سادىر جاپاروۆتىڭ ۇشاعى تەحنيكالىق تالاپتارعا ساي كەلمەگەندىكتەن, ۇلىبريتانياعا كىرگىزىلمەدى. قىرعىزستان پرەزيدەنتى جەكە ۇشاق جالداۋعا ءماجبۇر بولدى, دەپ حابارلايدى Egemen.kz.
بۇعان دەيىن رەيس ءۇشىن بيزنەس-كلاستاعى Embraer Lineage 1000 جەكە ۇشاعى جالعا الىنعانى بەلگىلى بولعان ەدى. اۋە لاينەرى دۋبايدان كەلگەن كومپانياعا تيەسىلى.
پرەزيدەنت اكىمشىلىگى تۋ-154 ۇشاعى ەۋروپالىق وداق پەن ۇلىبريتانيانىڭ تەحنيكالىق ستاندارتتارىنا سايكەس كەلمەگەنىن حابارلادى.
«وسىعان بايلانىستى قىرعىزستان تاراپىنا اتالعان ۇشاق ءتۇرىن ەل اۋماعىنا قوندىرۋ مۇمكىن ەمەستىگى تۋرالى ەسكەرتىلدى», دەلىنگەن حابارلامادا.
ۇلىبريتانيانىڭ تالاپتارىنا سايكەس دەلەگاتسيا جەكە ۇشاقپەن جەتكەن. ايتا كەتەيىك, سادىر جاپاروۆ باستاعان قىرعىزستان دەلەگاتسياسى بۇۇ-نىڭ كليماتتىڭ وزگەرۋى جونىندەگى نەگىزدەمەلىك كونۆەنتسياسىنا قاتىسۋشىلاردىڭ 26-شى كونفەرەنتسياسىنا جانە الەم كوشباسشىلارىنىڭ سامميتىنە قاتىسىپ جاتىر.