جۇكتى ايەلدەردى ىندەتتەن ەمدەۋدىڭ ءجونى بولەك

اقپاننىڭ العاشقى كۇنىندە الماتىدا ىندەت ايتارلىقتاي ازايعانىن ايتا كەتۋ كەرەك. ماسەلەن, 1 اقپاندا كوروناۆيرۋس ينفەكتسياسىن جۇقتىرعاندار سانى 1 037 بولسا, ءبىر كۇن بۇرىن 31 قاڭتاردا 1 556 ادامنان ىندەت تابىلعان ەدى. جالپى, وتكەن ايدا ەپيدەميالىق احۋال ناشارلاعاندىقتان, جۇك­تى ايەلدەردىڭ ەمىنە ەرەكشە كوڭىل ءبولىنىپ, №1 قالالىق كلينيكالىق اۋرۋحاناسىندا 20 قاڭتاردان باستاپ جۇقپالى اكۋشەرلىك بلوك اشىلدى.

«جۇقپالى اكۋشەرلىك ءبولىم ىندەت جۇق­تى­رىپ العان اياعى اۋىر جانە جاس بوسانعان ايەلدەرگە قىزمەت كورسەتەدى. ارنايى بلوك 80 توسەكتىك ورىنمەن جابدىقتالعان. ونىڭ ىشىندە ەرەسەكتەردىڭ 8 رەانيماتسيا توسەگى مەن جاڭا تۋعان نارەستەلەرگە ارنالعان 6 رەانيماتسيالىق كەرەۋەت قويىلعان بولەك اكۋشەرلىك وپەراتسيا بولمەسى بار. بوسانۋ بولىمشەسىن جابدىقتاپ, قامتاماسىز ەتۋگە الماتىداعى بارلىق پەرزەنتحانا مەن كوپسالالى اۋرۋحانا كومەك كورسەتتى», دەيدى №1 قالالىق كلينيكالىق اۋرۋحانانىڭ باسقارما توراعاسى – باس دارىگەرى ەرنەست قاليەۆ.

ستاتسيوناردا كومپيۋتەرلىك توموگرافيا, ۋلترادىبىستىق دياگنوستيكا, سپيروگرافيا جۇرگىزىلەدى. جۇقپالى اكۋشەرلىك بلوك اۋرۋحانانىڭ ورتالىقتاندىرىلعان مەديتسينالىق وتتەگىمەن قامتاماسىز ەتىلگەن.

قىسقاسى, ىندەت جۇقتىرعان جۇكتى ايەلدەر مەن ولاردىڭ جاڭا تۋعان نارەستەلەرى مەديتسينا ماماندارىنىڭ ەرەكشە كۇتىمىنە مۇقتاج بولعاندىقتان, اكۋشەرلىك بولىمشە قانداي جاعداي بولسا دا كومەك بەرۋگە بەيىمدەلىپ وتىر.

جۇقپالى اكۋشەرلىك بولىمشەسىنىڭ باسشىسى ساۋلە قابىلوۆا دا الماتى قالاسىنىڭ پەرزەنتحانالار مەن قالالىق دەنساۋلىق ساقتاۋ مەكەمەسى 3-دەڭگەيلى پەريناتالدىق كومەك ۇيىمداستىرۋعا بارلىق جاعىنان كو­مەككە كەلگەنىن ايتادى. بۇل, اسىرەسە, COVID-19 جۇقتىرعان جۇكتى ايەلدەردىڭ دەن­ساۋ­­لىعىنا بايلانىستى قوسىمشا ماسە­لە­لەر تۋىنداعان كەزدە اسا ماڭىزدى.

دارىگەرلەر ءوز تاجىريبەلەرىندە كوروناۆيرۋس ينفەكتسياسىن جۇقتىرعان جۇكتى ايەلدىڭ باسقا اياعى اۋىر ايەلدەرمەن سالىستىرعاندا جاعدايى كۇردەلى جانە COVID-19 اۋىر تۇرلەرىنىڭ دامۋ قاۋپى جوعارى بولاتىنىن بىلەدى. ونىڭ ۇستىنە ىندەتكە شالدىققان اياعى اۋىر ايەلدەر اي-كۇنى تولماي جاتىپ بوسانۋى ابدەن مۇمكىن ەكەنىن دە نازاردا ۇستاۋ كەرەك.

الماتى