعىلشىن باسىلىمدارى ىسكە كىرىستى. ءسويتتى دە, تۇماندى البيونداعى بۇقارالىق اقپارات قۇرالدارى «داۋنينگ ءستريتتىڭ» ماسەلەسىن مايشاممەن قاراۋعا كىرىستى. ماسەلەن, BBC اگەنتتىگى جەلتوقسانداعى باسقوسۋدا ىشىمدىك ءىشىلىپ, ويىن وينالعانىن حابارلادى. Financial Times گازەتى دە جيىننىڭ بولعانىن راستادى. The Guardian, Times باسىلىمدارى دا وقيعادان شەت قالعان جوق. اتالعان گازەتتەر وزدەرىنىڭ دەرەككوزدەرىنە سۇيەنىپ, كەشتىڭ قالاي وتكەنىن ەگجەي-تەگجەي جاريالادى.
لوكداۋن كەزىندە كەش وتكىزگەن دجونسوننىڭ ارەكەتى كوپشىلىككە ۇناعان جوق. ونسىز دا بەدەلدەن بەدەل قالماعان بوريس دجونسوننىڭ ابىرويى ايرانداي توگىلدى. مىسالى, ەلدە جۇرگىزىلگەن ساۋالدامالار قاڭتار كەزىندە ونى قولداۋ رەيتينگى 51 پايىزعا ءتۇسىپ كەتكەنىن كورسەتتى. ياعني قاتىسۋشىلاردىڭ 73 پايىزى دجونسونعا قارسىلىق بىلدىرسە, تەك 22 پايىزى عانا ونى قولدايتىنىن ايتقان.
سالىستىرىپ قارايتىن بولساق, 2021 جىلعى قىركۇيەك كەزىندە ونى جاقتاعاندار شامامەن 35-40 پايىزدى قۇرادى. قارسىلىق بىلدىرگەندەر 45-49 پايىز ارالىعىندا ەدى. ءسويتىپ دجونسوننىڭ قاڭتارداعى انتي-رەكوردى مارگارەت تەتچەردىڭ Community Charge سالىق قۇجاتى كەزىندەگى جانە گوردون براۋننىڭ جاھاندىق قارجىلىق داعدارىس كەزىندەگى رەيتينگىمەن تەڭەستى.
ۋكرايناداعى سوعىس بوريس دجونسوننىڭ بەدەلىن قالپىنا كەلتىرە باستادى دەسەك قاتەلەسپەيمىز. پرەمەر-ءمينيستردىڭ رەسمي تۇردە كيەۆكە بارۋى, ۋكرايناعا ءتۇرلى قارۋ-جاراق بەرۋى, ونداعى داعدارىستى شەشۋگە اتسالىسۋى اعىلشىنداردىڭ كوڭىلىنەن شىققانى انىق. سونىڭ ناتيجەسىندە دجونسوندى قولدايتىندار 29 پايىزعا دەيىن كوبەيگەن. Redfield & Wilton ساۋالداماسى پرەمەردى جاقتىرمايتىندار سانى 52 پايىزعا دەيىن ازايعانىن كورسەتىپ وتىر. دەگەنمەن ءالى دە اعىلشىنداردىڭ ۇكىمەت باسشىسىنا ءىشى جىلىماعانىن ايتا كەتكەن ءجون.
بۇكىل الەم كوروناۆيرۋس پاندەمياسىمەن باسى قاتىپ جاتقاندا دجونسوندى جاقتاعاندار سانى وعان قارسىلاردان الدەقايدا كوپ ەدى. بىراق مۇنداي ءسات ەندى كەلمەسكە كەتكەندەي. بۇعان دجونسوننىڭ ءوزى كىنالى. ماسەلەن, 7 جەلتوقساندا ITV ارناسى «داۋنينگ ءستريتتىڭ» ءباسپاسوز حاتشىسى اللەگرا ستراتتوننىڭ ارىپتەستەرىمەن روجدەستۆو كەشىن تويلاعانى تۋرالى ازىلدەسكەنى كورسەتىلگەن ۆيدەو جاريالادى.
