پورتۋگاليانىڭ مايا قالاسىندا Tennis Europe سەرياسى بويىنشا جاسوسپىرىمدەر اراسىندا ءداستۇرلى حالىقارالىق سۋپەر تۋرنير مارەگە جەتتى, دەپ حابارلايدى Egemen.kz قازاقستان تەننيس فەدەراتسياسىنىڭ ءباسپاسوز قىزمەتىنە سىلتەمە جاساپ.
ەلىمىزدىڭ جاسوسپىرىمدەر اراسىنداعى ءبىرىنشى راكەتكاسى, ەۋروپا رەيتينگىسىنىڭ چەمپيوندىق كەستەسىندە كوش باستاپ كەلە جاتقان زاڭعار نۇرلان ۇلى سلوۆەنيالىق زيگو شەشكومەن بىرگە جۇپتىق سىندا فينالدا گەرمانيالىقتار ديەگو پالومەرو – نيلس ماكدونولدپەن باس جۇلدەنى ساراپقا سالدى.
ءۇش ساعاتقا سوزىلعان تارتىستى ماچتا قازاقستاندىق-سلوۆەنيالىق جۇپ قارسىلاستارىنا جول بەردى – 6:1, 5:7, 5:10.
الماتى قالاسىنىڭ 13 جاسار تۇلەگى ءۇشىن بۇل جۇپتىق سىنداعى التىنشى فينالى ەدى, سونىڭ ۇشەۋىندە زاڭعار جەڭىسكە جەتتى. سونىمەن قاتار ول جەكەلەي سىندا بەس رەت چەمپيون اتانعان بولاتىن.
ەندى قازاقستاننىڭ جاس جۇلدىزى 18 ساۋىردە ۇندىستانعا اتتانادى. زاڭعار نۇرلان ۇلى جاسوسپىرىمدەر اراسىندا الەم چەمپيوناتىنىڭ ىرىكتەۋ سايىسىندا ەل نامىسىن قورعايدى.