ديماشتىڭ قولداۋىمەن ەلىمىزگە حالىقارالىق قايىرىمدىلىق ۇيىمىنىڭ كومەگى كەلىپ جەتتى

Project C.U.R.E. جوباسى بۇكىل الەم بويىنشا مەديتسينالىق قۇرالدار مەن جابدىقتاردى جەتكىزۋگە ارنالعان كوممەرتسيالىق ەمەس ۇيىم. جوبا قىزمەتى الەمنىڭ 135-تەن استام ەلىن قامتيدى جانە ونىڭ ىسكە اسىرىلۋىنا جىل سايىن 30 مىڭنان استام ۆولونتەر قاتىسادى.

قازاقستاننىڭ Project C.U.R.E جوباسىمەن بەلسەندى ىنتىماقتاستىعى 2020 جىلدىڭ جەلتوقسانىندا تانىمال قازاقستاندىق ءانشى ديماش قۇدايبەرگەننىڭ اقش-تاعى مەنەدجەرى دەۆيد ۆالەرا رەينوسونىڭ باستاماسىمەن جۇزەگە اسىرىلدى. ءانشىنىڭ MTV FRIDAY LIVESTREAM باعدارلاماسىنا قاتىسۋى, Project CURE, IPZ برەند ەلشىسى اتانۋى, سونداي-اق دۇنيەجۇزىلىك ازىق-ت ۇلىك باعدارلاماسى ارقىلى ايگىلى Michael Kors برەندىنىڭ يەسى مايكل كورسپەن سەرىكتەستىگى, اقش پرەزيدەنتىنىڭ يناۋگۋراتسياسىن تويلاۋ اپتالىعىندا «SCI» (Sister Cities International) شاراسىنىڭ اشىلۋى شەڭبەرىندە ونەر كورسەتۋى د.رەينوسونىڭ ىقپالىمەن ۇيىمداستىردى.

د.رەينوسونىڭ باستاماسىمەن 2021 جىلدىڭ 16 قاڭتارىندا TIXR امەريكاندىق پلاتفورماسىندا قايىرىمدىلىق اياسىندا ديماش قۇدايبەرگەننىڭ العاشقى ونلاين-كونتسەرتى ۇيىمداستىرىلدى.

قازاقستاندىق ءانشى مەن Project C.U.R.E جوباسىنىڭ بىرلەسكەن جۇمىسىنىڭ ناتيجەسىندە نۇر-سۇلتان قالاسىنىڭ «ۇلتتىق عىلىمي ونكولوگيالىق ورتالىعىنا» (ۇعوو) مەديتسينالىق قۇرال-جابدىقتار مەن ماتەريالدار جەتكىزىلدى. مەديتسينالىق ورتالىققا كەرەۋەتتەر, مۇگەدەكتەر اربالارى, حيرۋرگيالىق ماسكالار, قالپاقشالار, قولعاپتار, كوزىلدىرىك, بەت قورعانىسى, حالاتتار جانە N-95 بەتپەردەلەرى تاپسىرىلدى.

گۋمانيتارلىق كومەكتى جەتكىزۋ بويىنشا بارلىق جۇمىستى د.رەينوسو مەن جوبا ۇيلەستىرۋشىسى قىمبات جاقىپوۆا باسقاردى.

2022 جىلدىڭ 21 اقپانىندا «DimashAli» شىعارماشىلىق ورتالىعىنىڭ جەتەكشىسى قانات ايتباەۆ, قىمبات جاقىپوۆا جانە «DimashNews» رەداكتورلارى ۇعوو-عا جەتكىزىلگەن جۇكتى تەكسەرۋ ءۇشىن كەلىپ, ورتالىق قىزمەتكەرلەرىمەن سويلەستى.

كەزدەسۋ بارىسىندا ۇعوو باسقارما توراعاسىنىڭ ءبىرىنشى ورىنباسارى قانات ساتىباەۆ Project C.U.R.E. جوباسى شەڭبەرىندە جەتكىزىلگەن مەديتسينالىق جابدىقتار مەن ماتەريالدار ەمدەۋ پروتسەسىنە بەلسەندى تۇردە ەنگىزىلگەنىن ايتتى. توسەك-ورىندار پالاتالاردا ورناتىلىپ, مەديتسينالىق ماتەريالدار قولدانىلۋدا.

ونىڭ ايتۋىنشا كوروناۆيرۋستىق ينفەكتسيامەن اۋىراتىن ونكوگەماتولوگيالىق ناۋقاستارعا ارنالعان مامانداندىرىلعان بولىمشەدە جۇمىس ىستەۋ بارىسىندا جەكە قورعانىس قۇرالدارى ەرەكشە ءرول اتقاردى. ونكولوگيالىق ناۋقاستاردىڭ يممۋنيتەتتەرىنىڭ تومەن بولۋىنا بايلانىستى ولاردى جالپى ستاتسيونارلارعا جاتقىزۋ وتە قاۋىپتى. وسىعان وراي اتالعان ارنايى ءبولىم ۇعوو بازاسىندا اشىلدى.

بۇكىل الەمدى شارپىعان پاندەمياعا بايلانىستى مەديتسينالىق قۇرال-جابدىقتار سالىنعان قىرىق فۋت كونتەينەردى قازاقستانعا جەتكىزۋ ءبىر جىلعا جۋىق ۋاقىت الدى.

«ۇلتتىق عىلىمي مەديتسينالىق ورتالىق» باسشىلىعى د.رەينوسو مەن ديماشقا قولدان كەلگەن كومەگى ءۇشىن شەكسىز العىسىن ءبىلدىردى.

«بۇعان دەيىن ايتقانىمداي, ناۋقاستاردى COVID اۋرۋحاناسىنا جىبەرمەي ەمدەۋ ءۇشىن ءبىزدىڭ ورتالىقتىڭ بازاسىندا ونكولوگيالىق ناۋقاستارعا ارنالعان COVID ءبولىمى اشىلدى. Project C.U.R.E. جوباسى كورسەتكەن گۋمانيتارلىق كومەكتى ءبىز بەلسەندى پايدالاندىق. قازىر ەپيدەميولوگيالىق جاعدايدىڭ تۇراقتانۋىنا بايلانىستى COVID-19 ءبولىمى جابىلىپ جاتىر, بىراق ءبىز, ارينە, پاتسيەنتتەرىمىزدىڭ يگىلىگى ءۇشىن بارلىق ماتەريالدار مەن جابدىقتاردى بەلسەندى تۇردە پايدالانۋدى جالعاستىرامىز», - دەدى قانات ساتىباەۆ.