WBO تۇجىرىمى بويىنشا ءبىرىنشى جارتىلاي ورتا سالماق دارەجەسىندەگى الەمنىڭ بۇرىنعى چەمپيونى رۋسلان پروۆودنيكوۆ كاسىپقوي بوكسشى رەتىندەگى مانسابىن اياقتادى, دەپ حابارلايدى Egemen.kz.
37 جاستاعى بوكسشى UFC-ءدىڭ بۇرىنعى جاۋىنگەرى الي باگاۋتينوۆقا قارسى وتكەن جەكپە-جەگىنەن كەيىن وسىنداي شەشىم قابىلدادى. بەس راۋندقا جوسپارلانعان بۇل كەزدەسۋ قايىرىمدىلىق جاساۋ ماقساتىندا ۇيىمداستىرىلعان بولاتىن. جەكپە-جەك قورىتىندىسى بويىنشا رۋسلان پروۆودنيكوۆ تورەشىلەردىڭ باسىم داۋسىمەن جەڭىسكە جەتتى.
«مەن بۇگىننەن باستاپ بوكسشى رەتىندەگى كاسىبي مانسابىمدى اياقتايمىن. قولعابىمدى شەگەگە ءىلدىم. جىلدار بويى مەنى قولداپ كەلگەن بارشا جانكۇيەرلەرگە, بوكس ماماندارىنا العىسىم زور», دەدى سپورتشى ءوز سوزىندە.
رۋسلان پروۆودنيكوۆ كاسىپقوي رينگتە 30 كەزدەسۋ وتكىزىپ, 25 جەكپە-جەكتە جەڭىسكە جەتكەن. ول 18 قارسىلاسىن مەرزىمىنەن بۇرىن ۇتىپ, بەس كەزدەسۋدە جەڭىلىستىڭ كەرمەك ءدامىن تاتقان. جانكۇيەرلەر ونى رينگ ورتاسىندا تىك تۇرىپ جۇدىرىقتاساتىن ءستيلىن ۇناتقاندىقتان «رەسەيلىك روككي» اتاعان ەدى.