بۇگىن دۇنيەجۇزىلىك دەنساۋلىق ساقتاۋ ۇيىمىنىڭ ەۋروپالىق وڭىرلىك بيۋروسىنىڭ باسشىسى حانس كليۋگەنىڭ قازاقستانعا ءۇش كۇندىك رەسمي ساپارى الماتىدان باستاۋ الدى.
لاۋازىمدى تۇلعانىڭ قازاقستانعا ارنايى كەلۋىنىڭ ءمانىسى مىنادا, 2016 جىلى ددۇ مەن قازاقستان بىرىگىپ, ددۇ ەۋروپالىق العاشقى مەديتسينالىق-سانيتارلىق كومەك ورتالىعىن قۇرعان بولاتىن.
اراعا التى جىل ۋاقىت سالىپ, ددۇ ەۋروپالىق بيۋروسى مەن قازاقستاننىڭ بىرلەسكەن ارەكەتىنىڭقورىتىندىسىن شىعاراتىن ۋاقىت كەلىپتى, ءارى حانس كليۋگەنىڭ وسى ساپارىندا ددۇ-نىڭ قازاقستانداعى مەديتسينالىق-سانيتارلىق العاشقى كومەك جونىندەگى باستاپقى دەمونستراتسيالىق پلاتفورماسىن قۇرۋ كوزدەلىنىپ وتىر.
الدىمەن حانس كليۋگە س.اسفەندياروۆ اتىنداعى قازاق ۇلتتىق مەديتسينا ۋنيۆەرسيتەتىندە قر دەنساۋلىق ساقتاۋ ءمينيسترى اجار عينياتپەن كەزدەسىپ, الداعى كەزدەسۋلەر مەن مساك سالاسىن نىعايتۋ بولىگىندەگى قازاقستان مەن ددۇ ىنتىماقتاستىعى ماسەلەلەرىن تالقىلادى.
ء«بىرىنشى كەزەكتە, حانس كليۋگە مىرزا, ءسىز, ەۋروپالىق وڭىرلىك بيۋرونىڭ ديرەكتورى, ددۇ-نىڭ مساك جونىندەگى كەڭسەسىندەگى ارىپتەستەرىمىز ارقىلى دۇنيەجۇزىلىك دەنساۋلىق ساقتاۋ ۇيىمىمەن جۇزدەسكەنىمىزگە قۋانىشتىمىز جانە مساك جۇيەسىندەگى وزىق تاجىريبەلەردى كورسەتۋ ءۇشىن ۇزدىك الاڭ رەتىندە قازاقستاندى تاڭداعاندارىڭىز ءۇشىن العىس بىلدىرۋگە رۇقسات ەتىڭىز! ەرتەڭ ەڭبەكشىقازاق اۋدانى ەسىك قالاسىنداعى اۋىلدىق دەنساۋلىق ساقتاۋ نىسانىن كورسەتەمىز», دەدى مينيستر كەزدەسۋ باسىندا.
اجار عينيات ەلىمىزدىڭ دەنساۋلىق ساقتاۋ سالاسىنداعى رەفورمالار تۋرالى ايتا كەلە, مينيستر مەديتسينا قىزمەتكەرلەرىنىڭ كاسىبي جاۋاپكەرشىلىگىن ساقتاندىرۋ ماسەلەسىن مىسالعا كەلتىردى.
قر دەنساۋلىق ساقتاۋ مينيسترلىگىنىڭ باسشىسى قازاقستان مەديتسينالىق-سانيتارلىق العاشقى كومەك بويىنشا ەكى دەكلاراتسيانىڭ وتانى ەكەنىن ەسكە سالدى. 1978 جىلى مۇشە مەملەكەتتەر قابىلداعان الماتى دەكلاراتسياسى بۇكىل الەمدە دەنساۋلىق ساقتاۋدىڭ دامۋىنا جاھاندىق اسەر ەتتى. 2018 جىلى مساك جونىندەگى جاھاندىق كونفەرەنتسيا الاڭىندا ددۇ-عا مۇشە مەملەكەتتەر ونىڭ ءىزباسارى – مساك جونىندەگى استانا دەكلاراتسياسىن قابىلدادى.
ءوز كەزەگىندە, ددۇ ەۋروپالىق وڭىرلىك بيۋروسىنىڭ باسشىسى حانس كليۋگە قازاقستان ۇكىمەتى مەن ددۇ ەۋروپالىق وڭىرلىك بيۋروسىنىڭ اراسىنداعى ايرىقشا ىنتىماقتاستىقتى اتاپ ءوتتى.
