كۇن سايىن جارىق دۇنيەگە كادىمگى سابيلەرمەن قاتار, تۋماي جاتىپ تاعدىر تالقىسىنا دۋشار بولعان دىمكاس نارەستەلەر كەلىپ جاتادى. وكىنىشكە قاراي, مۇنداي جاعدايلار اكە-شەشەگە دە وڭاي تيمەيتىندىكتەن, ولارعا ءومىر بويى دەرلىك قولداۋ مەن كومەك قاجەت. ەرەكشە كۇتىمدى قاجەت ەتەتىن سابيلەردى اياعىنان تۇرعىزۋ, ومىرگە بەيىمدەۋ, ماماندارعا قاراتۋ مەن تاعى باسقاسى توزىمدىلىك پەن ۋاقىتتى عانا ەمەس, كوپ قاراجاتتى قاجەت ەتەتىنى ايان.
وسى ماسەلەلەرمەن 15 جىل بويى ۇزدىكسىز اينالىسىپ كەلە جاتقان AYALA قورى جۋىردا كەزەكتى رەت ەسەپ بەردى. قور وسى جىلداردا بالالاردىڭ ءولىم-ءجىتىمىن ازايتۋ, جاسوسپىرىمدەردى كاسىبي باعدارلاۋ مەن ەرەكشە ءبىلىم بەرۋ قاجەتتىلىگى بار بالالارعا كومەك كورسەتۋ جوبالارىنا 5 ملرد تەڭگەدەن استام قاراجات جۇمساعان. قوردىڭ بالالار ءولىم-ءجىتىمى كورسەتكىشىن تومەندەتۋگە قوسقان ۇلەسىن دەنساۋلىق ساقتاۋ مينيسترلىگى دە اتاپ ءوتىپ, «تىنىس ال, بالاقاي» جانە «باسقارىلاتىن گيپوتەرميا» جوبالارىنا قاتىستى ەكى مەموراندۋمعا قول قويعان ەدى. 2021 جىلدىڭ اقپانىنان بەرى قور 100 شاقتى نەوناتولوگ دارىگەرلەردىڭ بىلىكتىلىگىن ارتتىرعان تەگىن ونلاين-پلاتفورمانى ىسكە قوسۋ يدەياسىن قولدادى. قىسقاسى, قور قۇرىلعالى بەرى 2,2 ملرد تەڭگەدەن استام قاراجات قازاقستاندىق دەنساۋلىق ساقتاۋ مەكەمەلەرىندە بالالاردى قۇتقارۋ جانە كۇتىپ-باعۋ جۇمىستارىن جەتىلدىرۋگە باعىتتالدى.
ال 2007 جىلدان باستاپ قايىرىمدىلىقتىڭ ءۇش باعىتىندا دايەكتى جانە جۇيەلى جۇمىس ىستەۋگە كوشكەن AYALA قورىنىڭ باستى ۇستانىمى – ءتيىمدى قايىرىمدىلىق. دەمەۋشىلەردىڭ قاراجاتى مەن قازاقستاندىقتاردىڭ قايىرىمدىلىق جارنالارى ءبىر جولعى كومەككە ەمەس, جىلدار بويى جۇمىس ىستەيتىن جوبالارعا جۇمسالادى. ونىڭ ناتيجەسى – ەلىمىزدە بەتى بەرى قاراعان ءجۇز مىڭداعان بالانىڭ ءومىرى. وعان قوسا بالالار ۇيلەرى مەن مەكتەپ-ينتەرناتتارىندا ءتۇرلى كاسىپتەرگە بەيىمدەلۋدەن وتكەن جۇزدەگەن جوعارى سىنىپ وقۋشىلارى بار. مۇنان بولەك ەرەكشە كۇتىمدى قاجەت ەتەتىن مىڭداعان بالا قور ورناتقان جابدىقتارمەن دەنساۋلىقتارىن تۇزەۋگە ارەكەتتەنەدى.
