Amanat پارتياسىنىڭ اتقارۋشى حاتشىسى اسحات ورالوۆ ساياسي تۇعىرناما, «باقۋاتتى قوعام: ونجىلدىقتىڭ 10 ماقساتى» جانە 2025 جىلعا دەيىنگى سىبايلاس جەمقورلىققا قارسى ءىس-قيمىل باعدارلاماسى سەكىلدى نەگىزگى باعدارلامالىق قۇجاتتاردى قىسقا مەرزىمدە جاڭارتۋ جونىندەگى جۇمىس توپتارىمەن جينالىس وتكىزدى.
اسحات ورالوۆ 1 ناۋرىزدا وتكەن سەزدە مەملەكەت باسشىسى قاسىم-جومارت توقاەۆ پارتيانى جاڭعىرتۋدىڭ, ونىڭ ىشىندە نەگىزگى باعدارلامالىق قۇجاتتاردى قايتا قاراۋ بويىنشا باسىمدىقتاردى بەلگىلەگەنىن اتاپ ءوتتى.
وسىعان وراي ءاربىر باعدارلامالىق قۇجات بويىنشا جەكە جۇمىس توپتارى قۇرىلدى. پارتيانىڭ ساياسي تۇعىرناماسىن جاڭارتۋ جونىندەگى جۇمىس توبىنىڭ جەتەكشىسى بولىپ ءماجىلىس دەپۋتاتى, Amanat فراكتسياسىنىڭ مۇشەسى ايدوس سارىم تاعايىندالدى. 2030 جىلعا دەيىنگى «باقۋاتتى قوعام: ونجىلدىقتىڭ 10 ماقساتى» باعدارلاماسىن جاڭارتۋ جونىندەگى جۇمىس توبىنا ءماجىلىس دەپۋتاتى ساياسات نۇربەك جەتەكشىلىك ەتەدى. ال 2025 جىلعا دەيىنگى باعدارلاما بويىنشا جۇمىس توبىنىڭ جەتەكشىسى ءماجىلىس دەپۋتاتى ەرلان سايىروۆ بولدى.
جۇمىس توپتارىنىڭ قۇرامىنا سەنات پەن ءماجىلىس دەپۋتاتتارى, پارتيا ساياسي كەڭەسىنىڭ مۇشەلەرى, ساراپشىلار قوعامداستىعىنىڭ, ۇكىمەتتىك ەمەس ۇيىمداردىڭ وكىلدەرى, ۋاكىلەتتى مەملەكەتتىك ورگاندار مەن «اتامەكەن» ۇلتتىق كاسىپكەرلەر پالاتاسىنىڭ وكىلدەرى ەندى.
«پارتيانىڭ قۇندىلىقتارى مەن باسىمدىقتارى بەلگىلەنگەن ساياسي پلاتفورما 2013 جىلى قابىلداندى. جاڭارتىلعان قۇجاتتا قوعامدا قالىپتاسىپ جاتقان جاڭا قۇندىلىقتاردى ايشىقتاپ, ازاماتتاردىڭ وزگەرىستەرگە دەگەن بارلىق سۇرانىستارىن بارىنشا ەسكەرۋ قاجەت», دەدى پارتيانىڭ اتقارۋشى حاتشىسى.
ا.ورالوۆ «باقۋاتتى قوعام: ونجىلدىقتىڭ 10 ماقساتى» باعدارلاماسىندا پاندەميا, قاڭتارداعى وقيعالار جانە گەوساياسي احۋالدىڭ شيەلەنىسۋىنە بايلانىستى قازىرگى زامانعى سىن-قاتەرلەر مەن قاۋىپتەردى ەسكەرە وتىرىپ, تۇجىرىمدامالىق تاسىلدەردى مۇقيات پىسىقتاۋ قاجەتتىگىن اتاپ ءوتتى.
سىبايلاس جەمقورلىققا قارسى ءىس-قيمىل باعدارلاماسى بويىنشا جۇمىس توبىنىڭ باستى مىندەتى – قوعامدا سىبايلاس جەمقورلىققا مۇلدەم توزبەۋشىلىكتى قالىپتاستىرۋعا, مەملەكەت پەن قوعامدى وسى الەۋمەتتىك ز ۇلىمدىقپەن كۇرەسكە جۇمىلدىرۋعا باعىتتالعان ناقتى ۇسىنىستار ازىرلەۋ.
وڭىرلىك فيليالداردان جانە پارتيانىڭ ءماسليحاتتار مەن ماجىلىستەگى دەپۋتاتتىق فراكتسيا مۇشەلەرىنەن ۇسىنىستار جيناۋ قىسقا مەرزىمدە ۇيىمداستىرىلادى. باعدارلاما جوبالارى ءتۇرلى ديالوگ الاڭدارىندا, ساراپتامالىق كەزدەسۋلەردە, ونىڭ ىشىندە ونلاين-فورماتتا دا تالقىلانباق.
ءوز كەزەگىندە ءماجىلىس دەپۋتاتى ەرلان سايىروۆ قازىرگى تاڭدا قوعامدا وزگەرىستەرگە دەگەن سۇرانىس تا, تيىسىنشە پارتيالارعا قويىلاتىن تالاپ-تىلەك تە وتە جوعارى ەكەنىن اتاپ ءوتتى. «ارينە, وزگەرىس قاجەت. بىراق ساباقتاستىق بولۋى كەرەك. سوندىقتان ءبىز وتكەننىڭ جاقسىسىن الا وتىرىپ, بولاشاققا قادام جاسايمىز», دەدى ە.سايىروۆ. كەڭەس بارىسىندا ايدوس سارىم, ساياسات نۇربەك جانە باسقا دا جۇمىس توپتارىنىڭ مۇشەلەرى ءوز ويلارىن ورتاعا سالدى.