قر ەنەرگەتيكا ءمينيسترى ماعزۇم مىرزاعاليەۆ ۇكىمەت وتىرىسىندا ەلىمىزدىڭ سولتۇستىگى مەن شىعىسىنداعى وبلىستاردى گازداندىرۋدىڭ ەكى جولى قاراستىرىلىپ وتىرعانىن ايتتى, دەپ حابارلايدى Egemen.kz.
«بۇگىنگى تاڭدا ەلدى گازداندىرۋ ۇلەسى 54,3 پايىزدى قۇراپ وتىر. ناتيجەسىندە 10,2 ملن ادام گازعا قول جەتكىزدى.
«نۇر-وتان» پارتياسىنىڭ سايلاۋالدى تۇعىرناماسىنا سايكەس, 2025 جىلعا دەيىن ەلدى گازداندىرۋ ۇلەسى 60 پايىزدى قۇراۋى كەرەك. سونىڭ ارقاسىندا 11,7 ملن ادام گازعا قول جەتكىزەدى», دەدى مينيستر.
ۆەدومستۆو باسشىسىنىڭ ايتۋىنشا, بۇگىنگى تاڭدا «سارىارقا» ماگيسترالدىك گاز قۇبىرى نۇر-سۇلتان, قاراعاندى, تەمىرتاۋ, جەزقازعان قالالارىندا كومىردى پايدالانىپ كەلگەن 70 مىڭعا جۋىق ءۇيدى گازبەن قامتاماسىز ەتۋگە مۇمكىندىك بەرەدى. ال اقمولا وبلىسىندا 13 جوبا ىسكە اسىرىلىپ, ناتيجەسىندە 16 مىڭ ءۇي گازعا قول جەتكىزە الادى.
«پەتروپاۆل, كوكشەتاۋ, وسكەمەن, سەمەي, پاۆلودار قالالارى بۇگىنگى تاڭدا گازداندىرىلماعان. سونىمەن قاتار, اتالعان قالالاردى گازبەن قامتاماسىز ەتۋدىڭ كەلەسىدەي جولدارى بار. اتاپ ايتساق, «سارىارقا» ماگيسترالدىق گاز قۇبىرىن جالعاستىرۋ نەمەسە رەسەي فەدەراتسياسىنان ماگيسترالدىق گاز قۇبىرلارىن تارتۋ. جىل سوڭىنا دەيىن «گازپروم» مەن «قازترانسگاز» ەلىمىزدىڭ سولتۇستىك جانە شىعىس وڭىرلەرىن گازداندىرۋ بويىنشا ەسەپتەۋ جۇرگىزىپ, ءتيىمدى نۇسقاسىن ازىرلەيدى», دەدى ماعزۇم مىرزاعاليەۆ.