ۇكىمەتتىڭ جەدەل قابىلداعان شارالارىنىڭ ناتيجەسىندە, الماتى قالىپتى تىرشىلىگىنە ورالىپ كەلەدى. ەگەر وتكەن اپتادا الماتىدا 200-دەن اسا كاسىپكەر قاڭتاردا كورگەن شىعىندارى ءۇشىن وتەماقى تولەمدەرىن السا, شوب سۋبەكتىلەرىنە كەلتىرىلگەن شىعىندى وتەۋ جونىندەگى وڭىرلىك كوميسسيانىڭ 6 اقپانداعى وتىرىسىندا جالپى سوماسى 85,7 ملن تەڭگەنى قاجەت ەتەتىن تاعى 39 ءوتىنىم ماقۇلداندى. ونىڭ ىشىندە قۇنى 8,4 ملن تەڭگە بولاتىن 5 ءوتىنىم بيۋدجەت قاراجاتىنان, 34 كاسىپكەردىڭ 77,3 ملن تەڭگە شىعىنى «جاڭا الاتاۋ» قايىرىمدىلىق قورى ارقىلى وتەلدى.
كوميسسيانىڭ جۇمىسى باستالعاننان بەرى بارلىعى 456,1 ملن تەڭگە سوماعا 260 ءوتىنىم ماقۇلدانسا, ونىڭ ىشىندە بيۋدجەت قاراجاتىنان 157,1 ملن تەڭگەگە 108 ءوتىنىم, قور قارجىسىنان 299 ملن تەڭگەگە 152 ءوتىنىم قاناعاتتاندىرىلدى. ءبىرىنشى كەزەكتە 5 ملن تەڭگەگە دەيىنگى تولەم سوماسىمەن مايدا جانە شاعىن بيزنەستەن تۇسكەن وتىنىمدەر جەدەل قارالۋدا.
ايماقتىق كوميسسيا بيزنەسكە كەلتىرىلگەن شىعىندى وتەۋ جونىندەگى قولدانىستاعى تەتىككە تۇزەتۋلەر ەنگىزۋدى جالعاستىرىپ جاتقانىن بۇعان دەيىن دە حابارلاعان ەدىك. ماسەلەن, ەگەر بۇرىن وڭىرلىك كوميسسيانىڭ ۇسىنىسى بويىنشا وتەماقى جەكە اۋديتورلار مەن باعالاۋشىلاردىڭ قىزمەتتەرىنە ارنالعان شىعىنداردى قامتىسا, ەندى سوت ساراپتاماسىن جۇرگىزۋ ءۇشىن بيۋدجەت قارجىسى ەسەبىنەن جەكە ادۆوكاتتارعا ارنالعان شىعىندار دا تولەنۋى مۇمكىن.
«قىلمىستىق ءىس جۇرگىزۋ كودەكسىنىڭ قولدانىستاعى نورمالارىنا سايكەس سوت ساراپتاماسىن جۇرگىزۋگە ماتەريالداردى دايىنداۋعا تەرگەۋشى عانا ەمەس, ونىڭ سۇراۋى بويىنشا ادۆوكات تا جىبەرىلەدى. قازىرگى كەزدە تەرگەۋشىلەردىڭ جۇمىسى كوپ ەكەنىن ەسكەرە وتىرىپ, سوت ساراپتاماسىن جۇرگىزۋدى جەدەلدەتۋ جانە وتەماقى تولەمىن الۋ ماقساتىندا تارتىپسىزدىك كەزىندە زارداپ شەككەن كاسىپكەرلەرگە جەكە ادۆوكاتتاردىڭ قىزمەتىنە جۇگىنۋدى ۇسىنامىز. قازىر كاسىپكەرلەر بۇل قىزمەتتەردى ءوز قارجىسى ەسەبىنەن تولەي الادى, الايدا ءبىز بيۋدجەت قاراجاتى ەسەبىنەن شىعىندى وتەۋگە ادۆوكاتتىق قىزمەتتەرگە ارنالعان شىعىستاردى قوسۋ جونىندە ۇسىنىس ازىرلەپ جاتىرمىز. بۇل شارا زارداپ شەككەن بيزنەسكە مەملەكەتتىك قولداۋ كورسەتۋدى كەڭەيتۋگە جانە قالا ەكونوميكاسىن ودان ءارى قالپىنا كەلتىرۋدى جەدەلدەتۋگە مۇمكىندىك بەرەدى», دەدى شوب سۋبەكتىلەرىنە كەلتىرىلگەن زالالدى وتەۋ جونىندەگى وڭىرلىك كوميسسيانىڭ توراعاسى, الماتى قالاسى كاسىپكەرلىك جانە ينۆەستيتسيالار باسقارماسىنىڭ باسشىسى ەركەبۇلان ورازالين.
الماتى