بويداعى كىناراتتىڭ جەڭىلى بولماسا دا, كەسەلدىڭ ەڭ ىڭعايسىزى, جاعىمسىزى – كوتەۋ. ەر-ازاماتتاردا دا, ايەل ادامداردا دا ءجيى كەزدەسەتىن بۇل دەرتتىڭ شىعۋ سەبەپتەرى دە, ەمدەۋ جولدارى دا كوپ. ەندى باستالسا, ەمدەۋ قيىن ەمەس, الايدا اسقىنىپ كەتسە, سوڭى وپەراتسيا زالىنان ءبىر-اق شىعارادى.
ال قازىرگى زاماناۋي مەديتسيناعا كەلسەك, تاياۋ كۇندەرى الماتىداعى قالقامان شاعىن اۋدانىنداعى №7 اۋرۋحانا دارىگەرلەرى كوتەۋگە كۇردەلى ەندوۆاسكۋليارلىق وپەراتسيا جاسادى.
بەس جىلدان بەرى جانى قينالىپ جۇرگەن 46 جاستاعى پاتسيەنت اۋرۋحاناعا تىك ىشەگىنەن قان كەتكەننەن كەيىن حابارلاسقان. سوڭعى ايلاردا سوزىلمالى گەموررويى اسقىنىپ, دارەتكە وتىرۋى مۇلدەم ازاپقا اينالعان. دارىگەرلەر ءتيىستى دياگنوستيكالىق تەكسەرۋلەردەن وتكىزگەننەن كەيىن وعان ءىى دارەجەلى سوزىلمالى گەمورروي دياگنوزىن قويىپ, وپەراتسيا جاساۋعا شەشىم قابىلدادى. وسىلايشا, پاتسيەنتتىڭ تىك ىشەك ارتەريالارىنا ەندوۆاسكۋليارلىق ەمبوليزاتسيا جاسالدى.
پروكتولوگ مامان مارات كالەنباەۆتىڭ سوزىنە سۇيەنسەك, وپەراتسيانىڭ بۇل ءتۇرى كادىمگى ءداستۇرلى وپەراتسيانىڭ قاۋىپسىز بالاماسى ەكەن.
«بۇل پروتسەدۋرا ناركوزسىز جاسالادى. جانە توق ىشەكتى الدىن الا دايىنداۋدىڭ قاجەتى جوق. زاقىمسىز وتانىڭ ناتيجەسىندە پاتسيەنت بىرنەشە ساعاتتان كەيىن ورنىنان تۇرىپ جۇرە باستايدى, دارەتكە دە قينالماي بارادى. وپەراتسيا جۇرگىزىلگەن كەزدە تىلىك جاسالمايتىندىقتان, وتانىڭ ورنى اۋىرمايدى, ءارى جارا بولمايدى», دەيدى م.كالەنباەۆ.
جالپى, كلينيكانىڭ ينتەرۆەنتسيالىق حيرۋرگيا ءبولىمىنىڭ مەڭگەرۋشىسى ساكەن انارتاەۆ جەتەكشىلىك ەتكەن مۇنداي تىك ىشەك ارتەريالارىنىڭ ەندوۆاسكۋليارلىق ەمبوليزاتسياسى تۇڭعىش رەت جاسالىپ وتىر. ەڭ قۋانىشتىسى, بۇل وپەراتسيادان كەيىن پاتسيەنت كوپ ۇزاماي ساۋىعىپ, وتباسىنا ورالدى.
مامانداردىڭ ايتۋىنشا, اتالعان ەمدەۋ ءتاسىلى 1, 2 جانە كەيدە 3-ساتىداعى سىرقاتتارعا قولدانىلادى. پاتسيەنت پروكتولوگ-دارىگەرگە قانشالىقتى ەرتە قارالسا, قاۋىپسىز ءتاسىلدى قولدانىپ ەمدەۋ مۇمكىندىگى دە جوعارى بولماق.
مۇنداي يننوۆاتسيالىق وپەراتسيا ءمامس اياسىندا دا قالالىق №7 اۋرۋحانادا تۇڭعىش رەت جاسالدى. قولداعى زاماناۋي تەحنولوگيالار مەن جوعارى بىلىكتى مامانداردىڭ ارقاسىندا وپەراتسيا ءساتتى شىقتى.
الماتى