وسىدان كەيىن اللەگرا ستراتتون ءوز ەركىمەن قىزمەتىنەن كەتتى. سونىمەن قاتار كەشكە قاتىسقان شون بەيلي دە لوندون اسسامبلەياسىنىڭ پوليتسيا جانە قىلمىس كوميتەتىنىڭ توراعاسى قىزمەتىنەن بوسادى. بيىلعى قاڭتاردا كارانتيندىك تالاپتار ساقتالماعان جيىندارعا 30-40 شەنەۋنىكتىڭ قاتىسقانى بەلگىلى بولدى.
بوريس دجونسون سودان سوڭ عانا باسقوسۋعا قاتىسقانىن راستاپ, كەشىرىم سۇرادى. سونىمەن قاتار ول حانزادا ءفيليپتىڭ جانازاسى شىعاردان ءبىر كۇن بۇرىن «داۋنينگ ستريتتە» كوڭىلدى جيىن وتكىزگەنى ءۇشىن دە پاتشايىم ەليزاۆەتا II-دەن عافۋ ءوتىندى. ول كەزدە دە انگليادا قاتاڭ لوكداۋن جاريالانعان ەدى. بۇل از دەسەڭىز, بۇكىل ەل كارانتين تالاپتارىنا مويىنسۇنىپ جۇرگەندە «داۋنينگ ستريت» بوريس دجونسوننىڭ تۋعان كۇنىن دۇركىرەتىپ تويلاپتى.
«داۋنينگ ستريتتەن» داۋ شىققان سوڭ انگليا پارلامەنتى وقيعانىڭ اق-قاراسىن انىقتاۋعا كىرىسكەن-ءدى. بۇل مىندەت مينيسترلەر كابينەتىنىڭ ەكىنشى تۇراقتى حاتشىسى سيۋ گرەيگە جۇكتەلدى. ءبىر ايعا سوزىلعان جۇمىس ناتيجەسىندە 31 قاڭتاردا سيۋ گرەي 11 بەتتىك الدىن الا قورىتىندى جاريالادى. قۇجاتقا سايكەس جيىننىڭ باسىم بولىگىندە كارانتيندىك تالاپتار ساقتالماعان. كەي باسقوسۋ ۇكىمەتتە جۇمىس ىستەيتىندەرگە ءتان ەمەس, ۇلىبريتانيا حالقىنىڭ ءۇمىتىن اقتاماعانى ايتىلعان. سونىمەن قاتار جۇمىس ۋاقىتىندا كوپ مولشەردە الكوگولدى ىشىمدىك ىشىلگەنى دە سىنعا الىندى.
قىسقاسى, سول كەزدە سيۋ گرەي «داۋنينگ ستريت» جىبەرگەن كەمشىلىكتەردى جىپكە ءتىزىپ شىققان ەدى. ەندى كوپ ۇزاماي سيۋ حانىم قورىتىندى ەسەپتى جاريالاۋى ءتيىس. وندا ناقتى نەلەر ايتىلاتىنى بەلگىسىز. دەگەنمەن بايانداما بوريس دجونسوننىڭ بەدەلىن كوتەرمەيتىنى بەسەنەدەن بەلگىلى. سوندىقتان شىعار قازىرگى پرەمەر-مينيستر حالىق اراسىندا عانا ەمەس, پارتيالاستارى اراسىندا دا بەدەلى تومەندەي باستاعانى بايقالادى.
قازىردىڭ وزىندە اعىلشىن قوعامىندا بوريس دجونسوننان كەيىن ۇكىمەتتى كىم باسقارادى دەگەن ساۋال تۋىنداي باستادى. ءبىر جاعىنان زاڭ بۇزعانى ءۇشىن ايىپپۇل تولەگەن پرەمەر-ءمينيستردىڭ كرەسلوسىن بوساتاتىنى تۇسىنىكتى. ەكىنشى جاعىنان, ۋكرايناداعى احۋالعا بەلسەنە ارالاسىپ جۇرگەن ونى ورنىندا قالدىرعان دۇرىس دەگەن دە پىكىر ارا-تۇرا ايتىلىپ قالادى.
