تۇماۋ جۇقتىرعاندار كۇرت كوبەيدى

– وتكەن جىلمەن سالىستىرعاندا, قازىر جرۆي-مەن اۋىراتىندار ءۇش ەسەگە كوپ. سونىمەن قاتار بۇل كورسەتكىش ءار اپتا سايىن ءوسىپ كەلەدى. ناۋقاستاردىڭ 62%-ى – بالالار. مەديتسينالىق مەكەمەلەرگە بارلىعى 526 ناۋقاس جاتقىزىلدى, ونىڭ ىشىندە 17 جۇكتى ايەل جانە ءبىر جاسقا دەيىنگى 165 بالا بار, – دەدى ج.بەكشين.

الماتى ەپي­دەميولوگتەرى 1 قا­زان­ مەن 10 قاراشا ارالىعىندا جرۆي-ءدىڭ 61 252 جاعدايىن تىركەدى, جۇقتىرعانداردىڭ جارتىسىنان كوبى – بالالار. 176 الماتىلىق پنەۆمونيا­مەن اۋرۋحاناعا جاتقىزىلدى, ونىڭ ىشىندە 14 جاسقا دەيىنگى 30 بالا جانە 13 جاسقا دەيىنگى ءجاسوسپىرىم بار. وسى احۋالعا وراي قالانىڭ باس سانيتارى كوروناۆيرۋستىڭ جرۆي رەتىندە دە كورىنەتىنىن ءارى ونىڭ اۋىر زارداپتارعا اكەلۋى مۇمكىن ەكەنىن ەسكە سالدى.

– جرۆي ءوز كەزەگىندە ادامداردى كوروناۆيرۋسقا وسال ەتەدى. سوندىقتان قالا تۇرعىندارى سانيتارلىق-ەپي­دە­ميو­لوگيالىق قاۋىپسىزدىك شارالارىن جاۋاپ­كەرشىلىكپەن ساقتاۋى كەرەك. تۇماۋ­عا جانە كوروناۆيرۋسقا قارسى ۆاكتسينالاۋ وتە ماڭىزدى. الماتىدا تۇماۋ جۇقتىرعان 5 جاعداي تىركەلدى. ا H3N2 شتامى قالالىق كلينيكالىق جۇقپالى اۋرۋلار اۋرۋحاناسىنىڭ شولعىنشى ورتالىعىندا جانە ەمحانالاردا انىقتالدى, – دەدى ج.بەكشين.

ونىڭ ايتۋىنشا, جىل باسىنان بەرى ماۋسىمدىق كوروناۆيرۋسپەن قاتار رينوۆيرۋس, 2 ءتيپتى پاراگريپپ, بوكاۆيرۋس, رينوسينتيتسيالدىق ۆيرۋس (رس-ۆيرۋس) جانە ادەنوۆيرۋس – بارلىعى 28 فاكتى انىقتالدى.

تۇماۋدىڭ اسقىنۋىنان جانە باسقا ماۋسىمدىق اۋرۋلاردان ساقتاندىرۋ ءۇشىن ۆاكتسينالاۋدان وتكەن دۇرىس. اسىرەسە, قاۋىپ ساناتىنداعىلارعا ۆاكتسينالاۋ وتە ماڭىزدى.

– تۇماۋعا قارسى ۆاكتسينالاۋ بيۋدجەت ەسەبىنەن جۇرگىلەدى. تەگىن ەكپەلەردى مەديتسينا قىزمەتكەرلەرى, مەديتسينالىق باقىلاۋعا جاتاتىن بالالار, ءجيى اۋىراتىن 6 ايدان اسقان جانە جەتىم بالالار مەن اتا-اناسىنىڭ قامقورلىعىنسىز قالعان بالالار, سابيلەر ۇيلەرىنىڭ تاربيەلەنۋشىلەرى, مەديتسينالىق-الەۋمەتتىك مەكەمەلەردىڭ قىزمەت الۋشىلارى, جۇكتىلىكتىڭ 2-ءشى نەمەسە 3-ءشى تريمەسترىندەگى اياعى اۋىر ايەلدەر, جۇرەك-قانتامىر جۇيەسى مەن تىنىس الۋ ورگاندارىنىڭ سوزىلمالى اۋرۋلارى بارلار, سونداي-اق ەپيدەميولوگيالىق كورسەتكىشتەرى بار ادامدار الا الادى, – دەدى ج.بەكشين.

ايتا كەتەرلىگى, بيىل قاۋىپ توبىن­دا­عى ادامداردى ۆاكتسينالاۋ ءۇشىن 130 مىڭ دوزا كولەمىندە رەسەيلىك ءوندىرىستىڭ «گريپپول پليۋس» تۇماۋعا قارسى ۇش­ۆا­لەنتتى ۆاكتسيناسى ساتىپ الىنعان. ەگۋدى مەملەكەتتىك ەمحانادا دا, اقىلى نەگىزدە دە بەس جەكە مەديتسينالىق ورتالىقتا: IMC, «فارماكوم» جشس «ۆاكتسيناتسيا كلينيكاسىندا», «سوس-قازاقستان», Medical Assistance Group جانە ينتەرتيچتە الۋعا بولادى. قازىرگى ۋاقىتتا الماتىدا تۇماۋعا قارسى 113 555 قالا تۇرعىنى ەگىلدى, ونىڭ ىشىندە 14 جاسقا دەيىنگى بالالار – 15 907, جۇكتى ايەلدەر – 5 479, جۇمىس بەرۋشىلەر ەسەبىنەن 1 835 ادام, اقىلى نەگىزدە ءوز قارجىسىمەن 2 782 ادام ەگىلدى.

ءباسپاسوز كونفەرەنتسياسى بارىسىندا الماتىنىڭ باس سانيتارلىق دارىگەرى دۇنيەجۇزىلىك دەنساۋلىق ساقتاۋ ۇيىمىنىڭ الداعى كۇزگى-قىسقى ماۋسىمعا ارنالعان بولجامىن العا تارتا وتىرىپ: «سولتۇستىك جارتى شاردا ۆيرۋستىڭ ءتورت شتامى وزەكتى بولادى – A/Guangdong – Maonan/SWL1536/2019 (H1N1) pdm09, a/Hong Kong/2671/2019 (H3N2), B/Washington/02/2019 (B/Victoria lineage), B/Phuket/3073/2013 (B/Yamagata lineage), ولار ددۇ ۇسىنىسى بويىنشا تۇماۋعا قارسى ۆاكتسينا قۇرامىنا ەنگىزىلدى. الماتىدا بار ۆاكتسينا الداعى ماۋسىمدا نەعۇرلىم بەلسەندى بولاتىن ۆيرۋستاردان قورعاۋعا ارنالعان, ياعني «گريپپول پليۋس» تۇماۋدىڭ ءتورت تۇرىنەن قورعاۋعا قابىلەتتى», دەدى.

الماتى