ەۆاكۋاتسيالاۋ جالعاسىپ جاتىر

اتاپ ايتقاندا, سوعىس باستالعالى بەرى پولشاعا – 526 ادام, مولدوۆاعا – 21 ادام, ماجارستانعا – 5 ادام, سلوۆاكياعا 1 ادام جەتكىزىلىپ, سونداعى قازاقستان ەل­شىلىكتەرى ولاردى قوناقۇيلەرگە ورنالاستىرعان. مول­دو­ۆاعا بارعان 9 ادام ودان ءارى رۋمىنياعا وتكەن. سونىڭ جەتەۋى قازاقستانعا ۇشىپ كەلدى. ەكى وتانداسىمىز قازىر بۋحارەستە قوناقۇيدە.

قازىرگى تاڭدا وتانداستارىمىزدى ەلگە اكەلۋ Air Astana اۋە كومپانياسى ارقىلى جۇزەگە اسىرىلىپ جاتىر. ەۆاكۋاتسيالىق ۇشاقتار ءۇش رەت رەيس ورىنداپ, قازاقستانعا 432 ادام قايتتى. قازىرگى تاڭدا ءتورتىنشى ەۆاكۋاتسيالىق ۇشاقتى جىبەرۋ بويىنشا جۇمىس جۇرگىزىلۋدە. رەيس كا­توۆيتسە قالاسىنان (پولشا) ۇشادى.

وسى ورايدا, ديپلوماتتارىمىزدىڭ ەڭبەگىن ەرەكشە اتاپ وتكەن ءجون. ولار ازاماتتارىمىزدى سوعىس بولىپ جاتقان ەلدىڭ اۋماعىنان اكەتۋدى, جوعارىدا اتالعان مەملەكەتتەردىڭ شەكاراسىنان ءوتۋدى قامتاماسىز ەتتى. سونداي-اق وتانداستارىمىزدى جيناپ, ولاردى ورنالاس­تىرىپ, قازاقستانعا قايتارۋدى مۇلتىكسىز ۇيىمداستىرىپ وتىر.

سىرتقى ىستەر مينيسترلىگىنىڭ حابارلاۋىنشا, وسىعان دەيىن ۋكراينادان شىققان بىرقاتار وتانداسىمىز ەۋروپالىق وداق اۋماعىندا قالۋعا شەشىم قابىلداعان. بۇگىندە كاتوۆيتسە قالاسىندا 30 ازاماتى ورنالاسقان. ۋكراينا-پولشا شەكاراسىندا 30 جولاۋشىسى بار تاعى 1 اۆتوبۋس ءوز كەزەگىن كۇتىپ تۇر. لۆوۆتاعى قازاقستاننىڭ قۇرمەتتى كونسۋلدىعىنىڭ جانىنداعى ەۆاكۋاتسيالىق جيناۋ ورنىندا – 9 ادام, كيەۆتەگى قازاقستان ەلشىلىگىندە – 10 ادام, حاركوۆتا 7 ادام بار.

«اتامەكەن» ۇكپ-نىڭ اقپاراتىنا سايكەس, ۋكراينا­داعى سوعىس باستالعالى اتالعان ەلدىڭ اۋماعىندا ەلى­مىز­­دىڭ 55 اۆتوكولىگى قالىپ قويعان. ولاردىڭ 47-ءى قا­زاقستان ازاماتى. 8 جۇرگىزۋشى شەت مەملەكەتتەردىڭ ازاماتى.

قازىرگە دەيىن وسى 55 اۆتوكولىكتىڭ 31-ءى ۋكراينادان شىققان. سونىڭ ىشىندە 11-ءى رەسەيگە, مولدوۆاعا – 8, پولشاعا 12 كولىك وتكەن. قالعان 24 اۆتوكولىك ۋكراينا اۋماعىندا. يندۋستريا جانە ينفراقۇرىلىمدىق دامۋ مينيسترلىگىنىڭ حابارلاۋىنشا, ۋكراينادان شىعىپ ۇلگەرمەگەن 11 جۇرگىزۋشى قازىرگى ۋاقىتتا پولشا شەكاراسىنداعى راۆا-رۋسسكايا (ۋكراينا) – گرەبەنە (پولشا) وتكىزۋ بەكەتىنە قاراي جىبەرىلگەن. ولار ءارى قاراي بەلارۋس جانە رەسەي اۋماقتارى ارقىلى ەلگە بەت تۇزەمەك. سىرتقى ىستەر مينيسترلىگى جۇرگىزۋشىلەردىڭ بارى­مەن بايلانىس ورناتقانىن حابارلادى. ولاردىڭ ءتىزىمى جا­سالعان, اۆتوكولىكتەردىڭ ورنالاسقان جەرى ناقتىلاندى. بۇدان بولەك, يندۋستريا جانە ينفراقۇرىلىمدىق دامۋ مينيسترلىگى مەن «قازاقستان تەمىر جولى» ۋكراينادا قالىپ قويعان 1007 جۇك ۆاگونىن ەلگە قايتارۋعا تالپىنىپ جاتىر. سونىمەن قاتار ۋكرايناعا بارار جولدا ءارتۇرلى جۇكتەر تيەلگەن 680 ۆاگون توقتاتىلعان. ونىڭ ىشىندە 371 ۆاگون باسقا باعىتتارعا جىبەرىلدى.

حالىقارالىق تاسىمالدارعا قاتىستى تۋىنداعان ماسەلەلەردى جەدەل شەشۋ ءۇشىن يندۋستريا جانە ينفرا­قۇرى­لىمدىق دامۋ مينيسترلىگى, «قازاقستان تەمىر جولى», ەلىمىزدەگى تەڭىز پورتتارى جانىندا جەدەل جەلى اشىل­عان. مۇددەلى تاراپتارمەن كەلىسسوزدەر جۇرگىزىلىپ جاتىر. ايتپاقشى, يندۋستريا جانە ينفراقۇرىلىمدىق دامۋ مينيسترلىگى اقتاۋ جانە قۇرىق پورتتارى قالىپتى رەجىمدە جۇمىس ىستەپ تۇرعانىن حابارلادى. جۇك تاسىمالى ازىرگە كىدىرگەن جوق.

قازاقستاندىق جۇك جونەلتۋشىلەر مەن تاسىمالداۋشىلاردى قولداۋ ماقساتىندا باكۋ, ماحاچكالا, اميراباد, انزالي سەكىلدى سەرىكتەس پورتتارمەن تىعىز بايلانىس ورنا­تىلعان. جالپى, ەلىمىزدىڭ پورتتارى 10 ملن تونناعا دەيىن قوسىمشا جۇك, سونىڭ ىشىندە 5,5 ملن توننا مۇنايدى تاسىمالداۋعا جىبەرۋگە قابىلەتتى.

وسى ورايدا, باتىس ەلدەرىنىڭ قازاقستانعا سانكتسيا سالۋعا نيەتتى ەمەس ەكەنىن ايتا كەتكەن ءجون. بۇل تۋرالى ۇلىبريتانيانىڭ قازاقستانداعى ەلشىسى كەتي ليچ قازاقستان سىرتقى ىستەر ءمينيسترىنىڭ ورىنباسارى رومان ۆاسيلەنكومەن وتكەن كەزدەسۋدە ايتتى. ۇلىبريتانيا تاراپى رەسەيدىڭ ۋكرايناداعى سوعىسىنا بايلانىستى قازاقستانعا قاتىستى قانداي دا ءبىر سانكتسيا ەنگىزۋگە نيەتتى ەمەس ەكەنىن راستادى.