2021 جىلى قور ءىرى دەمەۋشىلەر مەن قازاقستاندىقتاردىڭ قايىرىمدىلىق جارناسى تۇرىندە 480 ملن تەڭگەدەن استام قاراجات تارتسا, ونىڭ 216 ملن تەڭگەسى قازاقستاننىڭ 12 پەريناتالدىق ورتالىعىندا 80 جاڭا مەديتسينالىق تەحنيكا ساتىپ الىپ, ورناتۋعا باعىتتالدى. بۇل الداعى 5 جىلدا مىڭداعان نارەستەنىڭ ءومىرى مەن اقىل-ەستەرىن دامىتۋعا سەپتەسەدى.
«باستاپقىدا ءبىر رەتتىك قارجى جيناۋ ءبىزدىڭ جولىمىز ەمەس دەپ شەشتىك. دارىگەر رەتىندە تۇسىنگەنىم, جۇيەلى ءتاسىل عانا ناعىز ناتيجەلەرگە جەتكىزەدى. سوندىقتان ءبىزدىڭ قور 15 جىل بويى بالالار رەانيماتسياسىنا ارنالعان جابدىقتارمەن جۇمىس ىستەيدى جانە بالالار دارىگەرلەرىنىڭ – نەوناتولوگتەر, ورتوپەدتەر, كارديوحيرۋرگتەر مەن رەانيماتولوگتەردىڭ بىلىكتىلىگىن ارتتىرۋمەن اينالىسادى. جىل سايىن ەلىمىزدىڭ پەريناتالدىق ورتالىقتارىنىڭ جانساقتاۋ بولىمدەرىنەن مىڭداعان بالا وتەدى. مەديتسينالىق جابدىق بىرنەشە جىل جۇمىس ىستەيدى, وعان قوسا قور دارىگەرلەردىڭ جاڭا تۋعان نارەستەلەردى كۇتىپ-باعۋ ءبىلىمى مەن داعدىلارىن ۇنەمى جاڭارتىپ وتىرادى. مۇنىڭ ناتيجەسىن ءاربىر اتا-انا كورىپ, بارلىق دەمەۋشىلەر مەن سەرىكتەستەرىمىزدىڭ ارقاسىندا امان-ساۋ قالعان بالالارىن باۋىرىنا باسىپ وتىر», دەيدى AYALA قورىنىڭ پرەزيدەنتى ايدان سۇلەيمەنوۆا.
قور الداعى جىلدارى بالالار مۇگەدەكتىگىن ازايتۋ ءۇشىن بۇرىنعىدان دا بەلسەندى بولۋدى جوسپارلاپ وتىر.
«وكىنىشكە قاراي, قازاقستاندا مۇگەدەك بالالار سانى كوبەيىپ كەلەدى. سوڭعى 5 جىلدا بۇل سان ەكى ەسەگە ارتىپ, 100 مىڭنان اسىپ كەتتى نەمەسە شاعىن قالا حالقىنىڭ سانىنا جەتتى. بالانىڭ ءومىرىن ساقتاپ قالۋ وتە ماڭىزدى. بىراق ودان دا ماڭىزدىسى ونى فۋنكتسيونالدى تۇردە ساۋ قالدىرۋ. سوندىقتان بىرنەشە جىلدان بەرى بالالار رەانيماتسياسىن بالالاردىڭ مۇگەدەكتىگىن ازايتۋعا كومەكتەسەتىن قۇرال-جابدىقتارمەن جانە ەمدەۋ تەحنولوگيالارىمەن قامتاماسىز ەتىپ كەلەمىز», دەدى ايدان سۇلەيمەنوۆا.
