كەشە قازاقستان رەسپۋبليكاسى پارلامەنتى سەناتىنىڭ توراعاسى قاسىم-جومارت توقاەۆ حالىقارالىق بەيبىتشىلىك ينستيتۋتىنىڭ پرەزيدەنتى تەرە رود-لارسەنمەن كەزدەستى, دەپ حابارلادى سەناتتىڭ ءباسپاسوز قىزمەتى.
بەلگىلى نورۆەگ ديپلوماتى, بۇۇ باس حاتشىسىنىڭ بۇرىنعى ورىنباسارى جانە تاياۋ شىعىستاعى بەيبىت رەتتەۋ جونىندەگى بۇۇ-نىڭ ارناۋلى ۇيلەستىرۋشىسى ت.رود-لارسەن ءوزى باسقارىپ وتىرعان حالىقارالىق بەيبىتشىلىك ينستيتۋتىنىڭ ساراپتامالىق قىزمەتى مەن جوبالارى تۋرالى بايانداپ بەردى.
جۇزدەسۋشىلەر قازىرگى زامانداعى حالىقارالىق قاتىناستار, قاۋىپسىزدىك جانە حالىقارالىق قۇقىقتىڭ وزەكتى ماسەلەلەرى, سونداي-اق, قۇبىلمالى الەمدەگى بىرىككەن ۇلتتار ۇيىمىنىڭ ءرولى تۋرالى پىكىر الماستى.
سول كۇنى ق.توقاەۆ جاپونيانىڭ قازاقستانداعى ەلشىسى ماساەسي كاموحارانى دا قابىلدادى. پارلامەنتارالىق بايلانىستاردىڭ كەلەشەگى مەن ەكىجاقتى ەكونوميكالىق جانە ينۆەستيتسيالىق ىنتىماقتاستىقتىڭ ماسەلەلەرى تالقىلاندى. ق.توقاەۆتىڭ پىكىرىنشە, جاپونيا پرەمەر-ءمينيسترى شيندزو ابەنىڭ قازاقستانعا جوسپارلانىپ وتىرعان ساپارى قازاقستان مەن جاپونيا قاتىناستارىنداعى ماڭىزدى وقيعا رەتىندە ءوزارا تيىمدىلىككە قۋاتتى سەرپىن بەرەتىن بولادى.