The Guardian گازەتىنىڭ كولۋمنيسى دجوناتان فريدلەندتىڭ پايىمداۋىنشا, زاڭ بۇزعان ۇكىمەت باسشىسى قىزمەتىنەن كەتۋى ءتيىس. سەبەبى وسىنداي ارەكەتى ارقىلى ب.دجونسون بۇكىل اعىلشىن قوعامىن مانسۇقتاپ وتىر دەگەن پىكىر ۇستانادى.
«ونىڭ ۇستىنە, ۋكراينا ماسەلەسى پرەمەر-ءمينيستردى عانا ەمەس, بۇكىل ۇلىبريتانيا ۇكىمەتىن مازالايدى. البەتتە, دجونسوننىڭ كيەۆكە ساپارى ول جاقتاعى حالىقتى ءبىر جەلپىنتىپ تاستادى. بىراق پرەزيدەنتتىك ەمەس, پارلامەنتتىك جۇيەدە پرەمەر-ءمينيستردىڭ اۋىسۋىمەن ەلدىڭ كوزقاراسى وزگەرمەيدى. لەيبوريستەردىڭ ۇستانىمىن ەسكەرسەك, ءتىپتى ۇكىمەت اۋىسقاندا دا ۇستانىمىز وزگەرمەيدى», دەپ جازادى دج. فريدلەند.
ەندى دجونسوننىڭ ورنىن كىم باسادى دەگەن ماسەلەگە ورالساق. قازىرگى تاڭدا بىرنەشە ۇمىتكەردىڭ ەسىمى اتالىپ ءجۇر. سولاردىڭ ءبىرى – قازىناشىلىق كانتسلەرى ريشي سۋناك. كوروناۆيرۋس ءورشىپ تۇرعاندا ونىڭ پاندەمياعا قارسى ارەكەتى كوپشىلىكتىڭ كوڭىلىنەن شىقتى. جىل باسىندا دجونسوننىڭ باسى داۋعا قالعاندا ر.سۋناكتى جاڭا ۇكىمەت باسشىسى رەتىندە ساناعاندار كوپ بولاتىن. الايدا كەيىننەن ونىڭ كارانتين تالاپتارىن ساقتاماعانى انىقتالىپ, ايىپپۇل تولەگەنى بەلگىلى بولعاننان كەيىن ابىرويى ايرانداي توگىلدى.
نەگىزگى وپپوزيتسيالىق لەيبوريستەر پارتياسىنىڭ جەتەكشىسى كەير ستارمەر دە ەل تىزگىنىن قولىنا الۋى ىقتيمال. راس, ونىڭ حالىق اراسىنداعى بەدەلى جوعارى ەمەس. دەگەنمەن قازىر ونىڭ رەيتينگى بىرتىندەپ جاقسارىپ كەلەدى. الدا-جالدا ستارمەر وسى ءساتتى ۇتىمدى پايدالانىپ كەتسە, الداعى سايلاۋدا پرەمەر-مينيستر بولۋعا لايىق بىردەن-ءبىر ۇمىتكەر اتانادى.
بۇدان بولەك, ۇلىبريتانيا سىرتقى ىستەر ءمينيسترى ليز تراسستىڭ, قورعانىس ءمينيسترى بەن ۋوللەستىڭ, ءبىلىم ءمينيسترى ناديم ءزاحاۋيدىڭ ەسىمدەرى اتالىپ قالادى. قالاي دەگەنمەن, الداعى ۋاقىتتا ۇلىبريتانيا ساياسي ەليتاسى ءدۇر سىلكىنەتىنى انىق. قازىرگى ساتتە ءبارى سيۋ گرەي حانىمنىڭ بايانداماسىن كۇتىپ وتىر.