ەل تاۋەلسىزدىگىنىڭ 30 جىلدىق مەرەيتويى قارساڭىندا الماتى قالاسىنىڭ مەدەۋ اۋدانىنداعى «باقىتتى وتباسى» الەۋمەتتىك ورتالىعى جاعدايى تومەن ايەلدەر مەن كوپبالالى انالاردىڭ شاعىن كاسىپتەرىن قولداپ, كومەك كورسەتۋ اياسىندا وزدەرىنىڭ العا قويعان ماقساتىنا جەتە بىلگەن 30 كاسىپكەر اناعا 2022 جىلعا ارنالعان جەكە كۇنتىزبە جاساپ بەرۋدى ۇيىمداستىرىپ وتىر.
«باقىتتى وتباسى» باعدارلاماسىنىڭ ءوزى قارجىلاي ەمەس قولداۋ ارقىلى كوپبالالى ايەلدەرگە كومەك كورسەتۋ ماقساتىندا قۇرىلعان جوبالاردىڭ ءبىرى. سونىمەن قاتار ورتالىقتا تىركەلگەن انالاردى ناتيجەلى ءارى تۇراقتى جۇمىسپەن قامتۋدى جانە جاپپاي كاسىپكەرلىكتى دامىتۋدىڭ 2017-2021 جىلدارعا ارنالعان «ەڭبەك» مەملەكەتتىك باعدارلاماسىن جۇزەگە اسىرۋ اياسىندا «باستاۋ بيزنەس» جوباسى بويىنشا 505 مىڭ تەڭگەلىك گرانت پەن «بيزنەستىڭ جول كارتاسى-2025» مەملەكەتتىك باعدارلاماسى ارقىلى 2 ملن-نان باستاپ 5 ملن تەڭگەگە دەيىن گرانتتار بولىنگەن بولاتىن. كومەككە مۇقتاج انالار اتالعان مەملەكەتتىك باعدارلامالار ارقىلى تەگىن وقىپ, بولىنگەن گرانتتارعا قاتىستى. جاقسى ناتيجە كورسەتە وتىرىپ, توپتار اراسىنان ۇزدىك شىقتى. قازىرگى ۋاقىتتا وزدەرىنىڭ جەكە كاسىپتەرىن العا جىلجىتىپ جاتىر.
قازىردىڭ وزىندە كەيبىر انالار ەكىنشى قولداۋعا قول جەتكىزە وتىرىپ, 2-5 ملن تەڭگەگە دەيىنگى كولەمدە قاراجات الىپ, كاسىپتەرىن دامىتۋعا جاقسى مۇمكىندىك الدى. سونداي-اق ورتالىق ۇسىنىسىمەن, مەدەۋ اۋدانى اكىمدىگى تاراپىنان قولداۋ تاۋىپ, جاس كاسىپكەر انالاردىڭ جەكە كاسىپتەرىنىڭ العا جۇرۋىنە, كليەنتتەر مەن تۇتىنۋشىلاردى تەز تابۋ ماقساتىندا اي سايىن اۋداندا جارمەڭكە ۇيىمداستىرىلىپ كەلەدى. ماسەلەن, انالار قولدان جاسالعان بۇيىمدارىن, جەمىس شوقتارىن, كارتينالار, سومكە, كيىزدەن جاسالعان بۇيىمدار, اشەكەيلەر, ءتاتتى تاعامدارىن جارمەڭكەگە شىعارىپ ءجۇر. سونىمەن قاتار ولارعا دەمەۋشىلەردىڭ كومەگىمەن 2 مىڭنان استام قايتا پايدالانۋعا بولاتىن بەتپەردە, 20 كومبينەزون تاراتىلدى. كارانتين كەزىندە ونلاين تاپسىرىس بەرۋ, ۇيدە تاپسىرىس قابىلداۋ ارقىلى 30 ايەل جۇمىسپەن قامتىلدى. وسى مامىلە ارقىلى 3 مىڭنان استام حالات, 7 مىڭ ماسكا مەن باحيل تىگىلگەن. كەلىسىمشارتقا سايكەس, ايەلدەردىڭ تاجىريبەلەرى مەن بىلىمدەرى اقىسىز وقۋعا نيەت بىلدىرگەن باسقا ادامدارعا جالعاستىقپەن بەرىلەدى. بۇل باستامانىڭ ومىرگە قۇلشىندىرا تۇسەتىن تۇستارى دا بار. ءوز كاسىبىنەن ءناسىپ تابۋدى كوزدەگەن انالار قاۋىمىن جىگەرلەندىرە ءتۇسۋ ءۇشىن مەدەۋ اۋدانى «باقىتتى وتباسى» ورتالىعى ۇيىمداستىرۋىمەن, 30 اناعا كاسىپقوي ستۋديادا ارنايى فوتوسەسسيا ءوتتى.
ەگەر ادام ءوز سۇيىكتى ءىسىن تاۋىپ, جاقسى ناتيجەگە جەتكىسى كەلسە, ورتالىق كۋرستارىنا قاتىسۋ ارقىلى ءوز ارماندارىنا جەتۋدىڭ جولدارىن تابا الادى. جاقسى ورتادان تابىلىپ, مۇددەلەس جاندارمەن بىرگە العا ءجۇرۋ دە ءبىر عانيبەت.
الماتى