ال ەلىمىزدەگى اۆتوماتتى گيپوتەرميا اپپاراتتارى وسىلاي پايدا بولعان. 2017 جىلدان بەرى ولار قور وقىتقان دارىگەرلەردىڭ قولىمەن 200-دەن استام بالانىڭ ءومىرى مەن اقىل-ەسىن ساقتاپ قالدى. وتكەن جىلدان باستاپ قور رەتينوپاتيامەن شالا تۋعان نارەستەلەردىڭ كورۋ قابىلەتىن ساقتاۋ ىسىنە بەلسەنە ارالاسىپ كەلەدى. دەنساۋلىق ساقتاۋ مينيسترلىگىمەن بىرقاتار كەزدەسۋ وتكىزىپ, وسى اۋرۋدى ءدارى-دارمەكپەن ەمدەۋ جونىندەگى حاتتامانى ىسكە اسىرۋعا قوسىلدى. كوزدىڭ تورىن كواگۋلياتسيالاۋعا ارنالعان 4 لازەرلىك قوندىرعى مەن ەكى وفتالموسكوپ ساتىپ الدى.
سونىمەن قاتار قور وفتالمولوگ دارىگەرلەرگە تەگىن بەينە كۋرستار ءتۇسىرۋدى جوسپارلاپ, 6 رەتينالدى كامەرا مەن 11 وفتالموسكوپ ساتىپ الۋ ءۇشىن دەمەۋشىلەرمەن بەلسەندى جۇمىس جۇرگىزىپ جاتىر. وسىنىڭ بارلىعى الداعى 3 جىلدا رەتينوپاتياسى بار جاڭا تۋعان نارەستەلەردە كورۋ قابىلەتى بويىنشا مۇگەدەكتىكتىڭ ايتارلىقتاي تومەندەۋىنە اكەلۋى ءتيىس.
AYALA بق ءوز جوبالارىنا دەمەۋشىلەردەن جينالعان قاراجاتتىڭ 100%-ىن جانە قۇرىلتايشىلاردىڭ قاراجاتى ەسەبىنەن اكىمشىلىك شىعىستاردى قامتاماسىز ەتە وتىرىپ, جەكە قايىرىمدىلىق جارنالارى ارقىلى جىبەرەدى. اشىقتىق پەن تولىق ەسەپ بەرىپ وتىرۋ دا قوردىڭ بەدەلىن كوتەرە الادى. ياعني Ayala.kz سايتىندا 2007 جىلدان باستاپ بارلىق قارجىلىق ەسەپتەر جانە 2016 جىلدان باستاپ KPMG تەكسەرگەن بارلىق اۋديتورلىق ەسەپتەر بار. بۇل قورعا 15 جىل بويى ەلىمىزدە ءتيىمدى قايىرىمدىلىقتىڭ جوعارى ستاندارتتارىن ورناتۋعا جانە قولداۋعا مۇمكىندىك بەرەدى.
«قايىرىمدىلىقتاعى جۇمىس تەك جان-تانىمەن بەرىلۋدى جانە قايتارىمدى عانا تالاپ ەتپەيدى, جىل سايىن ءبىز قوردىڭ باستى ماقساتتارىن انىقتاۋ ءۇشىن ستراتەگيالىق سەسسيا وتكىزەمىز. سودان كەيىن ءاربىر قىزمەتكەردىڭ اپتا سايىنعى ەسەبىن تىڭداپ, جىلدىق كەلىسىلگەن جوسپار بويىنشا جۇرەمىز. ءبىز جاڭا يدەيالارعا اشىقپىز, ءسۇيسىنىپ وقيمىز, كوممۋنيكاتسيادا, جوبالاردى باسقارۋدا, ءتىپتى ساتۋدا دا ءوز داعدىلارىمىزدى جەتىلدىرەمىز. ويتكەنى قور – ءبىزدىڭ قازىر جانە بولاشاقتا ەلىمىزدىڭ ۇزدىك ۇەۇ قاتارىندا كورىپ وتىرعان كاسىبي ۇيىم», دەيدى ايدان سۇلەيمەنوۆا.
الماتى