قاي كەزدە دە شارۋاسى شاش ەتەكتەن بولىپ جۇرەتىن شاعىن جانە ورتا بيزنەس وكىلدەرىنە ۋاقىت ۇنەمدەۋ ماڭىزدى. ەندى كەپىلدىك بەرۋ شارتىنا قول قويۋ ءراسىمى دە ونلاين جۇزەگە اسىرىلاتىن بولدى.
سونىمەن 8 قاراشادان باستاپ شاعىن جانە ورتا بيزنەس وكىلى جانە بانك پەن «دامۋ» كاسىپكەرلىكتى دامىتۋ قورى» اق («دامۋ» قورى) اراسىنداعى كەپىلدىك شارتىنا قول قويۋ تەك ەتسق ارقىلى ونلاين اتقارىلماق. بۇل – 2021 جىلدىڭ 25 قازانىندا قابىلدانعان جانە 2021 جىلدىڭ 7 قاراشا كۇنى كۇشىنە ەنەتىن «ساقتاۋ مەرزىمىن كورسەتە وتىرىپ, مەملەكەتتىك جانە مەملەكەتتىك ەمەس ۇيىمدار قىزمەتىندە جاسالاتىن ۇلگىلىك قۇجاتتار تىزبەسىن بەكىتۋ تۋرالى» بۇيرىققا ەنگەن وزگەرىستەر مەن تولىقتىرۋلار ناتيجەسىندە جۇزەگە استى.
– كەپىلدىك بەرۋ شارتىنا ونلاين قول قويۋ – ءبىزدىڭ كاسىپكەرلەر ءۇشىن وتە ماڭىزدى جانە ەلەۋلى وقيعا. وسى قىزمەتتىڭ ارقاسىندا پروتسەدۋرا اشىق وتەدى. ادامنىڭ ادامعا كۇنى تۇسپەيدى, كاسىپكەردىڭ, اسىرەسە, شالعاي ەلدى مەكەندەردە جۇمىس ىستەيتىندەردىڭ ۋاقىتىنا دا ۇنەم. كەپىلدىك سۇرايتىن وتىنىمدەردىڭ 72%-ى بىزگە ونلاين كەلىپ تۇسەدى. ەندەشە, كاسىپكەرلەردىڭ بارلىعى كەپىلدىك بەرىلگەن كەزدە شارتقا دا ونلاين قول قويعىسى كەلەدى. 2021 جىلدىڭ ءۇش توقسانىندا ءبىز كەپىلدىك سۇراعان 12,4 مىڭ ءوتىنىمدى ماقۇلدادىق. بۇل – بىلتىرعى وسى كەزبەن سالىستىرعاندا 1,7 ەسە ارتقانىن كورسەتەدى, – دەيدى «دامۋ» كاسىپكەرلىكتى قولداۋ قورى» اق باسقارما ءتورايىمى گاۋحار بۋريباەۆا.
كەپىلدىككە ءوتىنىمدى ونلاين بەرۋ پروتسەسى 2016 جىلى ەنگىزىلگەن. سونىڭ ارقاسىندا كاسىپكەرگە ءوز ءوتىنىمىنىڭ قاي دەڭگەيدە قارالىپ جاتقانىن جەكە كابينەتىندە باقىلاپ وتىرۋعا مۇمكىندىك تۋدى. ال ەندى «دامۋ» قورىنىڭ تاعى ءبىر باستاماسى – كەپىلدىك شارتىنا قول قويۋ دا تسيفرلاندى.
قوردىڭ تاعى ءبىر قولداۋ قۇرالى – سۋبسيديا بويىنشا شارت جاساسقاندا ەتسق ارقىلى قول قويۋ پروتسەسىن «دامۋ» قورى 2019 جىلى ەنگىزگەن ەدى. ول كەزدە دە تاراپتاردىڭ شارتقا قول قويۋ ءراسىمى ءبىر-اق جۇمىس كۇنىنە دەيىن قىسقارىپ, وڭتايلانعان بولاتىن. كاسىپكەرلەر بۇل وپتسيانى قۋانا قابىلداعانىن بىلەمىز.
سول 2019 جىلى ەتسق قولدانۋ ارقىلى ونلاين قول قويىلعان قۇجات سانى 1700 بولسا, 2020 جىلى 23 مىڭعا جەتتى, ال 2021 جىلدىڭ ءۇش توقسانىندا 36 800 شارت پەن ولارعا قوسىمشا كەلىسىمدەرگە قول جەتكىزىلدى.
بارلىق پروتسەستى بارىنشا اۆتوماتتاندىرۋدىڭ ارقاسىندا «دامۋ» قورى وتىنىمدەردى تولىق قامتىپ قانا قويماي, سونىمەن قاتار ءوتىنىم بەرۋشىلەرگە قىزمەت كورسەتۋ پروتسەسىن ايتارلىقتاي جەدەلدەتە تۇسكەنى قۋانتادى.
الماتى