سەناتتىڭ اگرارلىق ماسەلەلەر, تابيعاتتى پايدالانۋ جانە اۋىلدىق اۋماقتاردى دامىتۋ كوميتەتىنىڭ دەپۋتاتتارى اقمولا وبلىسىنىڭ تسەلينوگراد اۋدانىندا كوشپەلى وتىرىس وتكىزدى, دەپ حابارلايدى Egemen.kz قر پارلامەنتى سەناتىنىڭ ءباسپاسوز قىزمەتىنە سىلتەمە جاساپ.
سەناتورلار اۋىل شارۋاشىلىعى مينيسترلىگىنىڭ, جوعارى وقۋ ورىندارىنىڭ وكىلدەرىمەن جانە فەرمەرلەرمەن بىرلەسە وتىرىپ تسيفرلاندىرۋدى, عارىش مونيتورينگى تەحنولوگياسىن ەنگىزۋ جانە اۋىل شارۋاشىلىعى جەرلەرىن قاشىقتان زوندتاۋعا قاتىستى ماسەلەلەردى تالقىلادى.
سەنات كوميتەتىنىڭ حاتشىسى اقىلبەك كۇرىشباەۆ اگرارلىق سالانى دامىتۋدا اۋىل شارۋاشىلىعى پروتسەستەرىن تسيفرلاندىرۋدىڭ ماڭىزى زور ەكەنىن, مەملەكەت باسشىسى قاسىم-جومارت توقاەۆ ءوزىنىڭ قازاقستان حالقىنا جولداۋىندا اوك-كە جوعارى تەحنولوگيالاردى ەنگىزۋ مىندەتتەرىن سول ءۇشىن دە قويعانىن اتاپ ءوتتى.
«اۋىل شارۋاشىلىعىن تسيفرلاندىرۋدىڭ باستى مىندەتى – ءونىمدى وندىرۋگە جۇمسالاتىن شىعىنداردى ازايتۋ, ونىڭ ساپاسىن ارتتىرۋ جانە سىبايلاس جەمقورلىققا جول بەرمەۋ بولىپ وتىر. بۇل تۇرعىدا تسيفرلىق تەحنولوگيالاردى ەنگىزۋدىڭ الەمدىك تاجىريبەسىن قولدانۋ ايتارلىقتاي ەكونوميكالىق تيىمدىلىككە قول جەتكىزەدى», دەپ اتاپ ءوتتى سەناتور اقىلبەك كۇرىشباەۆ ءوز سوزىندە.
ەلىمىزدىڭ اۋىل شارۋاشىلىعى مينيسترلىگىنىڭ وكىلدەرى كەزدەسۋ بارىسىندا وسى باعىتتا جۇرگىزىلىپ جاتقان بۇگىنگى تاڭداعى جۇمىستار تۋرالى ايتىپ بەردى. اوك مەملەكەتتىك قىزمەتتەرىن دامىتۋ جانە تسيفرلاندىرۋ دەپارتامەنتىنىڭ ديرەكتورى بەرنات الپىسبەكوۆتىڭ ايتۋىنشا, ەلىمىزدىڭ مال شارۋاشىلىعىنداعى سەلەكتسيالىق جۇمىستار مەن اسىل تۇقىمدى ەسەپكە الۋ پروتسەسىن تسيفرلاندىرۋ Plem.kz سايتىندا جۇزەگە اسۋدا.
«بۇدان باسقا, اۆتوماتتاندىرىلعان «E-Agriculture» بىرىڭعاي جۇيەسى قىزمەتىنىڭ ارقاسىندا بيزنەس-پروتسەستەردى تسيفرلاندىرۋ ارقىلى اۋىل شارۋاشىلىعى تاۋارىن وندىرۋشىلەردىڭ راسىمدەرى ايتارلىقتاي جەڭىلدەدى. اۋىل شارۋاشىلىعىنداعى وتاندىق وندىرۋشىلەر مەن ىشكى جانە سىرتقى ساۋداعا باسقا دا قاتىسۋشىلار مەملەكەتتىك مەكەمەلەرگە بارماي-اق ەلەكتروندىق ىلەسپە قۇجاتتاردى الۋعا مۇمكىندىگى بار», دەپ اتاپ ءوتتى ول.
