جاقىندا الەۋمەتتىك جەلىنى پاراقتاپ وتىرىپ, وبلىستىق تاريحي-ولكەتانۋ مۋزەيىندە تۇرعان ءبىر جادىگەر جايلى قىزىق مالىمەتكە جولىقتىق. قىزىعى سول, 1986 جىلى كەڭەس وداعىنىڭ اۆتوكولىك وندىرىسىندەگى ءىرى كاسىپورىن گوركي اۆتوموبيل زاۋىتىنان گاز-24 ماركاسىمەن نەبارى 4 «چايكا» كولىگى شىعارىلادى. سونىڭ ءبىرى حالىق شارۋاشىلىعىنداعى ەڭ جوعارى كورسەتكىشتەرگە جەتكەن قىزىلوردا وبلىسىنا بۇيىرىپتى.
سول تۇستا وبلىستىق پارتيا كوميتەتىن سوتسياليستىك ەڭبەك ەرى ەركىن اۋەلبەكوۆ باسقارىپ وتىرعان-دى. كولىكتى جەتكىزۋ وبلىستىق اتقارۋ كوميتەتىنىڭ توراعاسى ۆيتالي برىنكينگە جۇكتەلىپتى.
سونىمەن تاپسىرمانى ورىنداۋعا جىبەرىلگەندەردى ۆنۋكوۆو اسكەري اەروپورتىنان كۇتىپ العاندار جابىق عيماراتقا اكەلىپ, قاتار تۇرعان 4 كولىكتىڭ بىرەۋىن تاڭداتادى. سول جەردەن اسكەري ۇشاققا تيەلگەن «چايكا» بايقوڭىرعا جەتكىزىلىپ, عارىشكەرلەر قالاسىندا كولىككە وتىرعان جۇرگىزۋشىلەر وبلىستىق پارتيا كوميتەتىنىڭ گاراجىنا كىرگىزەدى. سول كۇننەن ەشكىم مىنبەگەن قىمبات كولىك 2005 جىلى وبلىستىق تاريحي ولكەتانۋ مۋزەيىنە سىي رەتىندە تاپسىرىلىپتى.
– حالىقارالىق مۋزەيلەر كۇنىنە وراي جىل سايىن «مۋزەيگە سىي» اكتسياسىن وتكىزىپ, كەلۋشىلەر وسى كولىكتى تاماشالايدى. بالالار دا, ۇلكەندەر دە سيرەك كولىككە ءمىنىپ, سۋرەتكە تۇسەدى, – دەيدى مۋزەيدىڭ باس قور ساقتاۋشىسى امانكۇل دۇيسەنبايقىزى.
ۇزاق جىل گاراجدا تۇرعان قىمبات اۆتوكولىكتى وبلىستىق پارتيا كوميتەتىنەن, كەيىن ونىڭ ورنىن باسقان اكىمدىكتەن ەشكىمنىڭ ىزدەمەگەنى, پايدالانباعانى تۇسىنىكسىز بولىپ وتىر. جالپى, تەحنيكاعا قاتىستى مالىمەتتىڭ ءبارىن زەرتتەپ, قاتتاپ جۇرەتىن رەسەيلىكتەردىڭ دەرەگىنشە سول ەلدەن شىققان كولىك جىلىنا ورتا ەسەپپەن 17 500 شاقىرىم جول ءجۇرۋ كەرەك ەكەن. ال مۋزەي اۋلاسىندا تۇرعان «چايكانىڭ» كيلومەرتاجى 36 جىلدا بار بولعانى 18 220 شاقىرىم جۇرگەنىن كورسەتىپ تۇر.
قىزىلوردا