ەلوردادا پرەزيدەنت اكىمشىلىگى باسشىسىنىڭ ورىنباسارى ايدا بالاەۆا پرەزيدەنتتىك جاستار كادرلىق رەزەرۆى مۇشەلەرىمەن كەزدەستى. جيىن بارىسىندا مەملەكەت باسشىسىنىڭ جولداۋىندا ايتىلعان ساياسي رەفورمالار تالقىلانىپ, ولاردى جۇزەگە اسىرۋ ماسەلەسى ءسوز بولدى.
ءىس-شارانى كىرىسپە سوزبەن اشقان پرەزيدەنت اكىمشىلىگى باسشىسىنىڭ ورىنباسارى ايدا بالاەۆا «جاستار كادرلىق رەزەرۆى» جاستار ساياساتى ءۇشىن عانا ەمەس, مەملەكەتتىك ساياساتتاعى ءرولى دە وتە ماڭىزدى ەكەنىن ايتتى. سونداي-اق بۇل باستاماعا مەملەكەت باسشىسى ەرەكشە نازار سالىپ وتىرعانىن اتاپ ءوتتى.
«تاياۋدا پرەزيدەنتىمىز ءوزىنىڭ كەزەكتى جولداۋىن حالىققا جاريا ەتتى. وندا كەڭ اۋقىمدى, تەرەڭ ساياسي رەفورمالار ايتىلدى. بۇل قوعامىمىزدى ودان ءارى دەموكراتيالاندىرا تۇسەتىن ساياسي رەفورمالار جيىنتىعى. ەندىگى باستى مىندەت – پرەزيدەنت ۇسىنعان ساياسي رەفورمالاردى قوعام بولىپ بىرىگىپ ساپالى جۇزەگە اسىرۋ. سونىڭ ىشىندە پرەزيدەنتتىك كادرلىق رەزەرۆىنە ارتىلار سەنىم, كۇتەتىن ءۇمىت تە زور. بۇگىن وزدەرىڭىزبەن تالقىلايتىن تاقىرىبىمىز دا مەملەكەت باسشىسىنىڭ جولداۋىنا ارنالادى. سوندىقتان جاستار كادرلىق رەزەرۆى مۇشەلەرى – وزدەرىڭىزدىڭ ويلارىڭىزدى تىڭداۋدى ءجون كورىپ وتىرمىز. جولداۋدى قالاي قابىلدادىڭىزدار؟ ساياسي رەفورمالاردى قالاي جۇزەگە اسىرۋ كەرەك دەپ ەسەپتەيسىزدەر؟ جولداۋدى لايىقتى جۇزەگە اسىرۋعا سىزدەردىڭ دە قاتىسۋلارىڭىز ايرىقشا ماڭىزعا يە», دەدى ا.بالاەۆا.
«سىزدەردىڭ ارقايسىڭىزدىڭ اتقارىپ جۇرگەن جۇمىستارىڭىز حالىقتىڭ كوز الدىندا. قوعام سىزدەرگە ۇلكەن ءۇمىت ارتىپ وتىر. سوندىقتان ارنايى ىرىكتەۋدەن ءوتىپ, پرەزيدەنتتىڭ جاستار رەزەرۆى قۇرامىنا قابىلدانعان سوڭ بيىك دەڭگەيدەن كورىنە ءبىلۋ كەرەك. سىزدەرگە قاراپ, حالىق بولاشاق ەل باسقاراتىن لايىقتى بۋىن قالىپتاسىپ جاتقانىن ۇعىنۋى كەرەك. ارينە, جۇمىس جاسالىپ جاتىر. ەندى سونى حالىققا كورسەتە ءبىلۋ كەرەك. كەڭ كولەمدى اقپارات بەرە ءبىلۋ قاجەت. كەزدەسۋدە ايتىلعان ۇسىنىستار, پىكىرلەردىڭ ءبارى ەرتەڭگى كۇنى مەملەكەتتىك ورگانداردىڭ جۇمىسىن جەتىلدىرۋگە ءوز سەپتىگىن تيگىزۋى كەرەك. مەملەكەتتى باسقارۋ جۇيەسى جاستار بۋىنى سىزدەر ارقىلى جاندانادى. ارقايسىڭىزدى بەلسەندى بولۋعا شاقىرامىن», دەدى ا.بالاەۆا.
