تۇركىستان وبلىستىق مادەنيەت باسقارماسى مەن قازىعۇرت اۋدانى اكىمدىگى ۇيىمداستىرۋىمەن تۇركىستانداعى «كونگرەسس حولل» كونتسەرت زالىندا «بۇراڭ بەل» وبلىستىق بي بايقاۋى ءوتتى. «سالەم ساعان, تۇركىستان» ونەر فەستيۆالى اياسىندا وتكەن بايقاۋدا 17 بي ۇجىمى باق سىنادى.
بايقاۋدىڭ اشىلۋ سالتاناتىندا تۇركىستان وبلىسى اكىمىنىڭ ورىنباسارى ساكەن قالقامانوۆ قۇتتىقتاۋ ءسوز سويلەپ, وڭىردە مادەنيەت پەن ونەرگە قولداۋ كورسەتۋ جالعاساتىنىن جەتكىزدى. ال وبلىستىق مادەنيەت باسقارماسى باسشىسىنىڭ ورىنباسارى اسىلحان تەمىرحان ونەر فەستيۆالىنىڭ ماڭىزىنا كەڭىنەن توقتالىپ, جاس تالانتتاردى تانىتۋداعى ورنى ەرەكشە ەكەنىن اتاپ ءوتتى. مادەنيەت قايراتكەرى, قازاقستاننىڭ ۇزدىك حورەوگرافى, قازىلار القاسىنىڭ توراعاسى ايبولات ورىنباي, «ياسسى» بي ءانسامبلىنىڭ جەتەكشىسى قۋات تاۋكەەۆ, «فاراب» بي ءانسامبلىنىڭ جەتەكشىسى مارياننا شاليكاشۆيلي, «جۇلدىزدار» حالىقتىق بي ۇجىمىنىڭ جەتەكشىسى جاننات بالتاەۆا جانە حالىقارالىق بي بايقاۋلارىنىڭ لاۋرەاتى جانگۇل ەرسۇلتانوۆا قازىلىق ەتكەن بايقاۋ قورىتىندىسى بويىنشا قازىعۇرت اۋدانىنىڭ «تاڭشولپان» بي توبى گران-ءپريدى يەلەندى. ءبىرىنشى ورىندى جەتىساي اۋدانىنان كەلگەن «ايانا» بي توبى جەڭىپ السا, 2-ورىن ارىس قالاسىنىڭ «التىناي» بي توبىنا بۇيىردى. ءۇشىنشى ورىنعا قازىعۇرت اۋدانىنىڭ «بالاۋسا» جانە كەنتاۋ قالاسىنىڭ «راپسوديا» بي ۇجىمدارى لايىق دەپ تانىلدى. جەڭىمپازدار مەن جۇلدەگەرلەرگە ديپلوم جانە اقشالاي سىيلىق تاپسىرىلدى.