قىزىلورداداعى وڭىرلىك كوممۋنيكاتسيالار قىزمەتىندە وبلىستىق پوليتسيا دەپارتامەنتى باستىعىنىڭ ورىنباسارى, پوليتسيا پولكوۆنيگى بايجان بايگەلدى باق وكىلدەرى ءۇشىن بريفينگ وتكىزدى.
وڭىردە جاپپاي تارتىپسىزدىك پەن قارۋلى شابۋىل كەزىندە جالپى 18 عيمارات, 147 اۆتوكولىك, (ونىڭ 119-ى مەملەكەتتىك) ءبۇلىنىپ, «م-لومبارد», «اقمەرگەن» اڭشىلىق دۇكەندەرى تونالعان. بۇزاقىلار ىشكى ىستەر ورگانىندا ساقتاۋدا تۇرعان قارۋ-جاراقتاردى يەلەنۋ ءۇشىن پوليتسيانىڭ وبلىس ورتالىعىنداعى 3 عيماراتىنا قارۋلى شابۋىل جاساپتى.
دەپارتامەنت باسشىسىنىڭ ورىنباسارى 210 ادامنىڭ دەنە جاراقاتتارىمەن اۋرۋحانالارعا كورىنگەنىن اتاپ ءوتتى. جالپى, قازاقستان رەسپۋبليكاسىنىڭ قىلمىستىق كودەكسىنىڭ كىسى ءولتىرۋ, تەرروريستىك اكتى, جاپپاي تارتىپسىزدىك, قاراقشىلىق, بيلىك وكىلىنە كۇش قولدانۋ سەكىلدى باپتارى بويىنشا 59 قىلمىستىق ءىس تىركەلىپ وتىر.
– جاپپاي تارتىپسىزدىك جانە قارۋلى شابۋىل قىلمىسىنا قاتىسى بار دەگەن كۇدىكپەن 99 ادام ۇستالىپ, ولارعا ادۆوكاتتار بەلگىلەندى. سونداي-اق پوليتسيا قىزمەتكەرلەرى تاراپىنان زاڭسىز ءىس-ارەكەتتەردى بولدىرماۋ ءۇشىن بارلىق ۇستالعاندار سوت-مەديتسينالىق ساراپتامادان وتكىزىلىپ, وسىدان كەيىن عانا قاماۋعا الۋ شارالارى قابىلداندى. قازىر 22 ادام قاماۋدان بوساتىلدى, ونىڭ ىشىندە تەرگەۋ ورگانىنىڭ وتىنىشىمەن الەۋمەتتىك جاعدايى مەن دەنساۋلىق جاعدايىنا بايلانىستى, 2 ايەل جانە 1 ەر ازاماتتىڭ باس شاراسى جەڭىل تۇرىنە, ياعني ۇيقاماققا وزگەرتىلدى, – دەدى دەپارتامەنت باستىعىنىڭ ورىنباسارى.
دۇربەلەڭدى پايدالانىپ, لومباردتان جالپى قۇنى 300 ملن تەڭگە بولاتىن التىن بۇيىمدار, اڭشىلىق دۇكەنىنەن 6 ملن 212 مىڭ تەڭگەنىڭ زاتتارىن جىمقىرىپ كەتكەندەر دە انىقتالىپ وتىر. كۇدىكتى رەتىندە قىزىلوردا قالاسىنىڭ 5 تۇرعىنى ۇستالىپ, قاماۋعا الىنعان.
قازىر وزىندىك قاۋىپسىزدىك باسقارماسىنا ازاماتتاردان پوليتسيا ورگاندارى قىزمەتكەرلەرىنىڭ ارەكەتىنە قاتىستى تۇسكەن 25 ارىز بويىنشا تەكسەرۋ جۇمىستارى جۇرگىزىلۋدە.
دەپارتامەنت باستىعىنىڭ ورىنباسارى تۇرعىنداردى سابىر ساقتاپ, تەرگەۋ ورگانىنىڭ ارەكەتىنە تۇسىنىستىكپەن قاراۋعا شاقىردى. بارلىق تەرگەۋ ارەكەتتەرى زاڭ شەڭبەرىندە جانە تولىق جۇرگىزىلەتىنىنە سەندىردى.
قىزىلوردا