الماتى قالاسى ءالى دە ىندەتتەن تولىق ارىلعان جوق. دەگەنمەن كۇن سايىن ىندەتكە شالدىققاندار قاتارى ازايىپ كەلەدى. مەگاپوليستە پاندەميانى اۋىزدىقتاۋدا اق حالاتتى مامانداردىڭ ەڭبەگى ەرەن ەكەندىگىن مويىنداۋ كەرەك. ەكى جىل بۇرىن ەلىمىزدە ىندەت باستالعاندا ايلاپ, اپتالاپ ءۇيىنىڭ بەتىن, بالا-شاعاسىن كورمەي ەڭبەك ەتكەن دە ينفەكتسيالىق دارىگەرلەر.
جۋىردا الماتى قالاسىنداعى ي.جەكەنوۆ اتىنداعى كلينيكالىق جۇقپالى اۋرۋلار اۋرۋحاناسىندا دامەش قاراتاەۆا جۇزگە تولعانىن دا اتاپ ءوتىپ, ىندەتتەن دە ايىعىپ, دارىگەرلەرگە العىسىن جاۋدىرىپ, ۇيىنە قايتتى. عاسىر جاساعان كەيىپكەرىمىز 5 اقپان كۇنى اۋرۋحاناعا اۋىر حالدە تۇسكەن بولاتىن. دارىگەرلەردىڭ ايتۋىنشا, ءالسىز ناۋقاس بىردەن ينتەنسيۆتى تەراپيا بولىمشەسىندە ەم الا باستاعاننان كەيىن بەتى بەرى قاراعان.
«مەنى ەمدەپ, قولداۋ بىلدىرگەن بارلىق اق حالاتتى ابزال جاندارعا راحمەتىمدى ايتامىن, اينالايىندار! ءومىر جاستارىڭ ۇزاق بولسىن! مەنىڭ جاسىمدى بەرسىن, ءاۋمين! ەلىمىز تىنىش بولىپ, كوركەيە بەرسىن», دەپ باتاسىن بەردى ۇيىنە قايتىپ بارا جاتقان 100 جاستاعى كەيۋانا دامەش قاراتاەۆا.
«ناۋقاسقا كوروناۆيرۋستىق ينفەكتسيا دياگنوزى قويىلىپ, وكپەسى زاقىمدانعان كەزدە اۋرۋحاناعا ءتۇستى. اۋرۋدى جەڭۋدەگى باستى جايت – اجەيدىڭ ومىرگە دەگەن قۇشتارلىعى بولدى», دەيدى ي.جەكەنوۆ اتىنداعى كلينيكالىق جۇقپالى اۋرۋلار اۋرۋحاناسىنىڭ 1-ساناتتى دارىگەرى دانيا ناسىربەكوۆا.
«اجەمىز ءبىر اپتا بويى جوتەلىپ قويماعان سوڭ, ۋايىمداپ, كت اپپاراتىنا تۇسىردىك. وكپەسى 25% زاقىمدانعان. ءوزىم دارىگەر بولعان سوڭ باسقا دارىگەرلەرمەن كەڭەسىپ, جەدەل تۇردە اۋرۋحاناعا جاتقىزدىق. تەلەفونمەن سويلەسكەن كەزدە جاعدايىنىڭ جاقسارعانىن بايقادىم. اجەمىزدىڭ قانشاما نەمەرەسى, شوبەرە, شوپشەگى بار, ءبارى دە اق حالاتتى جاندارعا العىستارىن ايتىپ جاتىر», دەدى دامەش قاراتاەۆانىڭ نەمەرەسى نۇربول جۇمابەكوۆ.
ايتقانداي, دامەش اجە ءوزىنىڭ 100-گە كەلگەن تۋعان كۇنىندە اۋرۋحانادان شىعىپ وتىر. قوس قۋانىشى قاتار كەلگەن كەيۋانانى اۋرۋحانا ماماندارى گۇل شوقتارى مەن سىيلىقتارىن بەرىپ, شىعارىپ سالدى. ال اسىل اجەلەرىنىڭ شاڭىراقتارىنا امان-ەسەن ورالعانى ءۇشىن جاقىندارى اۋرۋحانا اكىمشىلىگىنە زور العىستارىن ايتادى.
الماتى