بۇدان كەيىن ءسوز كەزەگىن العان مەملەكەتتىك قىزمەت ىستەرى جونىندەگى اگەنتتىك توراعاسى دارحان جازىقباەۆ پرەزيدەنتتىك جاستار كادرلىق رەزەرۆى مەن اگەنتتىك جىل باسىنان بەرى بەلسەندى جۇمىسقا كىرىسىپ, قازىرگى تاڭدا بىرقاتار جوبانى جۇزەگە اسىرىپ جاتقانىن اتاپ ءوتتى.
«جاقىندا جاستار كادرلىق رەزەرۆىن جەتىلدىرۋ بويىنشا شارالار جوسپارىن قاراستىردىق. سونىڭ ىشىندە پرەزيدەنتتىك جاستار كادرلىق رەزەرۆى كەڭسەسى جوباسى اياسىندا كوۆوركينگ ورتالىقتىڭ قاسىنان اۋقىمدى كەڭسە اشتىق. سول جەردە كەزدەسۋلەر وتكىزۋدى باستاپ كەتتىك. بۇعان دەيىن راحىم وشاقباەۆپەن ەركىن فورماتتا كەزدەسۋ ۇيىمداستىردىق.
سونداي-اق رەزەرۆ مۇشەلەرىن جۇمىسقا ورنالاستىرۋ بويىنشا مانساپتىق ءوسۋىن باعالاۋىن قامتيتىن رەكرۋتينگ الگوريتمىن ازىرلەدىك. ۇسىنىلعان مەحانيزم بويىنشا مەملەكەتتىك ورگاندار مەن كۆازيسەكتور سۋبەكتىلەرىنىڭ بوس لاۋازىمدارىنا ورنالاسۋ, رەزەرۆ مۇشەلەرىنىڭ مانساپتىق تىلەكتەرىنە نەگىزدەلگەن مانساپ كارتاسىن اگەنتتىك ۇنەمى جاڭارتىپ وتىرادى. ولاردى مەملەكەتتىك ورگاندار مەن كۆازيسەكتور باسشىلارىنا جولدادىق. قازىرگى تاڭدا رەزەرۆ مۇشەلەرىمەن جۇمىس جۇرگىزىپ جاتىرمىز», دەدى د.جازىقباەۆ.
سپيكەردىڭ ايتۋىنشا اگەنتتىك مەملەكەتتىك ورگاندار جانە ۇيىمدارمەن كەلىسىپ, ءتيىستى كەستە ازىرلەگەن. بۇعان قاتىستى جۇمىس ۇكىمەت كانتسەليارياسىمەن كەلىسىلگەن. سوعان سايكەس كۆازيمەملەكەتتىك كومپانيالار مەن مەملەكەتتىك ورگانداردىڭ باسشىلارىمەن كەزدەسۋ ۇيىمداستىرىلادى. بۇل ءساۋىر ايىندا باستالادى.
«مەملەكەت باسشىسى 16 ناۋرىزداعى جولداۋىندا وتانىمىزدىڭ جارقىن بولاشاعى ءۇشىن تاريحي شەشىمدەر سانالاتىن بىرقاتار باستاما ۇسىندى. وسىعان بايلانىستى قويىلعان جاڭا ءارى اۋقىمدى مىندەتتەردى جۇزەگە اسىرۋعا بارىنشا جۇمىلا قاتىسامىز دەپ ويلايمىن. قارقىندى دامۋ كەزەڭى جاڭا تاسىلدەردى, ۇتىمدى شەشىمدەردى تەز قابىلداۋدى قاجەت ەتەدى. جولداۋدا بەلگىلەنگەن نەگىزگى مىندەتتەر بويىنشا جاستار كادرلىق رەزەرۆى ءوز ۇسىنىستارىن ازىرلەپ, اتالعان كەزدەسۋلەردە ولار جان-جاقتى تالقىلانىپ, ۇسىنىلادى.
