WBO تۇجىرىمى بويىنشا ورتا سالماقتاعى الەم چەمپيونى بەلدىگىنەن باستى ۇمىتكەر, وتانداسىمىز جانىبەك ءالىمحان ۇلى جاقىن ارادا برازيليالىق ەسكيۆا فالكاومەن جۇدىرىقتاسپايتىن سەكىلدى, دەپ حابارلايدى Egemen.kz.
وسىدان ءبىرشاما ۋاقىت بۇرىن بۇكىلالەمدىك بوكس ۇيىمى ەكى بوكسشى اراسىندا الەمنىڭ ۋاقىتشا چەمپيونى اتاعى ءۇشىن شايقاس وتكىزىلەتىنىن مالىمدەگەن ەدى. الايدا Top Rank پروموۋتەرلىك ۇيىمى ءوز بوكسشىلارىنىڭ شارشى الاڭدا كەزدەسكەنىن قالامايتىن سەكىلدى. مۇنى الەۋمەتتىك جەلىلەر ارقىلى فالكاونىڭ ءوزى دە تۇسپالداپ جەتكىزگەن ەدى. «جانىبەك, ەكەۋمىزدىڭ كەزدەسۋىمىز ماعان ەمەس, ءبىزدىڭ كوماندامىزعا, Top Rank پروموۋتەرلىك ۇيىمىنا بايلانىستى ەكەنىن جاقسى بىلەسىڭ» دەپ جازعان بولاتىن فالكاو.
فالكاوعا قارسى جەكپە-جەكتىڭ ءوتۋى ەكىتالاي ەكەنىن جانىبەكتىڭ ءوزى دە راستادى.
«ازىرگە ەشقانداي جاڭالىق جوق. سوعان قاراعاندا مەن مۇلدە باسقا قارسىلاسپەن جۇدىرىقتاساتىن سەكىلدىمىن. كىممەن قولعاپ تۇيىستىرەتىنىمدى بىلمەيمىن. ماعان ءبارىبىر, كەز كەلگەن قارسىلاستى جەڭۋگە ءازىرمىن. ويتكەنى ماعان الەم چەمپيونى اتاعى كەرەك», دەپ جازدى قازاق بوكسشىسى تۆيتتەردە.