كەزدەسۋگە قاتىسقان اۋىل شارۋاشىلىعى تاۋارىن وندىرۋشىلەر وزدەرىنىڭ وندىرىستىك پروتسەستەرىن تسيفرلاندىرۋعا الدەقاشان كىرىسكەندەرىن اتاپ ءوتتى. مىسالى, «اتامەكەن-اگرو» كومپانياسىندا تسيفرلاندىرۋ پروتسەسى 2014 جىلى ىسكە قوسىلدى. قازىر ولار كاسىپورىندا جەردى قاشىقتىقتان زوندتاۋدىڭ جانە ەگىستىكتەرگە سپۋتنيكتىك مونيتورينگ جۇرگىزۋدىڭ زاماناۋي جۇيەسىن پايدالانادى.
پارلامەنتشىلەر اقمولا وبلىسىن ارالاۋ بارىسىندا تسيفرلىق تەحنولوگيالاردى كۇندەلىكتى ومىردە قولداناتىن جەرگىلىكتى قۇس فابريكاسىنىڭ جۇمىسىمەن تانىستى. كاسىپورىن الاڭىندا جۇمىس ىستەيتىن ورتالىق ديسپەتچەرلىك قىزمەت دەپۋتاتتارعا اۆتوپاركتى باسقارۋدى وڭتايلاندىرۋ مەن بەينەباقىلاۋ جۇيەسى جانە كولىكتى GPS-قاداعالاۋ قۇرىلعىسى ارقىلى شىعىنداردى قىسقارتۋ مۇمكىندىگىن پايدالاناتىنىن ايتىپ بەردى.
«اۋىل شارۋاشىلىعى ءوندىرىسىنىڭ وكىلدەرى ەگىس القاپتارىن ۇلعايتۋ, سۋارۋ, مال شارۋاشىلىعى مەن وسىمدىك شارۋاشىلىعىن دامىتۋ تۇرعىسىندا پروتسەستەردى تسيفرلاندىرۋدىڭ كوپتەگەن وڭ مىسالدارىن العا تارتتى. شىنىندا دا بۇل تاقىرىپ اسا ماڭىزدى. سەناتورلار اوك-ءتى جاقسارتۋ جونىندەگى زاڭنامالىق بازانى ودان ءارى دامىتۋ ءۇشىن وسى ۇسىنىستاردى پايدالاناتىن بولادى», دەدى سەناتور ولگا بۋلاۆكينا.
«شاڭىراق» باسقارۋشى كومپانياسى» جشس بايقاۋشىلار كەڭەسىنىڭ توراعاسى, قازاق ۇلتتىق اگرارلىق زەرتتەۋ ۋنيۆەرسيتەتىندەگى اگرويننوۆاتسيا جانە ەكولوگيا عىلىمي-زەرتتەۋ ينستيتۋتىنىڭ ديرەكتورى, س.سەيفۋللين اتىنداعى قازاق اگروتەحنيكالىق ۋنيۆەرسيتەتى كەاق باسقارما توراعاسى-رەكتورى جانە باسقالار بايانداما جاساپ, ۇسىنىستارىن ايتتى.
سەناتورلار كوشپەلى كەزدەسۋدى قورىتىندىلاي كەلە, وسى شارا بارىسىندا ايتىلعان ۇسىنىستار مەن ماسەلەلەر دوڭگەلەك ۇستەل بارىسىندا تالقىلانىپ, ۇسىنىم تۇرىندە ۇكىمەتكە جىبەرىلەتىنىن اتاپ ءوتتى.