قازىرگى كەزدە جاس ۇرپاقتىڭ كوشباسشىلارى سىزدەر. سىزدەر وتانىمىزعا ادال قىزمەت ەتۋ جولىندا بارلىق كۇش-جىگەرلەرىڭىز بەن بىلىمدەرىڭىزدى جۇمسايسىزدار دەگەن ءۇمىتىمىز بار. قالىپتاسقان جاعدايدى جاڭا كوزقاراسپەن باعالاپ, جاڭا يدەيالار ۇسىنىپ, ەڭ باستىسى مەملەكەتتىك اپپاراتىمىزدى جاڭا دەڭگەيگە كوتەرىپ, قوعامعا ۇلگى بولادى دەگەن سەنىمىمىز زور», دەدى د.جازىقباەۆ.
بۇدان بولەك, ءىس-شارادا پرەزيدەنتتىك جاستار كادرلىق رەزەرۆى مۇشەسى ايدىن بايەدىلوۆ ءوز ۇسىنىستارىمەن ءبولىستى. ونىڭ ايتۋىنشا, جاستاردى جارقىن بولاشاققا باستايتىن ءبىلىم. وسى ورايدا, كەلەشەك قازىرگى تاڭنان قامدانعاندارعا ارنالعانىن اتاپ ءوتتى.
«قازاقستاندا بارشاسىنىڭ ساپالى ءبىلىم الۋىنا مۇمكىندىگى جوق ەكەنىنە كەلىسەرسىزدەر دەپ ويلايمىن. ونىڭ دەڭگەيى ادامنان ادامعا قاراي وزگەرىپ وتىرادى. ءبىلىمى بولۋ جەتكىلىكسىز. ونى پايدالانىپ, يگىلىككە جاراتۋ قاجەت. مەملەكەتتىڭ اقىرعى مىندەتى – بارشاعا بىردەي مۇمكىندىك جاساۋ. بۇل وتە اۋقىمدى جۇمىس. وسى ورايدا, پرەزيدەنتتىك جاستار كادرلىق رەزەرۆى وسى ماساتقا قول جەتكىزۋگە اتسالىسادى», دەدى ا.بايەدىلوۆ.
جيىن بارىسىندا پرەزيدەنتتىك جاستار كادرلىق رەزەرۆىنىڭ مۇشەلەرى وزدەرىنىڭ وي-پىكىرىمەن ءبولىستى. ماسەلەن, ەربول تولەگەنوۆ مەملەكەت باسشىسىنىڭ جولداۋىنا قاتىستى پىكىرىمەن ءبولىستى. ونىڭ ايتۋىنشا, جولداۋ كوپشىلىكتىڭ كوڭىلىنەن شىققان.
«مەنىڭ اينالامداعى ادامداردىڭ بارىنە جولداۋ ۇنادى. باعىت دۇرىس – قوعامنىڭ ساياسي رەفورمالارعا سۇرانىسى بار, وعان پرەزيدەنت جاۋاپ بەردى. ارينە, ادامدار ودان دا كوپ نارسەنى قالايتىنى بەلگىلى. بىراق ءبارى دايەكتى تۇردە بولۋى كەرەك. بارىنەن بۇرىن مەنىڭ ەسىمدە قالعانى مىناۋ. ءبىز «سۋپەرپرەزيدەنتتىك ەلدەن» سوت, اتقارۋشى جانە زاڭ شىعارۋشى بيلىك تەڭەستىرىلەتىن ەلگە اينالامىز», دەدى ەربول تولەگەنوۆ.
ول كونستيتۋتسيالىق سوت قۇرۋ باستاماسىنا توقتالدى. ونىڭ ايتۋىنشا, كونستيتۋتسيالىق سوت – دەموكراتيالىق قوعامدا بولۋعا ءتيىس وتە ماڭىزدى ورگان. وسى ورايدا, سپيكەر كونستيتۋتسياعا ەنگىزىلەتىن وزگەرىستەرگە قوعام مۇشەلەرىن تارتۋدىڭ ماڭىزىن اتاپ ءوتتى.
بۇدان بولەك, وتىرىس بارىسىندا جاستار كادرلىق رەزەرۆى مۇشەلەرىن ءتيىمدى پايدالانىپ, قازاقستاننىڭ دامۋىنا ۇلەس قوسۋىنا قاتىستى كوپتەگەن ۇسىنىس ايتىلدى.