دوكتور حانس كليۋگە دەمونستراتسيالىق پلاتفورما ۇلگىسىندە, اسىرەسە اۋىلدىق دەنساۋلىق ساقتاۋدا مساك-تىڭ ۇزدىك تاجىريبەلەرىن ىلگەرىلەتۋ جونىندەگى قازاقستاننىڭ كۇش-جىگەرىنە ءوزىنىڭ تاڭدانىسىن ءبىلدىردى.
«ادامدار تۇراتىن ەلدى-مەكەندەردە دەنساۋلىق ساقتاۋ قىزمەتتەرىنە قول جەتكىزۋدى قامتاماسىز ەتۋ وتە ماڭىزدى. بۇل دەنساۋلىق ساقتاۋدىڭ جاڭا ءداۋىرى, ول تۇراقتى دامۋ ماقساتتارىنا جانە ددۇ ەۋروپالىق باعدارلاماسىنا وتە جاقىن», دەدى ەۋروپالىق ددۇ باسشىسى.
وڭىرلىك ددۇ باسشىسى قازاقستاننىڭ مەديتسينالىق-سانيتارلىق العاشقى كومەكتى نىعايتۋداعى تۇجىرىمدامادان ءىس-قيمىلعا كوشۋ جونىندەگى مىسالى مساك ۇلتتىق قىزمەتتەرىن دامىتۋدا باسقا ەلدەرگە كومەكتەسۋگە ارنالعانىن اتاپ ءوتتى.
ءوز كەزەگىندە اجار عينيات قازاقستان الداعى ۋاقىتتا دا مساك جونىندەگى وسى ەكى دەكلاراتسيانى جاھاندىق دەڭگەيدە بەلسەندى تۇردە ىلگەرىلەتەتىنىن مالىمدەدى.
الماتىدان باستاۋ العان ەلەۋلى وقيعاعا دەلەگاتسيا قۇرامىنداعى بىرقاتار جوعارى لاۋازىمدى قوناقتار, اتاپ ايتقاندا ددۇ-نىڭ قازاقستانداعى وكىلى دوكتور كارولين كلارينۆال (Caroline Clarinval), ددۇ ەۋروپالىق ورتالىعىنىڭ العاشقى مەديتسينالىق-سانيتارلىق كومەك جونىندەگى كەڭسەسىنىڭ باسشىسى مەليتتا ياكاب (Melitta Jakab), قازاقستان رەسپۋبليكاسى دەنساۋلىق ساقتاۋ مينيسترلىگىنىڭ وكىلدەرى قاتىستى.
«مەديتسينالىق-سانيتارلىق العاشقى كومەك تالاي ەل ۇمتىلىپ وتىرعان دەنساۋلىق ساقتاۋ جۇيەسىنىڭ بارلىق ماقساتتارىنا قول جەتكىزۋدىڭ كىلتى: حالىقتىڭ دەنساۋلىعىن جاقسارتۋ, دەنساۋلىق ساقتاۋ قىزمەتتەرىمەن جاپپاي قامتۋعا كوشۋ جانە پروفيلاكتيكاعا, دەنساۋلىقتى نىعايتۋعا, اۋرۋلاردى ەرتە انىقتاۋعا جانە ەمدەۋگە باسا نازار اۋدارۋ ارقىلى تەڭسىزدىكتى ازايتۋ, جۇقپالى ەمەس اۋرۋلاردان كەلەتىن مەزگىلسىز ءولىم-ءجىتىمدى ازايتۋ», دەدى دوكتور حانس كليۋگە.
ول «اينالامىزداعى الەم تەز وزگەرەتىن كەزدە»پروگرەسس پەن ترانسفورماتسياداعى جاستاردىڭ جەتەكشى ءرولىن ەرەكشە اتاپ ءوتتى.
مينيستر ستۋدەنتتەرگە قازاقستانداعى مەديتسينالىق العاشقى كومەكتىڭ دامۋىنىڭ نەگىزگى كەزەڭدەرى تۋرالى باياندادى. بۇگىندە مساك ۇيىمدارىندا 12 مىڭنان استام ۋچاسكە جۇمىس ىستەپ, وندا 9 مىڭ جالپى پراكتيكا دارىگەرى پاتسيەنتتەردى قابىلدايدى.
مينيستر پاندەميا كەزىندە نەگىزگى اۋىرتپالىق مساك-قا ارتىلعانىن ەسكە سالدى. 150 مىڭنان استام ناۋقاس تەك مساك دەڭگەيىندە عانا بەلسەندى بولدى جانە ەلىمىزدىڭ دەنساۋلىق ساقتاۋ جۇيەسى بۇل سىناقتى لايىقتى ورىنداپ شىقتى.
وڭىرلىك ددۇ باسشىسى حانس كليۋگەنىڭ ساپارى ودان ءارى الماتى وبلىسىندا جالعاسىپ, ماڭىزدى كەزەدسۋلەرمەن ەلوردادا اياقتالادى.