الماتى كوروناۆيرۋس بويىنشا «جاسىل» ايماقتا تۇرسا دا جاڭا جىل كەشتەرى مەن وتىرىستارىن وتكىزۋگە تىيىم سالىنادى. بۇل تۋرالى بريفينگ بارىسىندا الماتى قالاسىنىڭ باس سانيتار دارىگەرى جانداربەك بەكشين ءمالىم ەتتى, دەپ حابارلايدى Egemen.kz.
ء«بىز «قىزىل», «سارى», «جاسىل» ايماقتا بولساق تا, ۇجىمدىق كەشتەرگە تىيىم سالىنادى. بۇگىنگى كۇنى ۆيرۋس جۇقتىرۋ جاعدايى ساقتالۋدا. ءتىپتى, «جاسىل» ايماقتا بولساق تا ءبىر تاۋلىكتە 120-130 ادامنان كوروناۆيرۋس انىقتالىپ جاتىر. ەگەر ۇجىمدىق شارالاردى وتكىزەتىن بولساق, ءبىز بىردەن «سارى» ەمەس, «قىزىل» ايماققا ورالامىز. ءبىزدىڭ ماقساتىمىز كارانتين شارالارىن ساقتاۋدى ودان ءارى جالعاستىرۋ», دەيدى جانداربەك بەكشين.
سونىمەن قاتار, ول مەكتەپكە دەيىنگى مەكەمەلەردە دە ەرتەڭگىلىك وتپەيتىنىن تىلگە تيەك ەتتى.
«بالاباقشالاردا جاڭاجىلدىق ەرتەڭگىلىكتەر وتكىزۋگە بولمايدى. بۇل توپتار اراسىندا ۆيرۋس جۇقتىرۋ قاۋپىن تۋدىرادى», دەدى ول.