نۇر-سۇلتان قالاسىندا كۇن رايىنىڭ جىلىنۋىنا بايلانىستى 18 ساۋىردەن باستاپ جىلۋ بەرۋ توقتاتىلادى, دەپ حابارلايدى Egemen.kz اكىمدىكتىڭ رەسمي سايتىنا سىلتەمە جاساپ.
نۇر-سۇلتاندا «قالانىڭ جىلۋ بەرۋ ماۋسىمىن دايىنداۋ جانە وتكىزۋ قاعيدالارىنىڭ» 42-تارماعىنا سايكەس سىرتقى اۋانىڭ تۇراقتى ورتاشا تاۋلىكتىك تەمپەراتۋراسى +10 گرادۋس جانە ودان جوعارى بولعان كەزدە كۇنتىزبەلىك 5 كۇن ىشىندە ەلوردانىڭ جەرگىلىكتى اتقارۋشى ورگانى جىلىتۋ ماۋسىمىن اياقتاۋ جونىندە شەشىم قابىلدايدى.
وسىعان بايلانىستى بەسىنشى كۇن 17 ساۋىرگە تۇسەتىنىن ەسكەرسەك, 18 ساۋىردەن باستاپ جىلۋ بەرۋ توقتاتىلادى.
بۇل شەشىم الەۋمەتتىك نىساندارعا قاتىستى ەمەس.