ۇلىق مەرەكەگە ارنالعان باستى شارالار اياسىندا قىزىلوردادا شىنى زاۋىتى اشىلدى. اشىعىن ايتساق, وسى ءوندىرىس ورنى بيىل ىسكە قوسىلىپ, يگىلىككە جارايدى دەگەنگە يلانا قويعاندار از بولدى. ولاي بولاتىن دا ءجونى بار, بۇل سوناۋ 2008 جىلى قازاقستان مەن قىتاي ۇكىمەتتەرى اراسىندا بىرىككەن كاسىپورىندار تۋرالى جاسالعان كەلىسىمگە ەنگەن جوبالاردىڭ ءبىرى ەدى.
بىراق ءا دەگەننەن-اق باستالۋى كەيىنگە شەگەرىلە بەردى. تەك وسىدان 6 جىل بۇرىن ىرگەتاسى قالانىپ, ءوڭىر تۇرعىندارى قۇنى قىمبات باستامانىڭ كەلەشەگىنە ۇمىتپەن قاراي باستاعان. ۇزاق جىل كۇتتىرگەن زاۋىتتى ەل يگىلىگىنە بەرۋدىڭ ورايى ەندى كەلىپ وتىر.
وبلىستىق يندۋستريالىق-يننوۆاتسيالىق دامۋ باسقارماسىنىڭ باسشىسى رينات سۇلتانگەرەەۆتىڭ ايتۋىنشا, زاۋىت جاڭا تەحنولوگيالاردى پايدالانىپ, باسەكەگە قابىلەتتى ءونىم شىعاراتىن, ەلىمىز بەن ءوڭىر ەكونوميكاسى دامۋىنا تىڭ سەرپىن بەرەتىن اۋقىمدى جوبا. ءوندىرىس ورنى تولىق قۋاتىنا كوشكەندە 226 جاڭا جۇمىس ورنى اشىلادى. ال قوسالقى وندىرىستەردە 300-گە جۋىق ادام ەڭبەك ەتەدى. ەڭ باستىسى – جەرگىلىكتى تۇرعىنداردى جۇمىسقا تارتىپ, قاجەتتى مامانداردى سولاردىڭ اراسىنان دايارلاۋعا باسىمدىق بەرىلەدى.
– ەل تاۋەلسىزدىگىنىڭ 30 جىلدىعىنا وراي وبلىس تۇرعىندارى تاباقشا شىنى زاۋىتىنىڭ كۇيدىرۋ پەشىن ىسكە قوسۋ راسىمىنە كۋا بولدى. بۇل جوبا اياسىندا وڭىرگە 42 ملرد تەڭگەدەن اسا ينۆەستيتسيا تارتىلعان بولاتىن. جىلىنا 197 مىڭ توننادان اسا ءونىم شىعاراتىن كاسىپورىن ەل نارىعىن شىنىمەن قامتاماسىز ەتىپ قانا قويماي, ءونىمىن شەت مەملەكەتتەرگە ەكسپورتتايدى. شىنى زاۋىتىنىڭ ىسكە قوسىلۋى شيكىزاتتىق ەمەس سەكتوردى دامىتىپ, ىلەسپە وندىرىستەردى قۇرۋعا مۇمكىندىك بەرەدى. بۇگىندە ينۆەستورلارمەن بىرلەسىپ كومپوزيتتىك ماتەريالدار مەن اينا ءوندىرىسى جوباسىن باستادىق. بىلتىر قازاقستان قۇنى 65 ملن دوللار بولاتىن تۇرمىسقا قاجەتتى شىنىلاردى قىتاي, گەرمانيا, وزبەكستان جانە تۇركيادان العان. زاۋىت تولىق ىسكە قوسىلعاندا كاپيتالدىڭ باسقا ەلدەرگە جىبەرىلۋىن توقتاتامىز جانە ەلدى سىر بويىنان شىعاتىن اينەكپەن قامتاماسىز ەتەمىز, – دەدى باسقارما باسشىسى.
Orda Glass Ltd سەرىكتەستىگى مەن قىتايلىق China Triumph كومپانيالارى بىرلەسىپ جۇزەگە اسىرعان شىنى زاۋىتى – يندۋستريالاندىرۋ باعدارلاماسىنىڭ نەگىزگى جوباسى. وندىرىستە قولدانىلاتىن شيكىزاتتىڭ 90 پايىزى وزىمىزدە بار.
– زاۋىتتا اقش, يتاليا, بەلگيا, فينليانديا, قىتايدا شىعارىلعان زاماناۋي ۇلگىدەگى تەحنولوگيالار قولدانىلادى. نەگىزى ءونىمنىڭ 70 پايىزىن ىشكى نارىققا باعىتتايمىز. ال قالعانى شەتەلگە جونەلتىلەدى. قازىردىڭ وزىندە وزبەكستان, رەسەي, تۇرىكمەنستان, تاجىكستان, اۋعانستان مەن ءۇندىستاننان تاپسىرىستار تۇسۋدە.
تاعى ءبىر جاڭالىق – ۇلكەن كولەمدى جانە اۋىر سالماقتى شىنى تاباقشالارىن كەسۋگە جانە تاسىمالداۋعا روبوتتار قولدانىلماق. قازىر قازاقستاندا سىرتتان كەلگەن 1 توننا شىنى قۇنى 300-350 دوللار بولسا, ءبىزدىڭ زاۋىت ءونىمىنىڭ باعاسى 200-250 دوللار كولەمىندە بولادى, – دەدى Orda Glass Ltd جشس باسقارما توراعاسى ەرجان ساعىنباەۆ.
قىزىلوردا وبلىسى