«قازگيدرومەت» سينوپتيكتەرىنىڭ 2-8 ساۋىرگە ارنالعان بولجامى بويىنشا, ەلىمىزدىڭ باتىسىندا, ورتالىعىندا جانە شىعىسىندا اۋا تەمپەراتۋراسى پليۋس 23 گرادۋسقا دەيىن جىلىنادى. ال سولتۇستىگىندە كۇندىز اۋا تەمپەراتۋراسى پليۋس 18 گرادۋسقا, وڭتۇستىك وڭىرلەردە 28 گرادۋسقا كوتەرىلەدى, دەپ حابارلايدى Egemen.kz.
2-8 ءساۋىر ارالىعىندا باتىستان شىعىسقا قاراي كەزەكتى اتلانتيكالىق تسيكلون ىعىسا باستايدى. ول نەگىزىنەن جاڭبىر تۇرىندە جاۋىن-شاشىننىڭ تۇسۋىنە جانە الدىمەن باتىس پەن سولتۇستىكتە, كەزەڭنىڭ ورتاسىنان قازاقستاننىڭ قالعان اۋماعىندا جەلدىڭ كۇشەيۋىنە سەبەپشى بولادى.
تسيكلوننىڭ ارتىنان باتىس انتيتسيكلونى اۋىسادى. ول وزىمەن بىرگە قىسقا مەرزىمگە اۋا تەمپەراتۋراسىنىڭ تومەندەۋىن الىپ كەلەدى. وسىعان بايلانىستى قازاقستاننىڭ جازىق اۋماقتارىندا, اتاپ ايتقاندا قاراعاندى, اقمولا, سولتۇستىك قازاقستان, قوستاناي, اقتوبە, باتىس قازاقستان, پاۆلودار وبلىستارى, شىعىس قازاقستان وبلىسىنىڭ وڭتۇستىگى مەن وڭتۇستىك-باتىس بولىگىندە قاردىڭ قارقىندى ەرۋى, جانە وزەندەردەگى سۋ دەڭگەيىنىڭ كوتەرىلۋى كۇتىلەدى.